Perezida wa Sena yahamije ko banditse bamagana icyemezo cyo gushyira Uwase mu kanama kiga ku ruhare rw’ubukoloni

Yanditswe na Uwimana Abraham
Kuya 31 Ukwakira 2020 saa 01:30
Yasuwe :
0 0

Perezida wa Sena y’u Rwanda, Dr Iyamuremye Augustin, yavuze ko Inteko Ishinga Amategeko y’u Rwanda yandikiye iy’u Bubiligi ivuga ko idashyigikiye icyemezo cyo gushyira Uwase Laure mu kanama kiga ku mateka y’ubukoloni icyo gihugu cyagize mu Rwanda, Repubulika Iharanira Demokarasi ya Congo n’u Burundi.

Mu kiganiro yatanze mu ihuriro rya 13 rya Unity Club Intwararumuri ryabaye kuri uyu wa 31 Ukwakira 2020, Dr Iyamuremye yagarutse ku cyemezo cy’u Bubiligi cyo gushyira Uwase mu kanama kiga ku ngaruka z’ubukoloni, avuga ko bakinenze cyane kuko babona ko adafite ubunararibonye kuri byo ndetse anafite kubogama.

Dr Iyamuremye yashingiye ku kiganiro kigaruka ku mateka yagejeje u Rwanda kuri Jenoside yakorewe Abatutsi cyatanzwe na Senateri Havugimana Emmanuel, aho yavuze ko ayo mateka yazanywe n’ubukoloni, aho abakoloni babibye amacakubiri n’inzangano mu Banyarwanda bikageza no kuri Jenoside yakorewe Abatutsi.

Ati “Twandikiye Inteko Ishinga Amategeko y’Ababiligi tubabwira tuti ni byiza ko mwashyizeho komisiyo yo kureba ingaruka z’ubukoloni ndetse mukaba munifuza ko hazaba ubwiyunge bushingiye ku bizavamo hagati y’Abanyarwanda n’Ababiligi, ariko twatangajwe no kubona mushyiramo umuntu tubona adafite ubunararibonye bwagira icyo bumarira iyo komisiyo.”

Yongeyeho ati “Ikindi kidutangaje ni ukubona mushyiramo umuntu udafite kutabogama, kubera amashyirahamwe abamo twese tuzi, atemera na Jenoside.”

Dr Iyamuremye yavuze ko muri iyo baruwa barangije bavuga ko ibizava muri iyo komisiyo bidakwiye kuzitirirwa u Rwanda hitwajwe ko harimo Umunyarwanda kuko batemera ko Uwase ari we wari ukwiye kujyamo, ahubwo hari kurebwa abandi bazi ayo mateka kandi batayagoreka.

Ati “Twarangije tuvuga tuti, ibizava muri iyi Komisiyo, nkatwe tuvugira Abanyarwanda turumva bitazaba bitureba, ibizava muri iriya komisiyo ntibazavuge ngo harimo Umunyarwanda ngo babyitirire Abanyarwanda.”

Muri Nyakanga 2020 nibwo hashyizweho itsinda ry’impuguke ku mateka y’akarere k’ibiyaga bigari, rizafasha iyo Komisiyo gukora icukumbura, ku makosa n’ibyaha bikomeye bishinjwa u Bubiligi byakozwe ubwo bwari bukolonije ibyo bihugu, aho bushinjwa ubwicanyi muri Congo, kubiba amacakubiri ashingiye ku moko mu Rwanda no mu Burundi n’ibindi.

Laure Nkundakozera Uwase yabaye Umunyamabanga Mukuru wa Jambo Asbl ihuriyemo abahakana Jenoside yakorewe Abatutsi, anaba umwanditsi mukuru wa Jambo News. Ni umukobwa wa Anastase Nkundakozera wahamijwe n’Inkiko Gacaca ibyaha bya Jenoside yakorewe Abatutsi, ndetse nyina Agnès Mukarugomwa yari umurwanashyaka ukomeye wa MRND, ubu ni umuyobozi wa Ikondera Libres, ikinyamakuru gisebya leta y’u Rwanda.

Mu bandi bamaganye ishyirwa muri aka kanama rya Uwase Laure, harimo IBUKA, Diaspora Nyarwanda mu Bubiligi, umudepite Björn Anseeuw wo mu Inteko Ishinga Amategeko y’u Bubiligi n’abandi.

Dr Iyamuremye yavuze ko ibaruwa bandikiye Inteko y’u Bubiligi nta gisubizo gifatika bayihaweho, avuga ko Umuyobozi w’Inteko Ishinga Amategeko y’u Bubiligi yabasubije ko bayishyize muri komisiyo bireba ariko ngo nta gisubizo babonye nyuma.

Perezida wa Sena, Dr Iyamuremye Augustin, yavuze ko u Rwanda rwamaganye kuba u Bubiligi bwarashyize Uwase Laure mu Kanama kiga ku ruhare rw’Abakoloni mu bihugu birimo u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .