Perezida Kagame yiyemeje gukurikirana ikibazo cya buruse itinda

Yanditswe na Ferdinand Maniraguha
Kuya 12 Ukuboza 2018 saa 04:09
Yasuwe :
0 0

Perezida Paul Kagame yatangaje ko ikibazo cyo gutinda kwa buruse zihabwa abanyeshuri kimaze kurambirana ku buryo agiye kugikurikirana ubwe.

Mu 2015 nibwo ububasha bwo gutanga amafaranga y’inguzanyo atunga abanyeshuri biga muri Kaminuza za Leta batishoboye bwashyizwe mu maboko ya Banki y’Igihugu Itsura Amajyambere (BRD) buvanywe mu Kigo cy’Igihugu Gishinzwe Uburezi.

Ni nyuma y’uko abanyeshuri bari bamaze igihe bavuga ko ayo mafaranga atinda agatuma babaho nabi kandi agamije kubafasha mu myigire.

Mu nama y’Umushyikirano mu 2015 icyo kibazo cyaragarutse, Perezida Kagame ategeka ko gikemurwa burundu ntazongere kucyumva.

Kuri uyu wa Gatatu tariki 12 Ukuboza 2018 ikibazo cyongeye kugaruka mu Ihuriro ry’urubyiruko, Youth Connekt.

Muri iryo huriro ryahuje abasaga 2500, hagaragajwe ko abanyeshuri biga muri Kaminuza y’u Rwanda bamaze amezi abiri batangiye amasomo nyamara nta buruse barahabwa.

Sezibera Janet wiga muri Kaminuza y’u Rwanda ishami ry’ubukungu n’imari, yagize ati “Mu nama y’umushyikirano twakugejejeho abanyeshuri bo muri Kaminuza duhabwa inguzanyo ya buruse, n’iyi saha iracyatinda. Ubu tumaze amezi abiri dutangiye kwiga ariko ntabwo iraza. Hari abanyehsuri baduha ibibazo ko hari ibyo batabasha gukemura, bigatuma batiga neza.”

Perezida Kagame wabaye nk’utunguwe, yahise asaba Minisitiri w’uburezi gusubiza impamvu icyo kibazo kitarakemuka.

Minisitiri Mutimura Eugène yasubije ati “Tugiye kugikurikirana. Icyo nzi cyo ni uko hari abanyeshuri benshi batari bakageze muri système ariko twavuganye na BRD ngo icyo kibazo bakihutishe.”

Perezida Kagame ntiyanyuzwe, yavuze ko na we atumva uburyo amafaranga aboneka ariko kugera ku bo agenewe ntibikorwe.

Ati “Iki kibazo rwose ndaza kukigira icyanjye. Twarabiganiriye, twabisubiyemo. Njya mbabwira nti amafaranga ahari nagere aho agomba kugera. Nibura ari amafaranga adahari ku mpamvu zumvikana ntabwo nasaba abantu gukora ibitangaza ngo bashyireho amafaranga adahari […] ibyo biraza gusobanuka. Nzagirana ikibazo n’ababishinzwe.”

Mu banyeshuri bashya binjiye muri Kaminuza y’u Rwanda uyu mwaka, abemerewe inguzanyo ya Leta ni 8 478.

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza