00:00:00 IGIHE NETWORK KN KINYARWANDA EN ENGLISH FR FRANCAIS

RAB yahumurije abaturage nyuma y’agakoko kadasanzwe kagaragaye mu mboga n’imbuto

Yanditswe na Hakizimana Jean Paul
Kuya 2 June 2022 saa 02:24
Yasuwe :

Ikigo cy’Igihugu gishinzwe Iterambere ry’Ubuhinzi n’Ubworozi (RAB) cyahumurije Abanyarwanda, kibasaba gukomeza kurya imboga n’imbuto, ngo agakoko byavugwaga ko kagaragaye ku mbuto ntacyo gatwaye.

Ibi byatagajwe nyuma y’iminsi hakwiriye igihuha cy’abantu bifashishije imbuga nkoranyambaga bakagaragaza ko hari agakoko kameze nk’umuntu kagaragaye ku mboga n’imbuto. Amakuru yakwiriye yavugaga ko iyo uriye imboga, isombe, imyembe n’ahandi kagiye kabonekaho ngo uhita upfa.

Ni igihuha cyakwiriye mu baturage bituma bamwe mu bacuruza imboga n’imbuto batangira guhomba mu gihe abaturage harimo ababonye utwo dukoko mu mirima yabo bakarandura imboga babaga barahinze.

Akimana Thacienne utuye mu Mudugudu w’Uwugwiza Akagari ka Binunga mu Murenge wa Munyiginya yavuze ko yumvise amajwi ku mbuga nkoranyambaga avuga ko ako gakoko kari kwica abantu bariye ku mboga n’imbuto kagaragayeho bigatuma aranduza imboga yari yarahinze.
Ati “Hari amajwi yagiye akwirakwira ko kariya gakoko kameze nk’umuntu kifitemo uburozi, aho kageze ngo burakwirakwira, maze kukabona mu rugo rero ntitwongeye gusoroma imboga, twaranazirimbuye kugira ngo n’umwana mu rugo atazigera azisoroma twari dutegereje niba koko kakwica umuntu ariko ubu batumaze impungenge.”

Mukamparirwa Christine utuye mu Murenge wa Gishari, we yavuze ko yumvise amakuru ko ako gakoko gakunze kugaragara ku isombe, imboga rwatsi no ku mbuto nk’imyembe n’amapera.

Ati “ Inaha hari abaturage baretse kurya isombe ngo badapfa, abenshi bari basigaye birinda kurya imboga twiriraga ibishyimbo rwose.”

Batamuriza Josephine ucururiza mu gasoko kamenyerewe gucururizwamo imbuto mu Karere ka Rwamagana, yavuze ko kuri ubu hari abakiliya bazaga guhaha bakirinda kugura imbuto ngo kuko bavugaga ko hari udukoko twateye dushobora kubica.

Ati “Umuntu yazaga guhaha imboga usanzwe uziko azikunda akirinda kuzijyana twe twaziranguye bikaba byadutera igihombo, ako gakoko numvise kavugwa n’abacuruza imboga Rusizi inaha njye nari ntarakabona ariko nakumvaga.”

Umushakashatsi muri RAB mu ishami rishinzwe kurwanya indwara n’ibyonnyi mu murima, Nkima Germain, yavuze ko agakoko kagaragaye ku bihingwa ubusanzwe kitwa ‘Apefly’ cyangwa ‘Spalgiss pp’.

Ni agasimba gakomoka mu muryango w’ibinyugunyugu, kakaba inshuti y’abahinzi mu kurwanya ibyonnyi cyane kuko gashobora kurya utumatirizi tugaragara ku myembe, amapapayi no ku binyamacunga.

Yavuze ko inkuru zakwirakwijwe ko ikimera gakoze kitaribwa ari ibihuha. Ati “ Ni amakuru adafite ishingiro, ababikwirakwije bari bagamije gushaka amaronko ibyo bakwirakwije ni ibihuha.”

Yavuze ko aka gasimba gafite umumaro mu kuzamura umusaruro mu buhinzi ngo kuko kagambiriye kurya utundi dusimba twangiza umusaruro ushobora kuboneka mu buhinzi.

Ati “Gafite umumaro ukomeye wo kurya udusimba twangiza umusaruro, gatungwa n’utumatiriza dukunze kugaragara cyane ku biti by’imyembe bigatuma itera, ibiti byose rero bifite utumatirizi hatangiye kugaragaraho utu dusimba.”

Nkima yasabye abaturage kwirira imbuto zabo ndetse n’imboga zabo ngo bazirye bazironze nk’uko bisanzwe, birinde kandi ibihuha by’abavuga ko ako gasimba kica.

RAB yavuze ko kuri ubu iri gutekereza uburyo yashaka uko yakorora aka gasimba ku bwinshi kugira ngo kayifashe mu kurwanya utumatirizi dukunze kwibasira imbuto zimwe na zimwe hatarindiriye ko haterwa imiti.

Aka gasimba nubwo ari gato kari kangaranyije abahinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .