Perezida Kagame yitabiriye inama ya AU yiga ku guhagarika intambara muri Afurika

Yanditswe na Cyprien Niyomwungeri
Kuya 8 Gashyantare 2020 saa 08:36
Yasuwe :
0 0

Perezida Paul Kagame ari i Addis Ababa muri Ethiopia, aho yitabiriye inama ya 33 isanzwe y’Umuryango wa Afurika yunze Ubumwe (AU), yiga ku guhagarika intambara ku mugabane wa Afurika nk’uburyo bwo guharurira inzira iterambere umugabane wifuza.

Iyi nama ifite insanganyamatsiko igira iti “Gucecekesha imbunda: Guharurira amayira iterambere rya Afurika”.

Irahuriza hamwe abakuru b’ibihugu na za Guverinoma ba Afurika, ba Minisitiri b’Ububanyi n’Amahanga b’ibihugu bigize AU, ubuyobozi bwa Komisiyo ya AU, abahagarariye ibihugu byabo muri Afurika n’abandi batumirwa.

Biteganyijwe ko mu gitondo cyo kuri uyu wa Gatandatu Perezida Kagame ari bwifatanye n’Umuyobozi wa Komisiyo ya AU, Moussa Faki Mahamat, n’abandi bakuru b’ibihugu mu biganiro byiga ku buringanire ndetse no guteza imbere abagore muri Afurika.

Ku gicamunsi, Perezida Kagame arageza ijambo ku bitabira ibiganiro bya komite yo guha icyerekezo Ikigo cya AU gishinzwe iterambere (AUDA-NEPAD), iri buhurize hamwe abakuru b’ibihugu na za guverinoma.

Muri ibi biganiro kandi u Rwanda ruratangazwa nk’igihugu kizayobora iri huriro ry’Ibihugu bya Afurika rigamije ubufatanye mu Iterambere (NEPAD) muri manda itaha.

NEPAD ni gahunda ya AU igamije iterambere rya Afurika yemejwe mu nama ya AU y’Abakuru b’Ibihugu na za Guverinoma yabereye i Lusaka muri Zambia muri Nyakanga 2001. Gusa yagiye igorwa no kwibona neza mu mikorere y’Umuryango wa Afurika Yunze Ubumwe.

Umumaro wayo ujyanye neza n’intego z’icyerekezo cy’iterambere rya Afurika 2063, Afurika Yunze Ubumwe yihaye mu 2013, kijyanye n’ishyirwa mu bikorwa ry’imishinga Afurika ihanze amaso mu gihe kizaza, bigizwemo uruhare n’abikorera.

Perezida Kagame kandi ku mugoroba aranitabira inama y’Akanama ka AU gashinzwe amahoro n’umutekano ku rwego rw’abakuru b’ibihugu ndetse n’inama ya komite ishinzwe gukemura ibibazo bya Sudan y’Epfo.

Gufungura ku mugaragaro inama ya AU ya 33 isanzwe biteganyijwe ku Cyumweru tariki 9 Gashyantare 2020.

Iyi nama iziga ku guhagarika intambara mu gihe mu mwaka wa 2013 abakuru b’ibihugu bya Afurika na Guverinoma zigize Umuryango wa Afurika Yunze Ubumwe bemeje gahunda yo guhagarika Intambara ku Mugabane wa Afurika yise “Silence The Guns”, bitarenze umwaka wa 2020.

Gucecekesha imbunda ni uburyo Afurika izajya ikemura amakimbirane, kuyakumira no gutanga gasopo mbere y’uko amakimbirane agera kure.

Afurika yizeye ko uyu mwaka nta mpunzi zizaba zigikurwa mu byazo kubera intambara cyangwa ubundi bugizi bwa nabi butewe n’amakimbirane akoresheje intwaro.

Gahunda yo gucecekesha imbunda yatangajwe ku mugaragaro muri 2014 ibihugu byose bihamagarirwa kugira ubufatanye mu kuyishyira mu bikorwa.

Mu myaka 10 ya mbere y’ishyirwa mu bikorwa rya gahunda ya Afurika 2063, hagomba kurangizwa intambara zose, amakimbirane mu baturage, ihohoterwa rishingiye ku gitsina n’irindi iryo ari ryo ryose bikagendana no kurwanya Jenoside.

Umugabane wa Afurika ukeneye cyane guhagarika intambara kugira ngo isoko rusange rya Afurika (AfCFTA), rizabashe gushyirwa mu bikorwa uko bikwiye. Iri soko rizatangira kuwa 1 Nyakanga 2020, aho kugeza ubu ibihugu 29 bimaze kuryemeza burundu.

Perezida Kagame yitabiriye inama ya AU muri Ethiopia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .