Polisi yaburiye abambuka umuhanda bavugira kuri telefone cyangwa bambaye utwumvisho mu matwi

Yanditswe na Thamimu Hakizimana
Kuya 10 Ukwakira 2019 saa 08:39
Yasuwe :
0 0

Polisi y’u Rwanda, ishami rishinzwe umutekano wo mu muhanda yaburiye abagenzi bambuka umuhanda bambaye twumvisho two mu matwi cyangwa bari kuvugira kuri telefone kubyirinda kuko biteza impanuka.

Ibi Polisi yabitangaje nyuma y’aho bigaragaye hari abagenzi basigaye bagera aho bagenewe kwambukira (Zebra Crossing) bakagenda ntacyo bitayeho.

Mu kiganiro IGIHE yagiranye na Umuyobozi w’Ishami rya Polisi rishinzwe Umutekano wo mu Muhanda, CP Rafiki Mujiji,yavuze ko bidakwiye ko umuntu yambuka umuhanda arangaye ari kuvugira kuri telefone cyangwa yambaye utwumvisho two mu matwi.

Yasabye abaturage gukoresha umuhanda neza cyane ko kuko kugira uburenganzira bitavuze kurengera n’ubw’abandi.

Yongeyeho ko abagenzi ari bo bateye ikibazo cyane kuko nta tegeko ryari ryasohoka ribahana iyo bakoze amakosa mu muhanda nk’ abamotari n’abandi batwara ibinyabiziga.

Yagize ati “ Abakoresha amaguru ni nabo baduteye ikibazo cyane kinini, nibo dushaka kwigisha cyane kubera ko ab’imodoka bo turabahana ariko bariya b’amaguru ntituragera igihe cyo kubahana kuko nta tegeko turabona.”

Yakomeje agira ati “ Ukoresha ikinyabiziga namenya ko hariya hantu ho kwambukira hagenewe abanyamaguru ,abanyamaguru nabo nibamenye kuhakoresha neza, ukahanyura mu buryo bwihuse utarangaye utari kuri telefone utarimo.”

Umumotari witwa Biziyaremye Damascene, avuga ko yashimishijwe cyane no kuba polisi yaraburiye abanyamaguru uko bakwiye kwitwara mu muhanda

Ati “ Biranshimishije. Hari ubwo wageraga aho abanyamaguru bambukira ukabona umuntu aje yivugira kuri telefone cyangwa yambaye ecouters kandi agenda buhoro, ubona ko ntacyo yitayeho kuko aba azi ko umugonze wazabihanirwa.”

Rwego Alphonse acururiza mu Mujyi wa Kigali, yavuze ko haramutse hashyizweho itegeko rihana n’abanyamaguru byaba byiza kurushaho.

Ati “ Haje itegeko rihana abanyamaguru byaba byiza kurushaho kuko natwe twajya tujya twambuka tugashishoza kandi tukabikora vuba kuko hari ubwo ubona umuntu yajya kwambuka ukabona rwose abaye nk’aho yibagiwe ko ari mu muhanda ku buryo hari n’umumotari uhita yikomereza atitaye ku kuba yahanwa.”

Polisi y’u Rwanda iherutse gutangaza ko uhereye muri Mutarama ukageza muri Kanama uyu mwaka, habaye impanuka 3241, ugereranyije n’impanuka 3864 mu gihe nk’icyo umwaka ushize.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza