Polisi yafashe batanu bayiyitiriraga bakabeshya ko batanga impushya zo gutwara ibinyabiziga

Yanditswe na Twarabanye Venuste
Kuya 18 Kamena 2020 saa 09:25
Yasuwe :
0 0

Umuvugizi wa Polisi y’u Rwanda, CP John Bosco Kabera, yasabye abaturarwanda kwirinda abantu babahamagara bababwira ko babaha amafaranga bakabafasha kubona impushya zo gutwara ibinyabiziga badakoze ibizamini.

CP Kabera yabigarutseho kuri uyu wa 18 Kamena 2020 ubwo yerekanaga itsinda ry’abasore barimo abiyitiriye Polisi bavuga ko batanga impushya zo gutwara ibinyabiziga hatabayeho gukora ibizamini n’abari bashinzwe kubashakira abakiliya.

Muhozi Patrick yavuze ko yinjiye muri iryo tsinda mu bihe bya Coronavirus ashinzwe gushaka abakiliya. Uwamwinjijemo ari na we wari umukuriye ngo yiyitaga Afande Jérôme.

Muhozi yagombaga gushaka abantu akabumvisha ko hari Afande baziranye yamufasha kubona uruhushya rwo gutwara ibinyabiziga mu buryo bworoshye.

Yahitaga aha uwo mukiliya nimero ya telefoni y’uwo afande bakavugana akamubwira ibisabwa bitewe n’uburyo baganiriye akumva ubushobozi bwe akamuca amafaranga. Yamucaga ayo kwiyandikisha akamubwira ko andi azayafata yaje gufata uruhushya rwe.

Ngo uwo Afande yacishagamo nk’ibyumweru bibiri agahamagara wa mukiliya ngo aze ku Muhima gufata ibyangombwa bye ariko mu by’ukuri we siho yabaga ari, kwari ukugira ngo agire icyizere kuko ariho ibyangombwa nk’ibyo bibarizwa.

Umukiliya yarahageraga [Bagikoresha telefoni] akamusaba kujya gushyira ya mafaranga yasigaye kuri Mobile Money kugira ngo yinjire mu biro afate ibyangombwa bye atahe. Yamubwiraga ko ayamuhereye imbere mu biro harimo camera zababona.

Umukiliya yamaraga kohereza amafaranga undi agahita akuraho telefoni cyangwa se akamuhamagara amubwira ko haje abamukuriye yakwihangana agategereza.

Muhozi yavuze ko iyo uwo mukiliya yabonaga bimushobeye yahamagaye undi akanga kwitaba cyangwa yakuyeho telefoni yamuhamagaraga nk’umuntu wabahuje amubwira ikibazo yagize undi agatangira inzira yo kumurerega kugeza arambiwe.

Ati “Jye wamushatse arampamagara akambwira ati ‘ese wa afande wampaye ko nari maze kumwishyura none bimeze gutya na gutya,’ nkamubwira nti rero icyoroshye reka nguhe amafaranga utege noneho jye nzasigara mbikurikirana ubwo bikaguma muri ibyo byo kumurerega kugeza arambwiwe.”

Abagiraga amakenga ntibashyire ya mafaranga kuri Mobile Money hari ubundi buryo ngo bakoresha ubutumwa buvuye ku Irembo babereka ko batsindiye uruhushya rwo gutwara ibinyabiziga kugira ngo babahe amafaranga asigaye, nyuma bajya kwandikisha izo mpushya bakazibura.

Abagize iryo tsinda bavuze ko mu by’ukuri nta byangombwa bahaga abakiliya ahubwo kwari ukubarya amafaranga gusa bumva ko bizarangirira aho.

Muhozi yavuze ko umuntu wo muri Gatsibo bafatiweho yabahaye ibihumbi 350 Frw.

Muri rusange abo bose bumvikanishaga ko bagiye batangira bashaka impushya zo gutwara ibinyabiziga, abo bahaye amafaranga bakabarerega ntibabibahe ariko nyuma bakababwiza ukuri ndetse bakanabasaba ko bayoboka iyo nzira bakagaruza ayabo.

Uwo wiyitaga Afande Nshimiyimana Jérôme yavuze ko na we yatangiye ashaka uruhushya rwo gutwara ibinyabiziga umuntu akaza kumuhuza n’uwagombaga kubimufashamo amuha ibihumbi 550 Frw, aza kumurerega ntiyabibona.

Nyuma amubwiza ukuri amwinjiza no muri ubwo butekamutwe. Uwa mbere yamuzaniye yatanze ibihumbi 200 Frw bamuhaho 70 Frw. Muri rusange bose bari bamaze kwinjiza amafaranga atandukanye arimo n’uwari umaze kubikuramo miliyoni 1.5.

Umuvugizi wa Polisi, CP John Bosco Kabera, yavuze ko ibyo bakora bisiga isura mbi Polisi bikabangamira umutekano w’abaturage, asaba abantu kwirinda kugwa muri ibyo byaha.

Yagize ati “Impamvu ituma tuberekana tuba tugira ngo n’abandi babirebereho kubera ko nta n’icyo binabamarira birangira bafashwe bakajya mu buroko n’amafaranga bavuga bakoreye ntagire icyo abamarira. Icya kabiri bangiza n’isura ya Polisi. Kumva umwana nk’uriya w’umusore uhaguruka akiyita Chief Inspector of Police akavuga ko azajya abaha impushya agashuka abaturage kabaka amafaranga ntabwo aribyo.”

CP Kabera yibukije ko kubona uruhushya rwo gutwara ibinyabiziga ari uburenganzira bwa buri Munyarwanda nta mpamvu yo guca iz’ubusamo zatuma abaturage bibwa.

Abatawe muri yombi mu gihe icyaha cyabahama bashobora guhanishwa igifungo kitari munsi y’imyaka ibiri kitarengeje imyaka itatu n’amande kuva kuri miliyoni ebyiri kugeza kuri eshanu.

Polisi y'u Rwanda yerekanye itsinda ry'abasore batanu barimo abiyitiriye Polisi bavuga ko batanga impushya zo gutwara ibinyabiziga ku bantu batakoze ibizamini n'ababafasha gushaka abo babeshya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .