00:00:00 IGIHE NETWORK KN KINYARWANDA EN ENGLISH FR FRANCAIS

Permis zihariye z’imodoka za ‘automatique’ n’impinduka zifuzwa mu bizamini: Ikiganiro na CP Kabera

Yanditswe na Cyprien Niyomwungeri
Kuya 27 Ukuboza 2022 saa 07:25
Yasuwe :

Uko bwije n’uko bucyeye umubare w’abatunze imodoka mu Rwanda uriyongera ubutitsa ari nako izikoresha ikoranabuhanga rihambaye ziyongera, ku buryo inyinshi bitakiri ngombwa ko abazitwaye barwana no guhindura ‘vitesse’ ahubwo bikikora. Nta kabuza ko mu minsi iri imbere hazasakara n’imodoka zitwara.

Kuba izi modoka zizwi nka ‘automatique’ ziyongera ku isoko ry’u Rwanda n’abazitunze bakiyongera cyane, hari abasanga hakwiye kujyaho ‘Permis’ zihariye zazo cyangwa abakora ibizamini by’impushya za burundu bakemererwa kuzikoresha. Ibi kandi binagendana no gusaba ko bimwe mu bizamini nka ‘Démarrage’ bikurwaho.

Senateri Uwizeyimana Evode aherutse kuvuga ko kugeza ubu hari ibizamini bya ’permis’ bikorwa kandi mu by’ukuri bitajyanye n’igihe cyane ko n’imodoka zigezweho hari uburyo bwo kuzitwara butandukanye n’izo abantu bari bamenyereye.

Ati ‘‘Hari uburyo impushya zo gutwara imodoka zikorerwa hano. Nguhe nk’urugero rw’iki kintu cyitwa ‘Démarrage’, ibi ni ibintu by’ibiturage n’ahandi bitagikora, bya cyera bishaje, ahandi ubu bakora […] ngira ngo urabona ko imodoka za ‘manuel’ zitagikora ahubwo hagezweho iza ‘Automatique’.’’

Mu kiganiro IGIHE yagiranye n’Umuvugizi wa Polisi y’u Rwanda, CP John Bosco Kabera, yahishuye ko hari itegeko rigenga imihanda n’uburyo bwo kuyigendamo ririmo kuvugururwa kandi ibijyanye n’imodoka za ‘automatique’ byongewemo kuko ziri mu bigezweho.

Ibindi bizongerwamo ni ibijyanye na ‘permis’ zo gutwara izi modoka za ‘automatique’ aho zizaba zihariye.

CP Kabera ati "Rizanavuga n’uburyo ibiranga uruhushya rwo gutwara ibinyabiziga rwazo uko ruzaba bimeze, ibizaba bishushanyijeho n’ibimenyetso byabyo, ibyo birahari".

Mu Karere ka Kicukiro ahitwa mu Busanza hari kubakwa ikigo kizajya gikoresherezwamo ibizamini by’impushya za burundu zo gutwara ibinyabiziga. CP Kabera avuga ko hateganyijwe uburyo ababishaka bazajya bakorera impushya zo gutwara imodoka za ‘automatique’ cyangwa iza ‘manuel’.

Ati "N’ikigo turimo kubaka giherereye mu Busanza abantu bazajya bakoreramo ibizamini umunsi ku wundi, amasaha 24 n’ibyo byarateganyijwe. Hari imodoka za automatique na manuel ku buryo umuntu ahitamo".

Umuntu azajya agaragaza niba afite permis ya manuel cyangwa iya automatique, bikaba biteganyijwe ko hazasohoka amabwiriza ya Minisitiri ufite ubwikorezi mu nshingano ze asobanura ibijyanye n’iyi ngingo.

Iri tegeko rizaba ririmo uburyo bwo guhana bushya, aho permis izaba ifite amanota ku buryo uzajya uyibona igahita ibona amanota runaka, uko ukoze ikosa ryo mu muhanda amanota runaka akavaho, ukurikije amakosa mu muhanda n’amanota yahawe hasigara ubusa umuntu akamburwa permis.

CP Kabera ati "Byabindi bamenyereye ko uzatanga amande gusa ugakomeza uyatanga bizageraho nabyo bihinduke. Ni itegeko ririmo ibintu byinshi cyane bijyanye n’ibigezweho abantu bavuga…hari n’ibindi abagiye bagenda hirya no hino mu mahanga bazi bizaba birimo".

Ni umushinga w’itegeko polisi irimo gukorana na Minisiteri y’ibikorwaremezo n’iy’umutekano kandi ugeze kure.

Démarrage iracyakenewe

Ubusanzwe abakora ibizamini by’uruhushya rwa burundu rwo gutwara ibinyabiziga bakora ‘Démarrage, Parking, Circulation, ndetse no kunyura mu mitemeri.

Hari abemeza ko ‘Démarrage’ ari isomo ry’ingenzi cyane kuko ntawabona ‘permis’ ngo avuge ko azatwara imodoka ya ‘Automatique’ cyangwa isanzwe. Démarrage ikenerwa cyane mu muvundo imodoka zegeranye, iyo utayizi ugenda uhagarara ufata feri buri kanya.

CP Kabera yasubije abifuza ko hari bimwe mu bizamini byakurwa mu byo gushaka uruhushya rwo gutwara ibinyabiziga burundu, ashimangira ko akazi kose polisi ikora gashingira ku mategeko atari ku marangamutima.

CP Kabera avuga ko mu Rwanda hari imodoka nyinshi za ‘manuel’ kandi n’iyo itegeko ryashyirwamo ko ‘automatique’ zikoreshwa abazana ‘manuel’ batabuzwa kwinjira mu gihugu bityo n’ibizamini byazo bitazareka gutangwa.

CP Kabera yavuze ko hari nk’uburyo parikingi ziba zarateguwe imirongo yaraciwe hakurikijwe uko ibinyabiziga bihaza bimeze, ku buryo biba ari ngombwa ko utwara ikinyabiziga amenya uko azahaparika.

Ati "Kugeza ubu nta bikorwa binyuranyije n’amategeko, ibishobora gukorwa ni uko ukurikije uko ibintu bigenda bihinduka natwe turabyemera ko amategeko yavugururwa, birimo gukorwa ariko kuvuga ko hari ibizamini bidakenewe birimo parikingi na Démarrage ntabwo byaba ari byo”.

Polisi y’igihugu yemeza ko imiterere y’ibizamini bitangwa ijyanye n’igihe kuko akenshi usanga hari abajya gukora barigiye ikizamini aho kwiga gutwara neza imodoka cyangwa kugenda mu muhanda uko bikwiye.

Inkuru bifitanye isano: ‘Permis’ mu Rwanda yabaye nk’amazi mu butayu: Abasenateri bakirijwe amarira

Senateri Evode Uwizeyimana yavuze ku mpinduka zikwiye mu bizamini bya ‘Permis’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .