00:00:00 IGIHE NETWORK KN KINYARWANDA EN ENGLISH FR FRANCAIS

Uruzinduko rwa Perezida Suluhu: Hitezwe iki ku masezerano ashobora gusinyirwa i Kigali?

Yanditswe na Ishimwe Israel
Kuya 2 Kanama 2021 saa 06:50
Yasuwe :
0 0

Amasaha arabarirwa ku ntoki ngo Perezida wa Tanzania, Samia Suluhu Hassan, atangire uruzinduko rw’iminsi ibiri mu Rwanda, urwa mbere rumuganisha mu rw’Imisozi 1000 nyuma y’amezi atanu agiye ku butegetsi.

Perezida Samia Suluhu yatumiwe na mugenzi we w’u Rwanda, Paul Kagame. Ategerejwe gukandagira mu Rwanda ku wa Mbere, tariki ya 2 Kanama 2021.

Perezidansi ya Tanzania yemeje iby’uru ruzinduko, ivuga ko Perezida Samia azagirana ibiganiro byihariye na Perezida Kagame, ndetse biteganyijwe ko bazakurikirana isinywa ry’amasezerano atandukanye mbere yo kugira ikiganiro n’itangazamakuru.

Itangazo ryashyizweho umukono n’Umuvugizi wa Perezidansi ya Tanzania, Jaffar Haniu, rivuga ko uru ruzinduko ari intambwe nziza ku mubano uhuriweho.

Riti “Urwo ruzinduko rw’iminsi ibiri rugamije kurushaho kunoza umubano n’imikoranire hagati y’u Rwanda na Tanzania.’’

Perezidansi ya Tanzania ntiyigeze itangaza byeruye ibikubiye mu masezerano azashyirirwaho umukono mu Mujyi wa Kigali.

Abasesenguzi ba Politiki yo mu Karere bavuga ko mu bishobora kuganirwaho hagati y’impande zombi harimo ibijyanye n’ubucuruzi, umushinga w’iyubakwa ry’umuhanda wa Gari ya moshi ndetse n’umutekano wo mu Karere.

Tom Ndahiro wabaye muri Tanzania ndetse akaba akurikiranira hafi politiki y’ibihugu byombi, yabwiye IGIHE ko uruzinduko rwa Perezida Samia rugamije kunoza umubano uri mu bihe byiza.

Yagize ati “Uru ruzinduko ruje neza no mu gihe Tanzania n’u Rwanda bimeranye neza. Hari byinshi dusanzwe duhuriyeho na Tanzania, umubano mwiza wakomeje kubaho cyane cyane mu gihe cya nyakwigendera Perezida Magufuli, uwo Samia yari abereye Visi Perezida.’’

Yasobanuye ko mu mubano w’u Rwanda na Tanzania hari imbogamizi by’umwihariko mu bijyanye n’ubucuruzi zagiye zikurwaho cyane ko iki gihugu gikorana n’u Rwanda ubucuruzi bwinshi.

Ati “Ibyari bibangamye byarakemuwe, birimo ubujura bwabagaho mbere aho ibicuruzwa byibirwaga ku byambu, twizere ko bitazongera.’’

-  Ubucuruzi mu bishobora kwibandwaho

Ndahiro yavuze ko u Rwanda na Tanzania bikorana ubucuruzi kuko ariyo nzira runyuzamo byinshi mu bicuruzwa bijyanwa n’ibivanwa mu mahanga.

Raporo y’Ikigo cy’Ibarurishamibare yo muri Werurwe 2021, igaragaza ko ibicuruzwa u Rwanda rwakiriye biturutse muri Tanzania bifite agaciro ka miliyoni 33,75 $. Muri Gashyantare ibyari byatumijwe byari bifite agaciro ka miliyoni 27,97 $.

Mu 2019, Ishoramari ry’Abanya-Tanzania ryanditswe mu Rwanda ryari rifite agaciro ka 5.461.583 $.

Ndahiro ati “Igishoboka ni ugushimangira umubano wari usanzweho kurusha uko hari igishya cyatangira. Hari ibyari bisanzwe, byonyine niba inzira tunyuzamo ibintu byinshi biva n’ibijya mu mahanga binyura muri Tanzania bifite icyo bivuze. Iyo ibikorwa remezo byubatse neza, urugendo ruba rugufi kuko habaho kwihuta.’’

Yongeyeho ko u Rwanda na Tanzania na mbere y’abakoloni byari bisanzwe bibana ariko hakwiye kureba icyakwiyongeraho.

Ati "Niba bafite ibicuruzwa dukeneye, aho kubivana kure, twabivanye hafi hashoboka.’’

Ndahiro avuga ko politiki ikwiye kwimakazwa ari ifitiye inyungu abaturage b’ibihugu byombi ndetse ikabateza imbere.

-  Ibiganiro ku iyubakwa rya Gari ya moshi birarimbanyije

Umwe mu mishinga migari witezwe hagati y’u Rwanda na Tanzania ni uwo kubaka umuhanda Gari ya Moshi w’ibilometero 532, uhuza Umujyi wa Isaka n’uwa Kigali.

Amasezerano yo kubaka uyu muhanda uzatwara miliyari 3,6$ yashyizweho umukono ku wa 9 Werurwe 2018.

Nyuma y’urupfu rwa Perezida John Pombe Magufuli uyu mushinga usa n’uwadindiye ariko kuri ubu wongeye guhabwa imbaraga.

Ku wa 26 Nyakanga 2021, Minisitiri w’Ibikorwa remezo, Amb. Gatete Claver, yabwiye Abadepite ko Tanzania n’u Rwanda byasubukuye ibiganiro kugira ngo imirimo yo kuwubaka yihutishwe.

Icyo gihe yagize ati “Twatangiye kuganira na Tanzania kuko nyuma y’icyo gihe nabwo hajemo amatora muri Tanzania hazamo n’ibyago bagize byo gupfusha umukuru w’igihugu akazi kagenda buhoro. Ubu twongeye kubisubukura no mu byumweru bibiri bishize twaganiraga na Tanzania kuri iki kibazo noneho dutangire dukore kuko ibyangombwa bindi byose byararangiye.”

Ndahiro yavuze ko mu ruzinduko rwa Samia Suluhu, “uyu mushinga ushobora kuvugwaho kuko ukomeye cyane.’’

Iyi Gari ya moshi yitezweho koroshya ingendo z’abantu n’ibicuruzwa bihererekanywa hagati y’ibihugiu byombi.

Ati “Abenshi ntibatekereza kubaka gari ya moshi icyo byamara. Ituma ibiciro by’ibicuruzwa, ibyinjira mu gihugu bigabanuka ibiciro. Ibyo bigira akamaro mu iterambere ry’igihugu, iry’inganda n’ubucuruzi kuko n’inyungu ibivamo iriyongera.’’

Mu ntangiriro za Nyakanga 2021, byatangajwe ko Hyundai Rotem yo muri Korea y’Epfo yatsindiye isoko rya miliyoni $296.5 ryo gutanga ibice bya Gari ya moshi ikoresha amashanyarazi, bigenewe Tanzania Railway Corporation.

Bizashyirwa mu muhanda uhuza Dar es Salaam na Makutupora mu mushinga wagutse uzagera i Kigali, ukaba wakomereza i Goma muri Repubulika Iharanira Demokarasi ya Congo.

Tanzania ifite umushinga wagutse wa “Julius Nyerere Hydropower Station”, uzatanga amashanyarazi angana na megawatts 2,115 witezweho gutanga Gigawatt 5,920 ku mwaka.

Ndahiro yavuze ko aya mashanyarazi ari menshi ku buryo ashobora gukoreshwa n’ibindi bihugu birimo n’u Rwanda cyane ko Gari ya moshi ruzakoresha izaba ikeneye ahamye, adacikagurika.

Ati “Mu bindi mbona ni uko Tanzania ifite gaz y’umwimerere, bafite umushinga wo kubyaza amashanyarazi ahantu hazakorwa urugomero ruzabyara menshi kandi batazakoresha bonyine, natwe tukaba twayafataho. Uwo muriro ntushobora kuwukoresha wose, natwe twaba isoko ryawo.’’

Uyu muriro ushobora kuba isoko nziza yo kwihaza k’u Rwanda nyuma y’aho amashanyarazi yagombaga kuva muri Ethiopia, akanyura muri Uganda, iki gihugu cyitambitse muri uwo mushinga.

Ati “Tubinyujije muri Tanzania byadufasha kuko n’iyo gari ya moshi izaba ikoresha amashanyarazi kandi agomba kuba afatika.”

U Rwanda rukeneye miliyari 1,3$ azarufasha kubaka inzira ya gari ya moshi ireshya n’ibilometero 138 mu gihe Tanzania ari na yo ifite igice kinini [394 Km] izakoresha miliyari 2,3$.

-  Umutekano mu Karere no mu Ntara ya Cabo Delgado muri Mozambique uhanzwe amaso

Perezida Samia agiye gusura u Rwanda nyuma y’uko mu minsi ishize abayobozi mu nzego nkuru bakoranye inama zitandukanye.

Izi zirimo iyakozwe n’abayobozi bakuru mu nzego z’umutekano. Nko ku wa 9 Gicurasi 2021, Ambasaderi w’u Rwanda muri Tanzania, Major General Charles Karamba yahuriye na Minisitiri w’Ingabo wa Tanzania, Elias Kwandikwa i Dodoma, baganira ku ngingo zitandukanye.

Nyuma y’umunsi umwe, Umugaba Mukuru w’Ingabo z’u Rwanda, Gen Jean Bosco, yakiriwe na mugenzi we uyobora ingabo muri Tanzania mu gihe IGP Dan Munyuza uyobora Polisi y’u Rwanda yari kumwe na Simon Nyakoro Sirro. Baganiriye byimbitse ku gucunga umutekano ku nyungu z’Akarere no kurwanya ibyaha byambukiranya imipaka.

Ndahiro yavuze ko mu byitezwe kuganirwaho harimo n’ibijyanye n’umutekano mu Karere.

Ati “Ndibaza ko n’u Rwanda aho ruri mu gufasha Mozambique mu kurwanya ibyihebe, Tanzania ibifitemo inyungu.’’

Tanzania iri mu Majyaruguru y’Uburengerazuba bwa Mozambique, ndetse iri mu bihugu bigirwaho ingaruka n’umutekano muke ubarizwayo. Iki gihugu cyakiriye neza icyemezo cy’u Rwanda cyo kohereza Ingabo n’Abapolisi 1000 mu bice birimo intambara by’umwihariko mu Ntara ya Cabo Delgado. Kuva ingabo z’u Rwanda zahagera zatangiye guhashya aba barwanyi b’Umutwe wa Al-Shabaab.

Mu bindi byitezwe ko bishobora kuganirwaho harimo ubufatanye mu guhashya COVID-19, itumanaho, ubushakashatsi n’ibindi.

Perezida Suluhu azasura Urwibutso rwa Kigali rwa Kigali ruri ku Gisozi ndetse n’Icyanya cyahariwe inganda kiri i Masoro mu Karere ka Gasabo, hazwi nka Kigali Special Economic Zone; ahaherereye AZAM, uruganda rutunganya ifarini, imitobe n’ibindi ikaba ifite ibikorwa byagutse muri Tanzania.

Uruzinduko rwa Perezida Samia w’imyaka 61 mu Rwanda ni urwa kane azaba agiriye mu bihugu byo mu Karere ka Afurika y’Iburasirazuba; ni nyuma ya Uganda yasuye muri Mata, Kenya yagendereye muri Gicurasi n’u Burundi yarimo muri Nyakanga 2021.

Inkuru bifitanye isano: Perezida wa Tanzania ategerejwe i Kigali mu ruzinduko rw’iminsi ibiri

Perezida Samia Suluhu ategerejwe mu Mujyi wa Kigali mu ruzinduko rw'iminsi ibiri rwitezeho gukomeza kunoza umubano w'igihugu cye n'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .