00:00:00 IGIHE NETWORK KN KINYARWANDA EN ENGLISH FR FRANCAIS

Prof Kalisa Mbanda yashyinguwe (Amafoto)

Yanditswe na IGIHE
Kuya 24 Mutarama 2023 saa 12:48
Yasuwe :

Prof Kalisa Mbanda wari Perezida wa Komisiyo y’Igihugu y’Amatora, yashyinguwe kuri uyu wa Mbere tariki 24 Mutarama 2023, aherekezwa n’imbaga y’abamumenye biganjemo ingeri zose, abato n’abakuru.

Prof Mbanda yitabye Imana kuwa 13 Mutarama 2023 azize urupfu rutunguranye.

Yashyinguwe kuri uyu wa Mbere mu irimbi rya Rusororo, ahari heteraniye imbaga y’inshuti n’abandimwe baje gufata mu mugongo umuryango wa Mbanda.

Prof Mbanda yashyinguwe nyuma y’umunsi hakozwe igitaramo cyo kuzirikana ubuzima bwe, bwaranzwe n’ubuhanga no kwicisha bugufi kandi akaba inshuti ya bose.

Yashyinguwe n’abantu batandukanye barimo abayobozi muri Guverinoma nka Minisitiri w’Ubutegetsi bw’igihugu, Musabyimana Jean Claude, Minisitiri w’Ubuhinzi n’Ubworozi, Dr Gerardine Mukeshimana, Minisitiri w’Ikoranabuhanga na Inovasiyo, Ingabire Paula, Komiseri Mukuru w’Ikigo cy’Igihugu cy’Imisoro n’Amahoro, Ruganintwari Pascal n’abandi.

Kalisa Mbanda yavutse ari imfura mu muryango w’abana umunani babyawe na Gatete André na Mukanyonga Josephine, avukira i Murambi mu Karere ka Rulindo mu 1947.

Yize amashuri abaza ahitwa i Mugambazi mu myaka ya 1955, ayarangiza afite amanota menshi ku buryo yabonye ishuri muri Collège Saint André i Nyamirambo. Icyiciro cya kabiri cy’amashuri yisumbuye yagikomereje muri École des Sciences de Musanze, akomereza muri Athénée Royale de Goma.

Kaminuza yayize i Kinshasa akomereza mu Bubiligi muri Kaminuza ya Louvain-la-Neuve, aho yavuye asubira kwigisha muri Kaminuza i Kinshasa.

Prof Kalisa Mbanda yagizwe Perezida wa Komisiyo y’Igihugu y’Amatora mu 2012 muri manda y’imyaka itanu, yaje no kongerwa. Kuri ubu kandi yari asanzwe ari Umuyobozi w’Icyubahiro [Chancellor] wa Kaminuza Yigenga ya Kigali, ULK.

Yakoze mu bigo bitandukanye bikomeye birimo Ishami ry’Umuryango w’Abibumbye ryita ku Iterambere (UNDP) nk’impuguke mu mishinga iteza imbere abaturage kuva mu 1990-1995.

Prof Kalisa Mbanda kandi yabaye umwarimu muri kaminuza ndetse aza kuba Umuyobozi w’Ishami ry’Ubuhinzi n’Ubworozi mu yari Kaminuza Nkuru y’u Rwanda hagati ya 1995-1998.

Yakoze muri Minisiteri y’Imari n’Igenamigambi nk’Impuguke mu Igenamigambi ishinzwe Ubuhinzi, Iterambere ry’Icyaro n’Ibidukikije hagati ya 2000-2003, aba n’Umuyobozi w’Ishuri Rikuru ry’Ubuhinzi n’Ubworozi (ISAE) mu 2003-2007.

Nyuma yaho, Prof Mbanda yakoze nk’impuguke akorana n’ibigo birimo RLDSF (Rwanda Local Development Support Fund) FARG, MINAGRI/RSSP n’ibindi.

Umuryango wa Prof Mbanda agahinda kari kose
Fidele Ndayisaba asuhuza Minisitiri Ingabire Paula ubwo bari bagiye guherekeza Prof Mbanda witabye Imana
Umunyamabanga Mukuru wa RIB, Col Ruhunga Jeannot ni umwe mu baje guherekeza Prof Kalisa Mbanda
Abana ba Prof Mbanda kwihangana byanze, bararira kubera agahinda
Umuyobozi Mukuru wa Sosiyete itanga amashanyarazi mu bihugu bigize umuryango wa CEPGL yitwa SINELAC, Fidele Ndayisaba ni umwe mu baje gushyingura Prof Mbanda
Minisitiri w'Ikoranabuhanga na Inovasiyo, Ingabire Paula yaje gusezera kuri Prof Kalisa Mbanda
Pierre Damien Habumuremyi wahoze ari Minisitiri w'Intebe yaje gusezera kuri Prof Mbanda
Minisitiri w'Ubuhinzi n'Ubworozi, Dr Mukeshimana Gerardine yaje guherekeza Prof Mbanda
Inararibonye Rucagu Boniface ubwo yari yitabiriye umuhango wo gushyingura Prof Mbanda
Komiseri Mukuru wa RRA, Pascal Ruganintwari ari mu baherekeje Prof Mbanda washyinguwe kuri uyu wa Mbere
Umuryango we wahawe umwanya wo kumusezeraho bwa nyuma mu buryo bwa gikristu dore ko yari umwemera-Mana ukomeye
Umuryango wa Mbanda ugizwe n'abana be, abuzukuru be bamusezeyeho bwa nyuma
Prof Mbanda yavuzwe ibigwi, abasigaye basabwa kumwigiraho ubuhanga no kwicisha bugufi
Ubwo isanduku irimo umubiri wa Prof Kalisa Mbanda yagezwaga ku irimbi rya Rusororo
Agahinda kari kose ku muryango wa Prof Mbanda
Chorale Christus Regnat yahaye icyubahiro Prof Mbanda witabye Imana
Byari agahinda ku muryango wa Mbanda ubwo wamusezeragaho bwa nyuma
Agahinda kari kose ku maso y'abitabiriye uyu muhango wo gushyingura Prof Kalisa Mbanda
Inshuti n'abavandimwe bari baje guherekeza Prof Kalisa Mbanda

Amafoto: Habyarimana Raoul


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .