00:00:00 IGIHE NETWORK KN KINYARWANDA EN ENGLISH FR FRANCAIS

Polisi imaze gufata amacupa ibihumbi 52 ya ’mukorogo’ mu myaka ibiri

Yanditswe na Akayezu Jean de Dieu
Kuya 14 July 2022 saa 10:58
Yasuwe :

Umuvugizi wa Polisi y’u Rwanda, CP John Bosco Kabera, yatangaje ko ku bufatanye n’izindi nzego, hakomeje ibikorwa byo kurwanya icuruzwa ry’amavuta ahindura uruhu azwi nka ’mukorogo’, ku buryo mu myaka ibiri hamaze gufatwa amacupa 52800.

CP Kabera avuga ko mu 2020 polisi yafashe nibura amacupa 13,596 y’aya mavuta, mu gihe mu mwaka ukurikiyeho wa 2021 yikubye hafi gatatu, agera ku macupa 39,204 yafatiwe hirya no hino mu gihugu.

Mu 2016 nibwo Leta y’u Rwanda yashyizeho itegeko ribuza icuruzwa n’ikoreshwa ry’aya mavuta y’ubwoko butandukanye, akunze kwifashishwa n’abashaka guhindura uruhu bitukuza.

Iteka rya Minisitiri ryo mu 2016 ryaje kuvugururwa mu 2018 ryerekana urutonde rw’ibigomba kuba biri mu mavuta yo kwisiga n’ibindi bisukura bikanoza umubiri bikoreshwa n’abaganga cyangwa se n’abandi babihuguriwe.

Rivuga ko nibura mu mavuta yo kwisiga hagombye kubamo ikinyabutabire cya Hydroquinone kiri ku mpuzandengo ya 0.3% mu gihe amwe muri aya mavuta agenda afatirwa ku masoko atandukanye aba ari kuri 2%.

Ureste indwara ya Kanseri, abahanga mu buvuzi bavuga ko aya mavuta ya ’Mukorogo’ yagira ingaruka zo gutera indwara ya diyabete (diabète), umuvuduko ukabije w’amaraso, ubuhumyi, kutihanganira ubushyuhe n’ibindi.

Kuva mu 2016 inzego zitandukanye zashyize imbaraga mu gukumira iyinjizwa mu gihugu, icuruzwa n’ikoreshwa ry’ayo mavuta, aho abagiye bafatirwa muri ibyo bikorwa bahanwa hakurikijwe itegeko.

Umuvugizi wa Guverinoma y’u Rwanda, Yolande Makolo, yabwiye CNN dukesha iyi nkuru ko gukumira mukorogo byagize ingaruka nziza zigaragara, ndetse gukoresha aya mavuta bimaze kuba umuziro mu gihugu.

Ati "Mvuze muri rusange, politiki yo guca ayo mavuta yatanze umusaruro. Ayo mavuta akoreshwa mu buryo butemewe, ayo ubu wasanga mu gihugu ni make, ubukangurambaga bw’uko yangiza uruhu kandi agira ingaruka burakorwa cyane. Gukoresha amavuta atukuza uruhu bimaze kuba umuziro."

Makolo avuga kandi ko hakiri imbogamizi mu gukumira iyinjizwa mu gihugu ry’aya mavuta, ariko amategeko azakomeza kubahirizwa, abayafatanwa bagahanwa nk’uko itegeko ribiteganya.

Ati "Ntabwo turagera ku kigero cy’uko nta cupa na rimwe rizanwa mu gihugu, rero tuzakomeza kubaka ubushobozi buri munsi dukurikiza amategeko neza, tunongera ubukangurambaga mu bakiri bato. Ni akazi gakomeje."

Ububi bw’amavuta ya mukorogo buherutse kugarukwaho na Perezida Paul Kagame mu ijambo yavugiye mu Nama ya Komite Nyobozi yaguye y’Umuryango FPR-Inkotanyi, yabereye i Kigali ku wa 30 Mata 2022.

Avuga kuri ayo mavuta ya mukorogo, Perezida kagame yibukije Abanyarwanda ko yangiza umubiri, anenga abakomeje kuyakoresha.

Ati "Urasanga abantu batwika imibiri yabo kugira ngo base n’abazungu, kandi biteye impungenge, byica ubuzima. Njya mbisoma berekana ko bitera abantu indwara zitanoroshye, ugasanga nibyo barimo, ukagira ngo wenda bazanye isabune cyangwa bazanye amata y’abana… intego ikaba kwitukuza gusa".

"Ariko rero, hari abagira ibyago bashaka kwitukuza, bakaba umuhondo, bakaba icyatsi kibisi, bakaba… ugasanga umuntu asigaye asa n’umukororombya, kandi ubwo akoresha ibintu…, ibyo se nabyo ni RPF?"

Yavuze ko imbaraga n’amafaranga akoreshwa muri ibyo byakagombye kwifashishwa mu gukemura ibindi bibazo, byaba ibireba igihugu cyose cyangwa umuntu ku giti cye.

Itegeko riteganya ibyaha n’ibihano mu Rwanda, mu ngingo ya 266 rivuga ko umuntu ukora, ugurisha, utanga ibintu bibujijwe mu buvuzi birimo umuti, ibintu bihumanya, ibintu binoza cyangwa bisukura umubiri cyangwa ibindi bikomoka ku bimera, aba akoze icyaha.

Iyo abihamijwe n’urukiko, ahanishwa igifungo kitari munsi y’umwaka umwe ariko kitarenze imyaka ibiri n’ihazabu y’amafaranga y’u Rwanda atari munsi ya miliyoni eshatu ariko atarenze miliyoni eshanu, cyangwa kimwe muri ibyo bihano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .