Polisi y’u Rwanda mu nzira yo gukaza ibihano ku batwara imodoka basinze

Yanditswe na Habimana James
Kuya 18 Nzeri 2019 saa 06:08
Yasuwe :
0 0

Kuva muri Mutarama uyu mwaka abantu batari bake bamaze gutabwa muri yombi na Polisi kubera gutwara ibinyabiziga basinze.

Polisi ivuga ko izi ngeso mbi zikomeje kwiyongera zikaba zinabangamiye umutekano w’igihugu.

Ibi byatumye na Perezida Paul Kagame ubwo yari imbere y’abanyamuryango ba FPR-Inkotanyi bari bitabiriye inama ya biro politiki y’uwo muryango tariki 14 Nzeri uyu mwaka, avuga ko ibi ari ibintu bimaze gukabya ku buryo hakwiriye imbaraga zirenze izisanzwe.

Umukuru w’igihugu yavuze ko nubwo impanuka zidashobora gucika burundu, hari uburyo bwo kuzigabanya kuko ubuzima bw’umunyarwanda umwe bugiye ari igihombo gikomeye.

Ibi byatumye Polisi y’u Rwanda ivuga ko hagiye kongerwa ubugenzuzi mu buryo bukomeye hakumirwa ibyatuma ubuzima bw’umuntu buhagirira ikibazo.

Umuvugizi wa Polisi y’igihugu, CP John Bosco Kabera, yabajijwe na Taarifa impamvu ivuga ko igiye gukaza ibi bikorwa ku batwara imodoka basinze.

CP Kabera yavuze ko byatewe n’uko abantu bakomeje kunywa nta gahunda, aba bakaba ari nabo bakomeje kugaragara mu mpanuka zirimo kuba hirya no hino mu gihugu.

Yagize ati “Abantu bakomeje kunywa inzoga mu buryo butari bwo bakagaragara mu mpanuka za hato na hato zihitana ubuzima bw’inzirakarengane, bakabikora kandi birengagije itegeko, iyi niyo mpamvu Polisi y’igihugu yashyize ingufu muri iki kibazo.”

Ati “Ubu nguhaye urugero mu karere ka Nyagatare umuntu wari utwaye imodoka yasinze, aherutse kwica abantu batanu mu gace ka Ryabega, undi musinzi yishe abantu babiri hafi ya Minisiteri y’ubuhinzi n’ubworozi, uyu munsi ahagana saa kumi n’imwe, abandi bantu babiri biciwe ahazwi nko kuri PEAGE, indi mpanuka kandi yagonze ipoto ya kamera ahazwi nko ku Gishushu hafi ya RDB.”

Yavuze ko muri Nyakanga uyu mwaka abantu 11 bose baguye mu mpanuka.

CP Kabera yavuze ko “Izo ni zimwe mu ngero nshobora kukubwira ariko dufite izindi nyinshi z’abantu batwara ibinyabiziga bakirengagiza utugabanya muvuduko.”

Yavuze ko hagiye hakorwa ubukangurambaga bwo kwirinda impanuka ku bashoferi, abatwara amakamyo, abatwara moto, abanyamaguru, abanyeshuri n’abandi.

Abajijwe impamvu abantu bakomeje gutwara basinze bakagera n’aho bica amategeko, CP Kabera yavuze ko bishobora kuba biterwa no kwishima cyane.

Ati “Ndatekereza ko biterwa n’uko abantu bishimye cyane, bafite umutekano ndetse n’amafaranga, abenshi usanga ari abafite imirimo kandi bakiri bato, babandi usanga bumva ko bagomba kuva mu kazi bakajya kwishimisha, ni babandi baba bafite imodoka zabo.”

“Uyu muco ugomba kugenzurwa kuko nk’ubu mu byumweru bishize twataye muri yombi abashoferi 260, ibi biragaragaza nk’aho nta kintu kirimo guhinduka, ni mu gihe kandi twagiye twagura ibikorwa byacu hirya no hino mu mijyi mu gihugu.”

Ati“ Iperereza ririmo gukorwa ngo hamenyekane impamvu yo kwica itegeko kuko iyo umuntu azi itegeko nyamara byagera mu minsi isoza icyumweru agafata imodoka akajya kunywa agasinda yarangiza agatwara, niyo mpamvu dukeneye kumenya impamvu yo kunyuranya n’itegeko."”

Abajijwe niba koko iki ari ikibazo gikomeye ku kuba na Perezida Kagame yarakigarutseho, CP Kabera yavuze ko bikomeye kubera uburyo abantu babura ubuzima mu buryo budasobanutse.

Ati “Yego, yakivuzeho kubera ko ni ikibazo gikomeye aho abantu babura ubuzima mu buryo budasobanutse, ubuzima ni ikintu gikomeye, nk’ubu kuva muri Mutarama tumaze kubura ubuzima bw’abarenga 400, iki ni ikibazo gikomeye kandi kigomba guhagarara.”

Yavuzeko itegeko ririmo gusubirwamo kandi bimwe muri ibi byaha bigomba kujya bihanirwa.

CP Kabera yabajijwe itandukaniro ryo kunywa ugatwara no gusinda, niba byose byaba bihanwa kimwe.

Yavuze ko “Gutwara wasinze ni cya gihe unywa ukarenza urugero, iyo upimwe bikaba byagaragara ko warengeje ikigero cya 0.8 nk’uko amategeko yo mu Rwanda abiteganya, aho nibwo ufatwa ko watwaye wasinze.”

“Kuba umusinzi ni cya gihe uba udashobora kwigenzura ku buryo uba ikibazo ku bandi, mu gihe uri mu kabari abantu bahari cyangwa inzego z’umutekano zizakemura icyo kibazo, ushobora kuba wafatwa mu gihe wabangamiye amahoro y’abandi.”

Yanabajijwe kandi ikibazo cy’abafatwa bagafungwa uburyo bafatwamo, kuko hari abavuga ko bafatwa mu buryo butari bwiza, bakanafungirwa ahantu hatari heza.

CP Kabera yagize ati “Dufite aho bafungirwa hirya no hino mu gihugu kandi hujuje ibisabwa, ubundi se abafashwe ni ibihe baba bategereje kubonera aho bafungirwa kuri Polisi?, ubu noneho bigiye kuba ibintu bikomeye kuri bo, turimo kubigenzura ku buryo uzongera kujya akora icyaha uruhushya rwe ruzajya ruhagarikwa mu gihe runaka.”

Polisi y’u Rwanda yavuze ko itazahagarika gukomeza gukora amagenzura, bikazakorwa habayeho ubufatanye n’abaturage.

Polisi kandi ivuga ko kubera uburyo kubona icyangombwa cyo gutwara ibinyabiziga cyorohejwe ku bagishaka, nta muntu wagombye gutwara atagifite kuko bishobora kumugiraho ingaruka zikomeye.

Umuvugizi wa Polisi CP Kabera yavuze ko abatwara imodoka basinze bagiye guhagurukirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza