00:00:00 IGIHE NETWORK KN KINYARWANDA EN ENGLISH FR FRANCAIS

‘Permis’ mu Rwanda yabaye nk’amazi mu butayu: Abasenateri bakirijwe amarira

Yanditswe na Cyprien Niyomwungeri
Kuya 17 Ugushyingo 2022 saa 08:26
Yasuwe :

Uko iterambere ry’u Rwanda ryihuta, ni ko n’inyota n’umuvuduko w’abatunga imodoka wiyongera, icyakora mu mitima ya benshi hari akangononwa ko kuba uyu muvuduko utajyana n’uwa serivisi zifasha abaturage kubona impushya zo gutwara ibinyabiziga bigatuma hari abayoboka iy’amahanga kuzishakayo, abenshi bakazibona mu nzira zitemewe.

Amarira ya benshi kuri iki kibazo yongeye kwisuka ubwo abasenateri bagize Komisiyo y’Ububanyi n’Amahanga, Ubutwererane n’Umutekano muri Sena bari mu ngendo mu turere dutandukanye tw’Igihugu mu rwego rwo kumenya ibikorwa mu gukumira no kurwanya impanuka zo mu muhanda.

Ni ingendo zakorewe mu turere tw’intara y’Amajyepfo n’iy’Uburengerazuba kuva tariki 14-16 Ugushyingo 2022.

Ubwo itsinda rigizwe n’abasenateri Evode Uwizeyimana, Murangwa Hadija na Emmanuel Havugimana, ryageraga mu Karere ka Rubavu ndetse na Nyabihu, ryatuwe ikibazo cy’ibyangombwa mpimbano byo gutwara ibinyabiziga giterwa ahanini no kuba gukorera ibyo byangombwa mu Rwanda, bitacyihuta.

Ibi bituma abaturage bajya gushaka ‘permis’ muri Repubulika Iharanira Demokarasi ya Congo (RDC), bamwe bakanazigura zikaba intandaro y’impanuka. By’umwihariko mu Karere ka Rubavu, hari abaturanyi bo muri RDC bazana imodoka n’ibyangombwa bagakorera mu Rwanda, mu gihe Abanyarwanda babibuze.

Amakuru IGIHE ifite ni uko guhera ku madolari 100 ni ukuvuga ibihumbi 100Frw, ubasha kubona ‘Permis’ ya RDC, mu gihe iy’u Burundi na Tanzania ni ibihumbi 150Frw kandi bidasabye gukora ikizamini. Ibi bituma benshi mu banyarwanda bajya gushaka impushya zo mu muri ibyo bihugu.

Ubwo abasenateri bari bageze mu Bigogwe, Senateri Uwizeyimana Evode yijeje ko bagiye gukora ubuvugizi kugira ngo imbogamizi zituma abantu badakorera impushya zo gutwara ibinyabiziga ziveho.

Yagize ati “Turatekereza gukora ubuvugizi ku nzego zibishinzwe zirimo Polisi y’u Rwanda kugira ngo imbogamizi n’inzitizi zose zituma abantu badakorera impushya zo gutwara ibinyabiziga ziveho, aho gukomeza kuzuza impushya mpimbano mu Rwanda”.

Inzira y’inzitane yo kubona ‘Permis’

U Rwanda rwimakaje gukoresha ikoranabuhanga mu mitangire ya serivisi ku buryo uyu munsi abashaka gukorera impushya zo gutwara ibinyabiziga z’agateganyo ‘provisoire’ bitakiri ngombwa ko bategereza umunsi runaka ngo bahurire muri stade bakore ikizamini.

Kwiyandikisha gukorera uru ruhushya bikorerwa ku rubuga Irembo rutangirwaho nyinshi muri serivisi za leta, gukora ikizamini bikabera mu bigo byabugenewe ku ikoranabuhanga, aho usohoka umenye niba watsinze cyangwa watsinzwe.

Ikoranabuhanga ni ryiza ariko haracyarimo ikibazo gikomeye mu kwiyandikisha. Umwe mu baturage wifuza gukorera ‘provisoire’ waganiriye na IGIHE, yahamije uburyo yamaze amezi atandatu agerageza kwiyandikisha ngo akore ikizamini ariko byaranze.

Ati “Narize mu ishuri [auto-Ecole] ngerageza kwiyandikisha biranga bikunda nyuma y’amezi atandatu. Hari abo twiganye n’ubu bakigerageza”.

IGIHE yegereye umwe mu bigisha mu ishuri ryigisha gutwara ibinyabiziga n’amategeko y’umuhanda i Kigali, utifuje ko dutangaza imyirondoro ye, avuga ko uburyo bwo kwandikisha abakora ibizamini ari ikibazo cy’ingutu.

Yavuze ko mu minsi ishize Polisi y’igihugu yatunguranaga igafungura umurongo iminota nk’icumi gusa, ukabyiganirwaho n’abantu bose mu gihugu ku buryo ugize amahirwe yandikisha abantu nka babiri gusa.

Ati “Mfite abanyeshuri 30 guhera muri Gashyantare uyu mwaka bize, bategereje gukora. Muri aya mezi yose nandikishije abagera ku munani gusa, abandi barategereje”.

Mu mpera z’icyumweru gishize habayeho impinduka Polisi y’Igihugu noneho itangaza isaha izafungurira imirongo ariko abagerageje kwiyandikisha hafi ya bose ntibyabakundiye kuko ikoranabuhanga ryahise ripfa ndetse urubuga Irembo rubisabira imbabazi.

Izi nzitizi zikomera cyane iyo bigeze ku kwiyandikisha gukorera ‘Permis’. Icyiciro giheruka kwiyandikisha cyabikoze kuwa 15-22 Nyakanga 2022, aba bakoze muri Kanama, Nzeri, Ukwakira uyu mwaka. Kugeza uyu munsi nta tangazo ryo kwiyandikisha rirongera gutangwa.

Mu cyumweru gitangwa, ushobora kwiyandikisha agahabwa itariki yo gukoreraho ikizamini aba agira Imana. Bamwe mu baturage bagaragaza ko ikoranabuhanga rya Irembo ritabafasha kwiyandikisha uko bikwiye kuko ushobora kumara iminsi irindwi ubigerageza bikananirana.

Ubusanzwe uwemererwa gukorera uruhushya rwa burundu ni uwufite urw’agateganyo kandi rutararangira. Mu myaka ibiri rumara, hari abagerageza gukora ibizamini bagatsindwa abandi rukabarangiriraho bakigerageza kwiyandikisha byaranze.

Kamali wahuriye n’umunyamakuru wa IGIHE i Nyabugogo, yavuze ko kuba kwiyandikishiriza gukora uruhushya rwa burundu bitinda, byatumye urw’agateganyo rwe rurangira atarakora na rimwe.

Ati “Nk’ubu banditse mu kwa karindwi ikoranabuhanga turagerageza riratunanira, uyu munsi ntibarongera kandi ‘provisoire’ yanjye yarangiye mu kwezi gushize ntakoze na rimwe”.

Akajagari mu kiguzi cyo kwiyandikisha

Kuba kwiyandikisha gukora ibizamini by’impushya zo gutwara ibinyabiziga byarabaye ingume, hari ababyuririyeho babigira nk’ikirombe bacukuramo amafaranga.

Abatanga serivisi z’Irembo babihinduye imari ishyushye kuko kwandika umuntu umwe yishyura 5000Frw ya serivisi kandi mbere yari 1000Frw, hakiyongeraho n’ibindi 5000Frw yo kwishyura muri leta y’ikizamini. Bivuze ko uyu munsi udafite 10.000Frw udashobora gukorera ‘provisoire’, mu gihe kuri ‘permis’ yiyongera cyane.

Habimana Jean Bosco yabwiye IGIHE ko uwamwandikishije yamwishyuye 5000Frw ariko hari mugenzi we wishyuye 15000Frw.

Ati “Niba umaze amezi ane ushaka ‘code’ [kwiyandikisha] warayibuze, iyo agufashije bigakunda aguca menshi ukayamuha”.

Umwe mu batanga serivisi z’Irembo yavuze ko impamvu bazamuye ibiciro ari uko ikoranabuhanga risigaye rigoranye ku buryo uyu munsi adashobora kwandika abantu barenze batatu, mu gihe mbere na 20 yabandikishaga. Hari n’ubwo bafungura umurongo bakawufunga nta n’umwe yandikishije byananiranye.

Uyu yabwiye IGIHE ko hari amakuru ajya yumva ko bagenzi be bandikisha abantu bigakunda baba bafite ababaha amakuru ko umurongo ugiye gufungurwa bakabikora mbere nta wundi ubizi.

Basaba ko abatanga serivisi za Irembo bashyirirwaho igiciro ntarengwa cya serivisi baha abakiriya kuko basa nk’abakorera mu kajagari ko guhenda abaturage. Hari aho usanga gusabira umuturage icyemezo runaka bamuca 500Frw ahandi akaba 1500Frw.

Abasenateri batuwe amarira

Twifashishije ibitekerezo byatanzwe ku butumwa bw’abasenateri ku biteza impanuka basanze mu Karere ka Rubavu, benshi bagaragaje ko batishimiye inzira yo kubona impushya zo gutwara ibinyabiziga mu Rwanda.

Uwitwa Etienne Niyitege yagize ati “Ikibazo cya permit mu Rwanda gikomeje kugorana, niba n’ibyo bizamini iyo bibaye abantu batarenze 10% aribo bonyine bitwa ngo batsinze, mbese bivuga ko nta bushobozi bwo gutwara imodoka dufite kuri iki kigero?”.

Umutoni Harris yagize ati “Si Rubavu gusa, ikibazo cya Permis kiri mu Rwanda hose, kuyibona ni ikibazo, uriga ukamara imyaka 2 ugitegereje gukora ikizami ugaheba, kugeza provisoire itaye agaciro plz mudufashe mwo kabyara mwe bitaba ibyo indyogo zizaba nyinshi”.

Patus ati “Turashimira imikorere ya polisi yacu, ariko ibijyanye no gukorera impushya zo gutwara ibinyabiziga ho ntakigenda, kubona hashira umwaka undi ukaza kwiyandikisha gukora ibizamini bidashoboka kandi ariko ibinyabiziga byiyongera mu gihugu??!!! #bigombaguhinduka”

Uwitwa Christophe Ntakirutimana ati “Nyabuna mutuvuganire, iyi service yabaye mbi cyane, maze umwaka nshakisha umwanya wo gukora ariko byaranze, niyo mbonye umwanya ku irembo bambwira ko kubona code yo kwishyura bidakunda, ikoranabuhanga twari tuzi ko rizana ibisubizo ariko ryatubereye ikibazo rwose!”.

Dixy_0929 ati “Ni gute umuntu yiga agahabwa uruhushya rw’agateganyo rumara imyaka ibiri nyuma rukarangira atiyandikishije ngo akore kandi bitewe na polisi y’u Rwanda hanyuma igihe kikarangira agategekwa kongera kwiga no kwiyandikisha”.

Polisi yijeje umuti urambye

Polisi y’u Rwanda ibinyujije kuri Twitter, yijeje ko ku bufatanye n’izindi nzego bagiye kunoza iyi serivisi kandi igatangwa kenshi.

Yagize iti “Dufatanyije n’abafatanyabikorwa turimo kunoza uburyo bwo kwiyandikisha ku bashaka gukorera impushya zo gutwara ibinyabiziga kugira ngo abakenera iyi serivisi babashe kuyibona ku buryo buhoraho kandi bunoze”.

Yakomeje iti “Turasaba abaturarwanda kwirinda kujya kugura impushya zo mu mahanga ndetse no kudakoresha impushya mpimbano kuko bitemewe n’amategeko. Murakoze”

Kuba izi serivisi zitanoze, bifite ingaruka zirimo kuba abantu batwara amafaranga bakajya kuzigura hanze, kuba zatungwa n’abatabifitiye ubushobozi bikaba intandaro y’impanuka.

Ibi kandi bitiza umurindi ubushomeri mu rubyiruko kuko hari ababona impushya zo gutwara ibinyabiziga bakabikora nk’akazi. Byadindiza kandi iterambere mu baturage kuko abatunga ibinyabiziga ari bake ugereranyije n’ababyifuza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .