Polisi y’u Rwanda yagaragaje ubudasa mu imurikabikorwa ry’Urwego rw’ubutabera (Amafoto)

Yanditswe na Emma-Marie Umurerwa
Kuya 19 Werurwe 2019 saa 04:40
Yasuwe :
0 0

Mu imurikabikorwa mu rwego rw’ubutebera ryabaye ku nshuro ya mbere, Polisi y’u Rwanda yamuritse ibikoresho bitandukanye yifashisha mu kubungabunga umutekano w’abantu n’ibintu.

Iri murikabikorwa ryahuje inzego 36 zigira uruhare mu gutanga ubutabera ku banyarwanda, ryabereye i Kigali kuri uyu wa 19 Werurwe 2019, ribanziriza icyumweru cy’ubutabera giteganyijwe ku wa 18-22 Werurwe. Imiryango itari iya Leta n’izindi nzego zamuritse ibyo zikora n’ibikoresho zifashisha.

Polisi y’u Rwanda - ishami rishinzwe umutekano wo mu muhanda, irishinzwe kuzimya inkongi n’Urwego rw’ubugenzacyaha, bamuritse ibikoresho bifashisha mu gucunga umutekano w’abantu n’ibintu, kuzimya inkongi n’ibindi.

Mu bikoresho byamuritswe na Polisi harimo icyuma gipima umuvuduko w’imodoka ‘speed radar’ icyuma cyifashishwa mu guhana abishe amategeko yo mu muhanda, igikoresho gipima utwaye ikinyabiziga yasinze ‘alcohol test’, imodoka ya rutura yifashishwa mu kuzimya inkongi mu nyubako ndende no gutabara abazirimo, n’imbwa zifashishwa na polisi mu gutahura ibiyobyabwenge.

Minisitiri w’Ubutabera akaba n’Intumwa nkuru ya Leta, Johnson Busingye, yavuze ko ibikorwa nk’ibi bigaragaza ingufu urwego rw’ubutabera rufite, asaba ko bakomeza kubaka umurunga w’ubufatanye.

Ati “Ibi bintu nabiherukaga dusaba Minisiteri y’Imari n’Igenamigambi amafaranga yo kubigura. Umunyarwanda wese ubu aziko inzu arimo igize ibyago byo kugira inkongi y’umuriro bamuteruramo bakamutabara. Ibyaha aho bibera mwabonye ko dufite ubushobozi bwo kugerayo.”

Busigye yakomeje asaba abanyarwanda kugira ubufatanye mu kurwanya ibyaha, amakimbirane mu muryango n’inda ziterwa abana. Yasabye kandi imiryango itari iya leta ikora mu rwego rw’ubutabera gufasha Ibigo Ngororamuco kugirango birusheho kugera ku ntego zabyo uko bikwiye.

Polisi yerekanye ko ifite ubushobozi bwo kuzimya umuriro mu nyubako ndende
Iki cyuma umushoferi ahuhamo, kikagaragaza ingano ya alcool yanyoye
Iki gikoresho kimeze nka telefone gipima umuvuduko w'imodoka
Iki cyuma gifashe ku modoka, cyifashishwa mu gutabara abantu bari mu nyubako ndende zabayemo inkongi
Imbwa Polisi yifashisha mu gutahura ahari ibiyobyabwenge yagaragaje ubuhanga
Imbwa yahunahunnye mu ma valisi imenya irimo urumogi
Izi mbwa zihabwa amabwiriza kandi zikayakurikiza
Minisitiri Busingye Johnson yarebaga aho polisi imurika ibikoresho yifashisha mu kuzima inkongi
Polisi yagaragaje n'uburyo itabara abantu bari mu nzu zabayemo inkongi\
Polisi yamuritse icyuma gipima umuvuduko mu muhanda, isobanura n'uburyo icyo cyuma gikoreshwa
Ubwo Polisi y'u Rwanda yamurikaga ibikoresho yifashisha mu kubungabunga umutekano w'abanyarwanda, abayobozi batandukanye bari babihanze amaso
Umunyamabanga Nshingwabikorwa wa Komisiyo y' Igihugu y' Ubumwe n'Ubwiyunge, Ndayisaba Fidele, yitabiriye imurikabikorwa ku butabera
Umupolisi yerekana icyuma cyifashishwa mu gupima utwaye imodoka yasinze
Umuyobozi w'Ikigo cy'Igihugu gishinzwe Igororamuco, Bosenibamwe Aime, hamwe n'abandi bayobozi bari bakurikiye iri murikabikorwa rya Polisi y'Igihugu
Umuvugizi wa Polisi, CP John Bosco Kabera akurikiye iki gikorwa
Umushinjacyaha Mukuru w'u Rwanda, Jean Bosco Mutangana hamwe n'abandi bayobozi bareba uko Polisi izimya inkongi
Umuyobozi wungirije wa Polisi y'u Rwanda ushinzwe abakozi n'imiyoborere, DIGP Juvenal Marizamunda, hamwe na Min. Busigye ndetse n'Umushinjacyaha Mukuru w'u Rwanda, Jean Bosco Mutangana
Urwego rw'Igihugu rushinzwe Imfungwa n'abagororwa rwamuritse ibiseke n'ibindi bikorwa n'imfungwa n'abagororwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza