PIASS yagiranye amasezerano n’Umurenge wa Tumba mu gukemura ibibazo byugarije abaturage

Yanditswe na Prudence Kwizera
Kuya 15 Mutarama 2020 saa 04:10
Yasuwe :
0 0

Ishuri Rikuru ry’Abaporotesitanti mu Rwanda, PIASS, ryasinyanye amasezerano y’ubufatanye n’Umurenge wa Tumba mu Karere ka Huye, mu gukemura ibibazo byugarije abaturage kugira ngo bagire imibereho myiza.

Ni igikorwa cyabaye kuri uyu wa Kabiri cyitabirwa n’Ubuyobozi ku mpande zombi, abakozi ba PIASS ndetse na bamwe mu baturage bo mu Murenge wa Tumba.

Ni amasezerano y’imyaka itanu azashyirwa mu bikorwa biciye mu bushakashatsi buzajya bukorwa na PIASS bwibande ku bibazo bikunze kugaragara mu Murenge wa Tumba n’uko bishobora gukemuka.

PIASS nk’Ishuri Rikuru rifite abahanga n’abashakashatsi izakora ibikorwa birimo guhugura abayobozi bo mu nzego zinyuranye z’Umurenge wa Tumba, kuvumbura no guteza imbere impano z’urubyiruko hamwe no kuzamura ireme ry’uburezi.

Umunyamabanga Nshingwabikorwa w’Umurenge wa Tumba, Migabo Vital, yavuze ko kuba PIASS yigisha uburezi n’iterambere biri mu byatumye bayegera kugira ngo barebe uko bafatanya guteza imbere imibereho myiza y’abaturage.

Ati “Mu bibazo dufite harimo umwanda, abana bata ishuri n’inda ziterwa abangavu; PIASS nk’ikigo gifite uburezi n’ubushakashatsi mu nshingano bigisha iterambere kandi bafite n’indangagaciro za gikirisitu bagenderaho mu burezi kandi duturanye twegeranye, duhamya neza nta shiti ko ibyo bibazo bazadufasha kubikemura mu buryo bwiza.”

Umuyobozi Mukuru wa PIASS, Prof Elisé Musemakweri, yavuze ko gukorana n’Umurenge wa Tumba mu guteza imbere imibereho myiza y’abaturage no kubakemurira ibibazo babyishimiye kuko biri mu byo bigisha.

Ati “Mu gukorana n’Umurenge wa Tumba tuzarushaho kumenya ibibazo biri muri sosiyete noneho bitume dushyira mu ngiro amasomo yacu kuko ntabwo wakwigisha ibintu mu kirere bitazagira akamaro. Twigisha ibintu tuvuga tuti iki kintu kirahura n’imibereho ya sosiyete.”

“Icya kabiri abanyeshuri bacu bazabasha kubona aho bimenyereza umwuga; bazabasha kumenya bya bibazo noneho habeho guhuza ibyo twigisha n’ibiri muri sosiyete.”

Bamwe mu bitabiriye isinywa ry’ayo masezerano barimo abakozi b’umurenge, aba PIASS n’abaturage bavuze ko bayitezeho umusaruro mwiza.

Umuyobozi w’Urugaga rw’Abikorera mu Murenge wa Tumba, Murenzi Frank, yavuze ko iyo ikibazo cyamenyekanye hakurikiraho kugikemura.

Ati “Burya kugira ngo umenye uko ukemura ikibazo ubanza kukimenya, buriya muri aya masezerano harimo ubushakashatsi, kubanza kumenya igitera ikibazo noneho hagakurikiraho gushaka uko cyakemurwa. Ndatekereza ko kuba dufite abantu bafite ubumenyi n’ubushobozi n’ubushake ari uburyo bwiza bwo gukemura ibibazo.”

Icyo gikorwa PIASS yakoze gihura n’amabwiriza y’Inama Nkuru y’Uburezi mu Rwanda, HEC, asaba amashuri makuru na za Kaminuza guha abanyeshuri umwanya uhagije wo gushyira mu ngiro ibyo biga aho guhugira mu masomo yo mu ishuri gusa.

Ishuri Rikuru PIASS (Protestant Institute of Arts and Social Sciences), rifite icyicaro mu Karere ka Huye, rifite n’ishami i Rubengera mu Karere ka Karongi. Rifite amashami y’uburezi, iterambere n’iyobokamana.

Bamwe mu bitabiriye isinywa ry'aya masezerano barimo abakozi b'Umurenge wa Tumba n'aba PIASS bavuze ko bayitezeho byinshi
Basinyanye amasezerano y'imyaka itanu azashyirwa mu bikorwa biciye mu bushakashatsi buzajya bukorwa na PIASS bwibande ku bibazo bikunze kugariza umurenge wa Tumba
Gusinya amasezerano y'ubufatanye hagati ya PIASS n'Umurenge wa Tumba byabaye kuri uyu wa Kabiri
Ni igikorwa cyitabiriwe n'abayobozi ku mpande zombi, abakozi n'abaturage
Nyuma yo gusinyana amasezerano bagiranye ibiganiro n'Umuyobozi w'Akarere ka Huye Sebutege Ange
Umunyamabanga Nshingwabikorwa w’Umurenge wa Tumba, Migabo Vital, yavuze ko ubwo bufatanye buzabafasha gukemura ibibazo bibangamiye imibereho myiza y'abaturage
Umuyobozi Mukuru wa PIASS, Prof Elisé Musemakweri, n'Umunyamabanga Nshingwabikorwa w’Umurenge wa Tumba, Migabo Vital, bashyira umukono ku masezerano y'ubufatanye
Umuyobozi Mukuru wa PIASS, Prof Elisé Musemakweri, n'Umunyamabanga Nshingwabikorwa w’Umurenge wa Tumba, Migabo Vital
Umuyobozi Mukuru wa PIASS, Prof Elisé Musemakweri, yavuze ko gukorana n’Umurenge wa Tumba mu guteza imbere imibereho myiza y’abaturage babyishimiye kuko biri mu byo bigisha
Umuyobozi w’Urugaga rw’Abikorera mu Murenge wa Tumba, Murenzi Frank, yavuze ko iyo ikibazo cyamenyekanye hakurikiraho kugikemura

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .