Polisi yerekanye batatu bahoze ari abapolisi bamburaga abaturage babizeza kubaha permis

Yanditswe na Thamimu Hakizimana
Kuya 15 Gashyantare 2020 saa 06:13
Yasuwe :
0 0

Polisi y’u Rwanda yerekanye abagabo batatu bahoze ari abapolisi, bashukaga abaturage bakabambura amafaranga yabo babizeza kubaha uruhushya rwo gutwara imodoka ‘permis’.

Kuri uyu wa Gatandatu tariki ya 15 Gashyantare 2020, nibwo beretswe itangazamakuru.

Aba bagabo babeshyaga abaturage ko hari poromosiyo yo guha permis abanyamahanga, bakabizeza ko batanze ibihumbi 300 by’amafaranga y’u Rwanda na bo bazihabwa.

Icyatumye abaturage babizera ari uko bababonanaga imyenda ya polisi. Bavuga ko ngo banigeze kubajyana ku Muhima, aho ishami rya Polisi rishinzwe umutekano wo mu muhanda rikorera ku mirongo iba iriho abashaka permis babajijisha.

Bemeza ko aba bagabo bari babasabye ibihumbi 400 Frw kugira ngo babahe permis nyuma yo kuyabaha barabahinduka bituma bamenya ko ari abatekamutwe.

Uwitwa Mukeshimana Alex yagize ati “Turi hano ku bw’abantu b’abatekamutwe twahuye batubwira ko ari abapolisi ngo hari poromosiyo y’abanyamahanga bari gushaka kubajyana hanze ariko ngo barabura abantu batandatu baratubwira ngo natwe baduhereza ibyangombwa ariko babinyuza kuri uyu mugenzi wanjye.”

Yakomeje avuga ko nyuma gutanga amafaranga ye ariko ntabone permis yahisemo kubimenyesha RIB noneho itangira kubakurikirana.

Mbonigaba Gideon, we avuga ko ubutekamutwe aba bagabo babakoreye bakabarya ayabo bwatumye bafunguka mu mutwe anashishikariza abanyarwanda bose kujya bashishoza mu rwego rwo kwirinda ko bahura n’ibibazo bahuye na byo.

Ati “Badutwaye amafaranga mu buryo mbese tutasobanukiwe kuko batubwiye ko hari gahunda yo guha abanyamahaga permis, ariko bavuga ko hakenewe abandi batandatu natwe dutanze amafaranga baziduha, nibwo twagiye tuyabaha ariko nyuma baza kuvuga ko hari andi asigaye tubimenyesha polisi.”

Yakomeje avugako iyo aba bagabo baba badafite imyenda ya polisi batari kubarya amafaranga yabo, anaboneraho gusaba abanyarwanda kujya bashishoza mbere yo gukoresha amafaranga yabo kuko abatekamutwe bamaze kwiyongera.

Umuvugizi wa Polisi y’u Rwanda, CP John Bosco Kabera, we yabwiye itangazamakuru ko aba bagabo ari ibisambo ndetse batari bakiri abapolisi kuko bari barasezerewe.

Ati “Ni ibisambo nk’uko byafashwe biri kwambura abaturage amafaranga bibabeshya kandi abantu nk’aba dusanzwe tuberekana buri munsi uretse n’abo bahoze ari abapolsi hari n’abasivili babyiyitirira bakagenda bakambura abaturage muri ubwo buryo.”

Yasabye abaturage gushaka permis mu nzira zemewe kuko polisi y’Igihugu idahwema gukoresha ibizamini zitangirwamo.

CP Kabera yongeyeho ko icyaha bakoze gikomeye kuko umupolisi wese ategetswe gusubiza ibikoresho byose by’akazi iyo yirukanwe anashimangira ko nibahamwa n’icyaha cyo kwiyitirira icyo batari cyo bazahanishwa igifungo kiri hagati y’imyaka ibiri n’itanu n’amande ari hagati ya miliyoni imwe n’ebyiri cyangwa eshatu.

Batatu bakekwaho kwambura abaturage amafaranga babizeza kubaha permis
Mbonigaba ni umwe mu bibwe n'aba bagabo batatu
Mukeshimana avuga ko bizeye aba bagabo kuko bababonanaga imyambaro ya polisi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza