00:00:00 IGIHE NETWORK KN KINYARWANDA EN ENGLISH FR FRANCAIS

Polisi y’u Rwanda yakoresheje miliyari 2 Frw mu kubaka ibikorwa byegerejwe abaturage mu kwezi kumwe

Yasuwe :

Polisi y’u Rwanda yasoje ukwezi kwahariwe ibikorwa byayo byegerezwa abaturage byakozwe hirwa no hino mu gihugu byatwaye asaga miliyari 2 Frw.

Mu bikorwa byatashywe ku mugaragaro harimo inzu 65 zubatswe, aho muri buri Karere hubatswe inzu ebyiri zatujwemo imiryango itishoboye.

Hatanzwe kandi mituweli ku miryango irenga ibihumbi 2000, bamwe mu baturage bahabwa imirasire y’izuba, ubwogero bw’amatungo 16, urubyiruko rwagororewe mu bigo birimo i Iwawa na Gitagata bahabwa ibikoresho, ubukangurambaga bwo kurwanya ibiyobyabwenge n’ibindi.

Ku rwego rw’Umujyi wa Kigali hubatswe inzu esheshatu zatwaye asaga miliyoni 125 Frw, amarerero atatu yatwaye agera kuri miliyoni 60 Frw.

Ibirori byo gusoza uku kwezi byabereye mu Murenge wa Mageragere mu Karere ka Nyarugenge ku wa 16 Ukuboza 2022.

Umuyobozi wa Polisi wungirije ushinzwe ibikorwa, DIGP/OPs Felix Namuhoranye yavuze ko ukwezi kwahariwe ibikorwa bya Polisi ari ukwezi kurangwa n’ibikorwa bigamije kuzamura imibereho myiza y’abaturage n’ubukangurambaga.

Ati “Ibyakozwe byose bigamije iterambere rirambye ry’umuryango Nyarwanda; ukwezi kwahariwe ibikorwa bya Polisi ari ni ukwezi kurangwa n’ibikorwa bigamije kuzamura imibereho myiza y’abaturage n’ubukangurambaga. Kubungabunga umutekano ni uguhozaho kuko nta mutekano nta terambere.”

Yakomeje yibutsa abaturage kugira uruhare mu gukumira icyaha kitaraba no gutangira amakuru ku gihe kugira ngo buri wese abe ijisho rya mugenzi we.

Minisitiri w’Umutekano w’Imbere mu Gihugu Gasana Alfred, yagarutse ku myaka imyaka 22 ishize Polisi y’u Rwanda ikorana bya hafi n’abaturage yerekana ko itapfuye ubusa kuko igihugu gifite umutekano.

Ati “Polisi ubwayo ntabwo yakuzuza inshingano zayo idafatanyije n’abaturage kandi ko ubufatanye bwayo n’abaturage byatanze umusaruro mwiza kuko u Rwanda kugeza ubu ruri mu bihugu bifite umutekano usesuye.”

Yibukije abaturage ko kurinda umutekano ari uguhozaho abasaba gukomeza gufatanya na polisi mu gucunga umutekano ku cyahungabanya iterambere igihugu kimaze kugeraho.

Ati “Gucunga umutekano ni uguhoza kandi urugendo ruracyakomeje; dufatanye twese gucunga umutekano ku kintu cyose cyahungabanya iterambere igihugu cyacu kigezeho. Turashima Polisi ku bw’ubushake bw’ibikorwa bizamura imibereho myiza y’abaturage.”

Yasabye abaturage gukomeza kugaragaza ubufatanye hamwe n’inzego z’umutekano ndetse no kubungabunga ibikorwa bahawe ndetse n’ibindi bikorwaremezo igihugu gikomeza kwegereza abaturage.

Rutagengwa Jean Damascene yishimiye gutunga inzu yubakiwe na polisi

Umwe baturage bo mu Mujyi wa Kigali wahawe inzu, Rutagengwa Jean Damascene yashimiye Polisi y’u Rwanda, agaragaza ko yari mu buzima bugoye no kubona aho gukinga umusaya byari bigoye.

Ati “Ukuntu nari mbayeho byari nabi cyane, nari ndi mu nzu itari nziza ariko nayo kuyishyura byari ikibazo. Uko uzi umubyeyi yaremeraga umuntu akamwubakira nanjye ubu polisi niyo mubyeyi wanjye kuko impaye aho kuba. Uko baturindira umutekano ubu hari undi mutekano ukomeye bandindiye mu by’ukuri sinzi uburyo nabisobanura.”

Urubyiruko rwahuguriwe Iwawa no mu kigo cya Gitagata muri uku kwezi narwo rwarafashijwe bijyanye n’imyuga rwize, abo muri Nyarurenge bahawe imashini zigezweho zo kudoda bazifashisha mu kwiteza imbere.

Uhagarariye abandi bo mu Karere ka Nyarugenge mu Murenge Mageragere, Hategekimana Papias, yagaragaje ko ubuzima bwabo bwahindutse kandi ko bamaze kubona icyerekezo cy’ejo hazaza.

Iburengerazuba barashima

Nyiranyoni Thacienne utuye mu Karere ka Nyabihu, Umurenge wa Jenda, yavuze ko ashimira Polisi y’u Rwanda yamwubakiye inzu mu kwezi kwahariwe ibikorwa bya Polisi.

Uyu mupfakazi yavuze ko inzu yahawe ayifata nk’igitangaza kuko yabaga mu ishaje, itagira sima kandi na yo ayikodesha.

Yahawe inzu yubakishije amatafari ahiye, irimo intebe, akabati, ibitanda na matera.

Kuri we ngo ni nk’igitangaza kuko ngo ni ubwa mbere afunguye inzugi zigezweho, ni na bwo abaye mu nzu irimo amashanyarazi.

Yagize ati" Ndashima cyane Perezida Kagame ko yantumyeho abapolisi kandi ubutumwa bakabungezaho neza.”

Mu ntara y’Iburengerazuba, Polisi y’u Rwanda yubatse inzu 14, aho amatungo atererwa imiti, itanga ibikoresho bitanga amashanyarazi bigera ku 1808, yubaka n’amarerero 10.

Umuyobozi wa Polisi wungirije ushinzwe abakozi, DGIP Ujeneza Chantal yabwiye abaturage ko ibikorwa bya Polisi bigamije iterambere ry’umuturage, abasaba kubibungabunga no gutangira amakuru ku gihe ku bikorwa by’urugomo n’ibindi bihungabanya umutekano w’umuturage.

Guverineri w’Intara y’Uburengerazuba, Habitegeko François yasabye abaturage gufata neza ibikorwa bagejejweho, ashimira Polisi ko idacunga umuteko w’abaturage gusa, ahubwo inabashikira umudendezo, ikagira uruhare mu mibereho myiza yabo.

Buri mwaka Polisi y’u Rwanda igira ukwezi kwahariwe ibikorwa byayo ariko bigamije guteza imbere imibereho myiza y’abaturage nko kubakira abatishoboye, kubaremera, kubishyurira mituweli n’ibindi binyuranye.

Amajyaruguru nayo ntiyibagiranye

Mu Ntara y’Amajyaruguru Polisi yubatse amarerero atanu, inzu z’abitishoboye 13, itanga amashanyarazi y’imirasire ku miryango 1390

Igikorwa cyo gusoza icyumweru cyahariwe ibikorwa bya Polisi mu Ntara y’Amajyaruguru cyasorejwe mu murenge wa Bukure muri Gicumbi, ahi banatashye inzu ’’y’umuturage utishoboye ndetse n’irerero.

Muri Gicumbi hanatashywe inzu y’umuntu utishoboye mu murenge wa Rwamiko, abahawe inzu muri Gicumbi banahawe n’ inyana zo korora, ndetse babona ibyo kurya no kuryamaho bazifashisha

Abubakiwe inzu bashimye cyane ubuyobozi bwa polisi y’u Rwanda bemeza ko bateye intambwe idasubira aho bagize ndetse ko hasigaye uruhare rwabo mu iterambere, bashimangira ko batazongera kubarizwa mu kiciro cy’abatishoboye.

Guverineri w’Intara y’Amajyaruguru, Nyirarugero Dancille yasabye abaturage kurushaho gufashanya muri gahunda yo kuzamurana.

Iburasirazuba n’Amajyepfo na bo bakozwe ku mutima

Mu bikorwa byatashywe mu Burasirazuba harimo amarerero y’abana arindwi, ubwogero bw’inka bugezweho 10, inzu 14 zubakiwe abatishoboye hafashwa Koperative y’abana bavuye mu bigo Ngororamuco yo muri Kirehe, Mituweli 1100 ku miryango itishoboye, hanatangwa Imirasire y’izuba 1946.

Ikitegetse Alphonsine wo muri Nyagatare wubakiwe inzu yagize ati “Birandenze cyane, ubundi Polisi y’Igihugu twumvaga ari abantu bashinzwe gufata abafite amakosa, tukumva ko nta bikorwa byiza bajya bagira ariko ubu tubonye igikorwa cyiza cy’intangarugero ubu byandenze.”

Mbabazi Ancilla yishimiye irerero bubakiwe avuga rigiye kubafasha kubona aho abana babo bigira bakareka kugendanwa n’ababyeyi babo.

Guverineri w’Intara y’Iburasirazuba, Gasana Emmanuel, yavuze ko ibikorwaremezo byatashywe ari ibikorwa biremereye cyane kandi biganisha ku iterambere ry’umuturage. Yavuze ko nko kubaka irerero ari ugutegura abakiri bato kuzavamo abasore n’inkumi bafite indangagaciro nziza.

Mu ntara y’Amajyepfo ibikorwa byo gusoza iki cyumweru byitabiriwe na Minisitiri w’Ubutegetsi bw’Igihugu, Musabyimana Jean Claude n’Umuyobozi Mukuru wa Polisi y’u Rwanda IGP Dan Munyuza.

Muri iyi ntara hubatswemo ibikorwa bitandukanye birimo inzu zubakiwe abatishoboye zisaga 16, amarerero umunani ndetse n’ingo zirenga 2400 ziracanirwa.

Mu Mujyi wa Kigali

Minisitiri w'Umutekano w'Imbere mu gihugu, Gasana Alfred yagaragaje ko Polisi ikataje mu gucungira abaturage umutekano no guharanira iterambere ryabo
Umuyobozi wa Polisi wungirije ushinzwe ibikorwa, DIGP Felix Namuhoranye yavuze ko ukwezi kwahariwe ibikorwa bya Polisi ari ukwezi kurangwa n’ibikorwa bigamije kuzamura imibereho myiza y’abaturage
Dr Mpabwanamaguru Merald yashimiye Polisi y'Igihugu ku musanzu ikomeje gutanga mu bikorwa bizamura abaturage
Minisitiri w'Umutekano, Gasana ubwo yahaga umwana amata mu Irerero Polisi yubatse mu Kagari ka Rwampara
Abahuguriwe mu bigo ngororamuco bahawe ibikoresho bizabafasha kwiteza imbere

Mu Ntara y’Amajyaruguru

Abaturage basabwe gukomeza ubufatanye n'inzego zishinzwe umutekano
Muri iki gikorwa hatanzwe n'amatungo
Nzabonimpa Emmanuel uyobora Akarere ka Gicumbi yasabye abaturage gukomeza ubufatanye na Polisi
CP Viateur Nshimiyimana ni we wari uhagarariye Polisi y'Igihugu mu Ntara y'Amajyaruguru
Irerero rya Rwamiko mu Karere ka Gicumbi

Iburasirazuba

Inzu bahawe zirimo ibikoresho birimo n'intebe
Inzu ebyiri zubatswe mu Karere ka Nyagatare zashyikirijwe bamwe mu baturage batari bafite aho baba
Guverineri Gasana yabanje kureba igikoni kizajya cyifashishwa asanga kimeze neza
Habimana Vincent yishimiye inzu yahawe
CP Bruce Munyambo yavuze ko ibikorwa Polisi ikorera abaturage bigamije kubashyigikira mu iterambere ryabo

Amajyepfo

IGP Dan Munyuza aha umwana icunga
Muri uku kwezi Polisi y'u Rwanda yubatse amarerero mu Karere ka Nyamagabe
Abayobozi basabye abahawe ibi bikorwa kubibyaza umusaruro
Ubwo Minisitiri w'Ubutegetsi bw'Igihugu, MUsabyimana Jean Claude na IGP Dan Munyuza bashyikirizaga inzu abaturage bazubakiwe

Iburengerazuba

DIGP Ujeneza Chantal na Guverineri Habitegeko bashyikiriza umuturage inzu yubakiwe na Polisi
Umwe mu baturage bahawe inzu yasuwe n'abayobozi, agaragaza ibyishimo nyuma yo kubakirwa
Uyu muhango wari witabiriwe n'abayobozi batandukanye
Umuyobozi wungirije wa Polisi y'u Rwanda, DGIP Ujeneza Chantal yibukije abaturage gutangira amakuru ku gihe kugira ngo bakomeze kubungabunga umutekano
Nyiranyoni yashyikirijwe imfunguzo z'inzu ye ku mugaragaro
Nyiranyoni yahawe inzu irimo uburyamo bwiza
Nyiranyoni wahawe inzu yashiimiye Perezida Kagame
Izi ni inyubako zubakiwe abatishoboye mu karere ka Nyabihu

Amafoto: Igirubuntu Darcy, Yuhi Augustin, Rwema Derrick, Raoul Habyarimana


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .