Perezida Macron yemeje ko u Bufaransa buzitabira ibikorwa byo #Kwibuka25

Yanditswe na IGIHE
Kuya 13 Werurwe 2019 saa 05:53
Yasuwe :
0 0

Perezida w’u Bufaransa, Emmanuel Macron, yemeje ko igihugu cye kizaba gihagarariwe mu bikorwa byo Kwibuka ku nshuro ya 25 Jenoside yakorewe Abatutsi mu 1994, biteganyijwe mu kwezi gutaha.

Mu rugendo arimo kugirira muri Afurika, ubwo yari muri Ethiopie kuri uyu wa Kabiri, Perezida Macron yabajijwe n’abanyamakuru kuri ubu butumire bw’u Rwanda.

Yagize ati "U Rwanda nibyo rwadutumiye mu bikorwa byo Kwibuka, ubutumire twarabwakiriye kandi ndemeza ko u Bufaransa buzaba buhagarariwe muri ibyo bikorwa byo Kwibuka."

Minisitiri w’Ububanyi n’Amahanga w’u Rwanda, Dr Richard Sezibera, kuri uyu wa Gatatu yabwiye abanyamakuru ko hari ibimenyetso byerekana ko umubano w’u Rwanda n’u Bufaransa uri kurushaho kugenda neza.

Yakomoje kandi ku butumire bwashyikirijwe Perezida Macron, maze agira ati "yaratumiwe kugira ngo aze kwifatanya n’abanyarwanda kwibuka Jenoside yakorewe Abatutsi ku nshuro ya 25 ndetse n’abandi bayobozi batandukanye baratumiwe. Ntabwo turabona ibisubuzo ariko nzi neza ko bazaba bahari ku rwego runaka ntakubwira ubu.”

Ku rundi ruhande hari amakuru ko hari Abadepite b’Abafaransa bazaba bari i Kigali ku wa 7 Mata 2019 bayobowe na Sira Sylla unafite inkomoko muri Sénégal, uyobora itsinda rigamije ubucuti hagati y’ibihugu by’u Bufaransa, u Rwanda n’u Burundi. Azaba aherekejwe na Jean-Jacques Bridey uyobora Komisiyo ishinzwe ibya gisirikare.

Ntabwo ari ubutumire bwa mbere u Rwanda ruhaye u Bufaransa, ariko ubu bufite icyo buvuze cyane ku isura y’umubano w’ibihugu byombi wakunze kuzongwa n’uruhare u Bufaransa bushinjwa muri Jenoside.

Ku wa 11- 13 Ugushyingo 2018 Perezida Kagame yari i Paris mu nama mpuzamahanga yiga ku mahoro, Forum de Paris sur la paix, ku butumire bwa Perezida Macron. Iyo nama isojwe byatangajwe ko Kagame yavuye mu Bufaransa ashyikirije Macron ibaruwa imushimira, inamutumira kuzagenderera u Rwanda mu ntangiriro za 2019.

Kugeza magingo aya, Nicolas Sarkozy ni we Perezida w’u Bufaransa wasuye u Rwanda nyuma ya Jenoside yakorewe Abatutsi mu 1994, ku wa 25 Gashyantare 2010.

Perezida Macron yemeje ko igihugu cye kizitabira ibikorwa byo kwibuka ku nshuro ya 25 Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza