Polisi yasabye abatwara ibinyabiziga kwitwararika mu bihe by’imvura yongeye kuba nyinshi

Yanditswe na IGIHE
Kuya 28 Ukwakira 2020 saa 10:18
Yasuwe :
0 0

Polisi y’u Rwanda yasabye abatwara ibinyabiziga kwitwararika muri iyi minsi imvura yongeye kuba nyinshi, mu rwego rwo kwirinda impanuka z’izindi ngaruka.

Hashize iminsi mu bice bitandukanye by’igihugu hagwa imvura nyinshi. Ikigo cy’Igihugu gishinzwe iteganyagihe (Meteo Rwanda) giherutse gutangaza ko hagati ya tariki 21 na tariki 31 Ukwakira 2020, hateganyijwe imvura nyinshi iruta iyari isanzwe igwa muri icyo gihe.

Polisi y’u Rwanda ibinyujije kuri Twitter, yatanze ubutumwa bugamije gukangurira abatwara ibinyabiziga kwitwararika igihe batwaye imvura iri kugwa.

Yagize iti “Muri ibi bihe by’imvura igwa ari nyinshi, imihanda iba inyerera ndetse hari n’ibihu ku buryo bishobora kugora abatwara ibinyabiziga. Niyo mpamvu Polisi y’u Rwanda yongera kwibutsa abatwara ibinyabiziga kwitwararika kugira ngo hirindwe impanuka muri ibi bihe by’imvura”.

“Polisi y’u Rwanda iributsa abatwara ibinyabiziga kugira uruhare mu kwirinda impanuka zo mu muhanda basuzumisha ibinyabiziga byabo, kugira ngo birinde ikintu cyose cyateza impanuka zo mu muhanda muri ibi bihe by’imvura y’umuhindo.”

Polisi yasabye abashoferi kugenzura ko amapine atashaje, ku buryo yabateza impanuka kubera ubunyerere, kugenzura uduhanagura ibirahure ko dukora neza, kugenzura ko amatara yaka neza kugira ngo bayacane mu gihe hariho ibihu no kureba ko feri nta kibazo zifite.

Polisi kandi yasabye abashoferi kugenda buhoro no kwigengesera, kuko imihanda ikunze kuba inyerera mu bihe by’imvura, no guhagarara igihe imvura ibaye nyinshi kugira ngo ibanze icogore.

Iti “Abatwara ibinyabiziga kandi baributswa kwirinda guhagarara munsi y’ibiti kuko bishobora kubagwira, bakirinda guhagara ahantu hanyura imivu cyangwa iruhande rw’imikingo no kwirinda kunyuza ikinyabiziga mu biziba n’ibidendezi kuko hari igihe haba ari harehare ikinyabiziga kikaba cyagwamo.”

Meteo Rwanda igaragaza ko imvura iteganyijwe muri iki gice cya gatatu cy’Ukwakira izaba iri hagati ya milimetero 30 na 150.

Ibice byo mu Ntara y’Iburengerazuba bizagusha imvura nyinshi cyane kuko izaba iri hagati ya milimetero 120 na 150, Mu ntara y’Amajyepfo no mu Majyaruguru hateganyijwe imvura iri hagati ya milimetero 60 na 120 mu gihe mu mujyi wa Kigali no mu Ntara y’Ibirasirazuba hateganyijwe imvura iri hagati ya milimetero 40 na 80.

Abatwara ibinyabiziga basabwe kwitwararika hirindwa impanuka muri ibi bihe imvura ikomeje kwiyongera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .