Perezida Kagame yitabiriye irahira rya Filipe Nyusi muri Mozambique

Yanditswe na Rabbi Malo Umucunguzi
Kuya 15 Mutarama 2020 saa 12:26
Yasuwe :
0 0

Perezida Paul Kagame yitabiriye irahira rya Filipe Jacinto Nyusi, uheruka gutorerwa manda ya kabiri nka Perezida wa Mozambique.

Ni igikorwa cyitabiriwe n’ibihumbi by’abaturage, cyabereye ku rubuga rw’Ubwigenge mu Murwa Mukuru Maputo.

Perezida Kagame yageze muri icyo gihugu avuye i Abu Dhabi muri Leta Zunze Ubumwe z’Abarabu, mu Nama Mpuzamahanga yiga ku bikorwa by’iterambere rirambye izwi nka Abu Dhabi Sustainability Week (ADSW).

Muri iyo nama yavuze ko ishingiro ry’iterambere mu ngeri zitandukanye u Rwanda rugezeho, ari uguha umwanya abaturage bakagira uruhare mu bibakorerwa kuko ari bo bagirwaho ingaruka n’ibirimo kuba, byaba ibyagenzurwa n’ibitagenzurwa.

Perezida Nyusi w’imyaka 60 hamwe n’Ishyaka rye riri ku butegetsi, Frelimo, yegukanye amajwi 73 ku ijana mu matora yabaye ku wa 15 Ukwakira 2019, arusha Ossufo Momade ukomoka mu Ishyaka Renamo [ryahoze ari umutwe witwaje intwaro urwanya leta] wagize amajwi 22.

Ubwo yari mu Nama mpuzamahanga ku kurwanya Sida n’indwara zandurira mu mibonano mpuzabitsina, ICASA, yateraniye i Kigali mu mpera z’umwaka ushize, Perezida Kagame yafashe umwanya ashimira mugenzi we watsinze amatora. Ni inama Perezida Nyusi yitabiriye.

Yagize ati “Perezida wa Mozambique yagize amatora mu gihugu cye, amatora yagenze neza aba ari we aha amahirwe. Tuzi ko inkiko zitaratangaza umwanzuro wazo ariko abaturage barivugiye, ndifuza kugushimira Perezida.”

Ishyaka rya Frelimo ryayoboye kuva Mozambique yabona ubwigenge yigobotoye Portugal mu 1975. Muri iyi manda rizagira imyanya 184 mu Nteko Ishinga Amategeko, Renamo igire imyanya 60 naho MDM igire itandatu.

Filipe Nyusi ni Perezida wa Kane wa Mozambique. Yayoboye icyo gihugu kuva mu 2015 nyuma yo kuba Minisitiri w’Umutekano kuva mu 2008 kugeza 2014.

Perezida Kagame agera kuri Independence square mu Mujyi wa Maputo, ahabereye irahira rya Perezida Nyusi
Hakozwe akarasisi ka gisirikare muri ibi birori
Ababyinnyi gakondo bashimishije abitabiriye ibi birori
Perezida Nyusi yarahiriye kuyobora Mozambique muri manda ya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .