Prof. Kahn, Umunyamerika watangije mu Rwanda imyigishirize ishingiye ku kubara inkuru abikomoye ku Bayahudi

Yanditswe na Philbert Girinema
Kuya 11 Kanama 2019 saa 11:46
Yasuwe :
0 0

Annelies Marie “Anne” Frank yavukiye i Frankfurt mu Budage ku wa 12 Kamena 1929, yitaba Imana aguye mu nkambi muri Gashyantare 1945, umwaka Intambara ya Kabiri y’Isi yashyiriweho akadomo.

Amateka agaragaza ko Anne mu ntambara, yandikaga ibihe byose yanyuragamo mu gihe cy’imyaka ibiri n’igice akabibika mu nyandiko.

Umurage yasize watumye ab’ibinyejana byakurikiye kugeza magingo aya bamenya akaga Isi yahuye na ko mu ntambara ya 1939 -1945, itarasize n’abato.

Iyi Jenoside yabaye mu Burasirazuba bw’u Burayi yahitanye ubuzima bw’abagera kuri miliyoni 11 biturutse ku butegetsi bw’Aba-Nazi bwari buyobowe na Adolph Hitler; mu bishwe miliyoni esheshatu bari Abayahudi.

Abandi miliyoni eshanu bari abo Hitler yafataga nk’abadakwiye na bo kubaho barimo abirabura, abafite ubumuga, ababana bahuje ibitsina, abitwaga aba “Gypsies” [abaturage bageze mu Burayi ahagana mu 1400 baturutse mu Majyaruguru y’u Buhinde, aho bivugwa ko bari bafite inkomoko mu Misiri] n’abandi.

Hitler yashyiraga ibibazo by’Isi ku bandi, agakoresha Abayahudi nk’urwitwazo nk’uko no mu Rwanda byagenze ubwo Abahutu bagiriraga urwango Abatutsi bakabica mu 1994.

Inyandiko Anne Frank yanditse yahinduwe mu ndimi amagana itangira kwifashishwa nk’uburyo bwo gutanga ubutumwa ku Isi, aho yahisemo kugaragaza urumuri ahari umwijima. Umuyahudi Prof. Khan Drew avuga ko mu Rwanda yahahuriye na ba Anne Frank benshi.

Inkuru y’uyu mwana ni yo yasembuye Prof. Drew Kahn, Umwarimu wa Kaminuza ya Leta ya New York, Buffalo State, atangiza umushinga yise ‘The Anne Frank Project’ ufasha abanyeshuri n’abarimu gukoresha uburyo bwo kubara inkuru mu myigire hagamijwe gukemura amakimbirane no kubaka umuryango uboneye.

Uyu mugabo, intumbero ye ni ugufasha abakiri bato kuvuga inkuru z’ubuzima bwabo. Ati “Izi nkuru z’umuntu ku giti cye zihinduka inkuru z’umuryango wose, bigakomeza kuri sosiyete, ku karere, igihugu ndetse bikaba intero hose. Ibi ni ingenzi cyane, tugendeye ku bindi bihugu byanyuze mu bihe bya Jenoside, tuzi ko iyo tutavuze inkuru zacu, undi muntu azazivuga hanyuma zumvikane nabi. Perezida Kagame ibi abisobanura neza cyane.’’

“Rero, kwigisha abana hifashishijwe inkuru bizabafasha mu mashuri yabo ariko ni isomo ry’ingenzi mu kugira umwihariko ku gihugu, ku byo u Rwanda rwemera.”

Prof Kahn yigisha ku ikoreshwa ryo kubara inkuru nk’inzira yo gukemura amakimbirane, kubaka sosiyete n’ibindi mu bihugu birimo Kenya, u Busuwisi, Repubulika Iharanira Demokarasi ya Congo, Myanmar, Vietnam no mu Rwanda aho yatangije iyi gahunda mu 2009, ibikorwa bye abikorera mu kigo cyitwa Urukundo Learning Center mu Karere ka Muhanga.

Buri mwaka mu myaka icumi ishize, Kahn aza mu Rwanda ari kumwe n’abanyeshuri bo muri Kaminuza yo muri Amerika, bakamufasha gutanga amahugurwa ku barimu, ku buryo buboneye bakoresha mu kwigisha abana bijyanye no kubara inkuru.

Abarimu bafasha abanyeshuri kwiga aho kuba babajya imbere bakababwira mu ijwi riranguriye, babasaba gufata mu mutwe ibyo bize. Iyi myigishirize ifasha abanyeshuri kugira ubushobozi bwo gukora ibyo bazi, aho kuba ibyo babwiwe cyangwa bafashe mu mutwe.

Ati “Inkuru ni ingenzi cyane kuri Afurika by’umwihariko n’u Rwanda- uburyo bwo kwigisha hashingiwe ku kubara inkuru, ni nk’uburyo gakondo bukwiriye u Rwanda, imibare ituruka mu mashuri iragaragaza ko ubu buryo buboneye, kandi abarimu n’abanyeshuri barabukunda.”

Prof Kahn avuga ko iyi gahunda ari ingenzi kuko itanga ubumenyi ndetse ikagira n’uruhare mu kunoza amagambo aboneye hagamijwe guhindura ubuzima bw’abanyeshuri, ibintu by’ingenzi ku miryango yabo n’aho bakomoka.

Abanyeshuri biga uko bahera ku buzima bwabo bwite n’aho bakomoka mu guhindura ubuzima, ku buryo bituma bagira ubushobozi bwo kuzahangana n’ubuzima bwo hanze y’ishuri.

Prof Drew Kahn ari kumwe n'abanyeshuri bamufasha guhugura abarimu ku bijyanye n'imyigishirize ifatiye ku kubara inkuru

Atanga inama ku bijyanye n’uburezi buboneye

Mu kiganiro yagiranye na IGIHE, Prof Kahn, yavuze ko imyigishirize yo mu bihugu by’amahanga ishobora kuba yakoreshwa no mu bindi, ariko ko bigira ingaruka iyo ibintu byose biteruwe uko byakabaye.

Ati “Bumwe muri ubwo buryo bwo kwigisha ni bwiza, urugero mu Bwongereza no muri Amerika aho imyigishirize yateye imbere, ariko iyo uzanye byose uhura n’ibibazo. Kwigisha ukoresheje ingwa no kubwira abanyeshuri ntabwo bikigezweho, ntabwo bikora ibirenze gufata mu mutwe.”

Yakomeje ati “Dukeneye ko abanyeshuri babigiramo uruhare, bikava ku mutima, mu ntekerezo zabo, mu mateka, ku ngingo iyo ariyo yose baba bari kwiga. Abanyeshuri bakwiye kumva ko ari ingenzi, uko niko ubu buryo bwo kwiga hashingiwe ku kubara inkuru bukora. Abanyeshuri bagomba gukoresha inkuru zabo aho kuba iz’abandi. Umwarimu mwiza wanyu, Kagame, ibi arabizi, yakoze akazi gakomeye ko kwibutsa buri Munyarwanda ko ari ingenzi.”

Prof. Kahn yavuze ko nubwo hari ibibazo bike mu nteganyanyigisho y’u Rwanda, aho atanga urugero rw’ikoreshwa ry’Icyongereza n’Igifaransa; hari n’ubushake bwo gukora itandukaniro, hahangwa udushya, ibintu bifasha abarimu kugira ubushake bwo gutanga umusanzu wabo.

Uyu mugabo umaze gusura ibice byinshi by’u Rwanda, ashima intambwe yarwo mu ngeri zitandukanye, ndetse atebya yavuze ko yakwishimira kubona nka Perezida Trump yigira ku Rwanda gahunda zirimo imihigo n’umuganda bikajya bikorwa muri Amerika.

Ahera kuri ibi bintu agaragaza impano ya Perezida Kagame mu guhindura u Rwanda, rukava ku kuba igihugu cyuzuye imiborogo rukaba igihugu cyubashwe ku Isi uyu munsi.

Kuva yatangiza uyu mushinga mu Rwanda, hari byinshi bimaze kugerwaho ariko hari intambwe ndende ikenewe guterwa.

Ati “Mu myaka icumi ishize, nkubwiye ko twari kuba duhuguye abarimu 85 nari kuba nkubeshye. Nishimira abarimu b’Abanyarwanda, amashuri n’abanyeshuri; uburyo u Rwanda rwakiriye iyi gahunda yo kwigisha hashingiwe ku kubara inkuru, uburyo yakiriwe ni urugero rwiza ku bihugu byose nkoreramo.”

Yakomeje avuga ko iyi gahunda izakomeza mu gihe cyose ubufatanye buzaba bukomeje ndetse ko “abanyeshuri banjye nanjye ubwanjye twigiye byinshi ku Rwanda uko twabaga twigisha, muri make ni umubano ugirira akamaro impande zombi, ibyo ni ingenzi kuri Kaminuza ya Buffalo na Anne Frank Project”.

Kuba ari Umuyahudi byatumye yiyumvamo u Rwanda

Prof. Kahn nk’umuntu ufite inkomoko ku Bayahudi, yavuze ko amateka y’ubuzima bwe ari kimwe mu byatumye ahitamo uyu mwuga.

Agaruka ku mateka ye, yashimangiye ko gutangiza uyu mushinga mu Rwanda byahinduye byinshi mu buzima bwe, kuko yasaga n’uwisanga kubera amateka y’Abayahudi n’Abatutsi ashingiye kuri za Jenoside zombi zabakorewe, ku buryo mu Rwanda ari nko mu rugo he ha kabiri.

Ati “Ni ibintu bigaruka ku buzima bwanjye, mu mitekerereze ndetse no mu byo nkora bikampuza n’u Rwanda. Ni ibintu nishimira.”

Umushinga we wabaye imbarutso y’ubufatanye hagati y’Umujyi wa Buffalo aho mu 2011 wasinyanye amasezerano y’imikoranire n’Akarere ka Muhanga, ubwo abayobozi bako bari basuye Buffalo.

Hari ibikorwa byinshi byabayeho kuva ubu bufatanye bwatangira aho abaturage bo muri Buffalo bahaye amashanyarazi y’imirasire y’izuba abo mu Kagari ka Kivomo muri Muhanga, inka zahawe imiryango itishoboye mu mirenge ya Muhanga, Nyarusange na Shyogwe.

Abarimu barenga 200 bamaze guhugurwa ku gukoresha iyi myigishirize ndetse hari n’ubushake bwo kongera umubare w’abahabwa aya mahugurwa buri mwaka.

Umuyobozi w’Akarere ka Muhanga, Uwamariya Béatrice, yabwiye IGIHE ko ubufatanye n’Umujyi wa Buffalo bushingiye ahanini ku burezi.

Ati “Hari amahugurwa bajya baha abarimu bacu mu mashuri atandukanye, bazana abantu bakabahugura uburyo bushya bakoresha iwabo bahereye ku bikorwa bifatika byatanze umusaruro iwabo.”

Umushinga wa Anne Frank urateganya ibikorwa byinshi birimo gufasha abanyeshuri kwiga muri Buffalo State University no gutangiza Ikigo cy’Amahugurwa y’Uburezi mu Urukundo Learning Center kimwe no kwagura ibikorwa byabo mu bindi bice by’igihugu.

Prof Kahn ubwo aheruka mu Rwanda muri Kamena, we n’itsinda ry’abanyeshuri yari ayoboye, bagize umwanya wo gusura ibice bitandukanye birimo Pariki ya Nyungwe na Akagera, inzibutso za Jenoside yakorewe Abatutsi, gusura ibice by’icyaro byinshi mu Rwanda ndetse bitabira n’Umuganda.

Prof. Drew Kahn hamwe n'itsinda ry'abanyeshuri be ubwo baheruka mu Rwanda basuye ibikorwa bitandukanye birimo n'Ingoro Ndangamateka i Nyanza
Abanyeshuri biga muri Buffalo State University ubwo baheruka mu Rwanda bagize umwanya wo gusabana n'Abanyarwanda mu bice bitandukanye
Bakoze ibikorwa bitandukanye bigaragaza ubuzima bw'abatuye icyaro mu Rwanda
Byari ibihe by'umunezero ku itsinda ryari ryaturutse muri Amerika hamwe n'Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza