Prof Shyaka yabwiwe ko hari abayobozi bamwe bifata nk’abashyitsi mu bibazo byugarije abaturage

Yanditswe na Habimana James
Kuya 25 Gashyantare 2020 saa 05:43
Yasuwe :
0 0

Abadepite bagize Komisiyo y’Ubutaka, Ubuhinzi, Ubworozi n’Ibidukikije mu Nteko Ishinga Amategeko, bagaragarije Minisitiri w’Ubutegetsi bw’Igihugu, Prof Shyaka Anastase, guhagurukira bamwe mu bayobozi mu nzego zibanze bigira ba ntibindeba mu bibazo biba byugarije umuturage.

Abagize iyi komisiyo bagaragaje ko hari aho bagiye mu turere, babaza abayobozi impamvu inganda zimwe zambuye abaturage, abo bayobozi bakababwira icyo atari ikibazo cyabo ahubwo kireba Ikigo cyo guteza imbere amakoperative, RCA.

Ibi byagarutsweho kuri uyu wa Kabiri tariki 25 Gashyantare 2020, ubwo iyi Komisiyo yatumizaga Minisitiri w’Ubutegetsi bw’Igihugu ngo atange ibisobanuro ku ishyirwa mu bikorwa ry’imyanzuro y’Inteko Rusange y’Umutwe w’Abadepite, kuri bimwe mu bibazo bikibangamiye iterambere ry’umuturage.

Depite Imaniriho Clarisse yavuze ko bimwe mu bibazo byagaragaye harimo ikibazo cy’imbuto zitabonekera igihe, amafumbire atabonekara igihe, zimwe mu nganda zitishyurira igihe abahinzi urugero nk’inganda zitunganya umuceri n’ahakigaragara abahinzi n’aborozi bahabwa igiciro gito ku musaruro wabo.
Visi Perezida wa Komisiyo, Nyirahirwa Veneranda, we yavuze ko byagaragaye ko iyo ugeze mu turere ukabaza uti kuki abahinzi batahingiye igihe, bakubwira ko imbuto yatinze kuza.

Avuga ko ikibabaje ni uko ngo usanga nta rwego na rumwe rw’ubuyobozi rwakurikiranye ngo rubaze inzego zibishinzwe impamvu abahinzi batabonera imbuto ku gihe.

Yagize ati “Ahandi abaturage bagahinga bakajyana umusaruro ku ruganda ariko inganda ntizibishyure, akarere kakavuga ngo biriya ntabwo ari ibibazo byacu ni ibibazo bya RCA kandi wa muturage ushonje ni uw’Akarere, ese akarere hari aho gakumiriwe kuba kagirana ibiganiro n’izo nganda zambuye abaturage? Aho niho hari ikibazo kuko usanga inzego zibanze zishaka kuba nk’abashyitsi mu bibazo bibangamiye abaturage.”

Minisitiri w’Ubutegetsi bw’Igihugu, Prof Shyaka Anastase, we avuga ko inzego zibanze zitavanaho inzego zose, ahubwo icyashyirwa imbere ni ugufatanya hagati y’izo nzego.

Yagize ati “Niba ifumbire yaratinze kuza dukwiye kumenya ngo turabibaza nde, kuko twese tuba dushinzwe gukorera umuturage, niba rwiyemezamirimo yambuye abaturage bibazwa nde?.”

Yavuze ko mu kwezi gushize bakoze ingendo mu turere twose, bareba ibibazo biri mu buhinzi, nubwo uyu munsi ibintu byose bitameze neza ariko ko bari mu nzira zo kubona igisubizo kirambye.

Yavuze ko bikenewe ko umuturage agomba kwegerwa ariko bitari gusa kuri meya uyobora akarere, ahubwo bikajya ku bakozi bose barimo n’abafite ubumenyi bashyiriye abaturage.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza