Perezida wa JICA yanyuzwe n’impinduka gasutamo ihuriweho ya Rusumo yazanye mu bucuruzi

Yanditswe na Evariste Nsengimana
Kuya 21 Nyakanga 2019 saa 08:14
Yasuwe :
0 0

Perezida w’Ikigo cy’u Buyapani cy’ubutwererane mpuzamamahanga (JICA), Shinichi Kitaoka, yasuye umupaka wa rusumo uhuriweho n’u Rwanda na Tanzania(Rusumo One Border Post) n’ikiraro kibihuza, yishimira impinduka byazanye mu bucuruzi n’ubuhahirane hagati yabyo n’amahanga.

Perezida Kitaoka uri mu ruzinduko mu Rwanda hagati ya 17-21 Nyakanga 2019, yasuye ibyo bikorwa byabatswe bitewe inkunga na JICA, kuri uyu wa gatandatu.

Ikiraro gishya imodoka zishobora kubisikanaho zihetse toni 20 mu 2015 cyasimbuye icyanyuragaho imwe itarengeje toni umunani. Cyuzuye gitwaye miliyoni 31$.

Umupaka uhuriweho wa Rusumo watangiye gukoreshwa amasaha 24 kuri 24 ku wa 1 Ukwakira 2017 uvuye kuri 16 kuri 24. Icyo gihe kumenyekanisha ibivuye mu gihugu kimwe bijya mu kindi byatwaraga nibura amasaha ane ariko ubu bisaba iminota 30 kubera n’uburyo bw’ikoranabuhanga bwifashishwa.

Ubuyobozi bwa Gasutabo ya Rusumo bwavuze imodoka zavuye kuri 70 zahacaga ku munsi zikagera kuri 280 naho abantu bava kuri 700 bagera ku 1500.

Umuyobozi w’Akarere ka Kirehe, Muzungu Gerald, yagize ati “Byagize ingaruka zikomeye kandi nziza mu iterambere ry’ubucuruzi, ubuhahirane n’imibanire y’igihugu cyacu n’ibindi bihugu. Umubare w’imodoka zacaga aha zikoreye ibicuruzwa wikubye hafi inshuro eshatu.”

Perezida wa JICA, Kitaoka, yasobanuriwe ko ibyo byagize akamaro cyane mu kongera umubare w’imodoka zizana ibicuruzwa mu gihugu n’abantu bakizamo. Uyu mupaka unyurwaho na 73% by’ibicuruzwa byose byinjirizwa ku mipaka yose mu Rwanda.

Perezida wa JICA, Kitaoka, yavuze ko bishimishije kuko ari igikorwa cyongera umubare w’abantu binjira mu Rwanda, bikongera ubukungu bwarwo n’imibanire n’ibindi bihugu.

Ati “Ndishimiye cyane kubona ubukungu bw’u Rwanda buzamuka neza bigizwemo uruhare na Perezida Kagame. Hari ibindi bice nabonye ubwo narusuraga ubushize ariko kuri iyi nshuro nishimiye bikomeye kugera hano. Ni ahantu h’ingenzi hantunguye kuko hafatiye runini ubucuruzi.”

Uyu muyobozi asuye u Rwanda nyuma y’uruzinduko Perezida Kagame yagiriye mu Buyapani muri Mutarama 2019, bakaganira ku ngingo zitandukanye zigamije gushyigikira gahunda z’iterambere mu Rwanda ndetse bagasezerana ko na we azarusura.

Uruzinduko rwe rukubiyemo ibikorwa bitandukanye birimo kunamira imibiri y’Abatutsi ishyinguye ku rwibutso rwa Jenoside rwa Kigali, gusura ibigo bifasha urubyiruko mu ikoranabuhanga birimo K-Lab na Fab-Lab, ikirano n’umupaka uhuriweho biri ku Rusumo.

Hari no kuganira na bamwe mu banyarwanda bize icyiciro cya gatatu cya Kaminuza binyuze muri gahunda u Buyapani bugenera urubyiruko rwo muri Afurika izwi nka ABE (African Business Education). akazanagirana ibiganiro na Perezida Paul Kagame.

Ikiraro cya mbere cyanyuragaho imodoka itarengeje toni umunani
Perezida wa JICA ari gufotora ikiraro gishya
Perezida wa JICA(hagati) yanyuzwe n’impinduka gasutamo ihuriweho ya Rusumo yazanye mu bucuruzi
Perezida wa JICA, Kitaoka n'umuyobozi w'Akarere ka Kirehe Muzungu Gerard bari kuganira
Perezida wa JICA, Kitaoka yavuze ko yishimiye uburyo ubukungu bw'u Rwanda butera imbere
Perezida wa JICA, Kitaoka (hagati) ari gusobanurirwa uko umupaka uhuriweho wa Rusumo ukora
Ikiraro cya Rusumo imodoka zisigaye zibisikana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza