Perezida Kagame yitabiriye inama ya AU irebera hamwe uburyo bwo gucecekesha intwaro muri Afurika

Yanditswe na Philbert Girinema
Kuya 9 Gashyantare 2020 saa 05:34
Yasuwe :
0 0

Perezida Kagame yitabiriye inama ya 33 ya AU yabereye muri Ethiopia aho yiga ku bijyanye no gusigasira amahoro muri Afurika, intambara ziri mu bice bitandukanye by’umugabane zigahoshwa hagamijwe guhanga uburyo buboneye buganisha ku iterambere rya Afurika.

Mu 2013 nibwo abakuru b’ibihugu bya Afurika na Guverinoma zigize Umuryango wa Afurika Yunze Ubumwe bemeje gahunda yo guhagarika Intambara ku Mugabane wa Afurika yise “Silence The Guns”, bitarenze umwaka wa 2020.

Iyi nama iri kwibanda ku kureba uburyo amakimbirane amaze igihe mu bice bitandukanye bya Afurika yahoshwa, ibaye nyuma y’uko hari hashize igihe na none uyu muryango uri kuganira ku mavugurura agamije kureba uburyo bwo kuba wo ubwawo wakwihaza mu gutera inkunga ibikorwa byawo udakomeje kurambiriza ku nkunga z’amahanga, ndetse nabyo byakurikiye ibijyanye no gushyiraho isoko rusange rya Afurika.

Ubwo yatangizaga iyi nama, Umuyobozi wa Komisiyo ya AU, Moussa Faki Mahamat yagaragaje ko ibikorwa by’iterabwoba n’amakimbirane hagati y’imiryango itandukanye mu bihugu bimwe na bimwe abanziriza cyangwa agakurikira amatora ari bimwe mu bibangamiye umutekano kuri uyu mugabane.

Yavuze ko nubwo hari intambwe imaze guterwa muri Repubulika ya Centrafrique no muri Sudani, hakiri amakimbirane amaze igihe muri Libya no muri Sudani y’Epfo ndetse yakurikiwe n’andi yo mu bihugu bya Cameroun na Mozambique.

Faki yashimangiye ko bisaba ibirenze imbaraga za gisirikare mu gukuraho inkomoko y’amakimbirane muri Afurika, aho ahanini aterwa n’ubukene n’ihezwa.

Yavuze ko AU ikomeje urugendo rwo gushakira ibisubizo ibibazo bya Afurika. Gusa ijambo rye rikurikira ibyagiye bitangazwa n’abakuru b’ibihugu batandukanye ko intego ya AU yari yashyizweho mu 2013 yo kuba mu 2020 intambara zizaba zahoshejwe ku mugabane wose itagezweho.

Perezida wa Afurika y’Epfo, Cyril Ramaphosa, ugiye kuyobora uyu muryango asimbuye mugenzi we wa Misiri, Abdel Fattah al-Sisi, yavuze ko ateganya gutumiza inama muri Gicurasi yiga ku buryo bwo guhosha amakimbirane ndetse n’ishyirwa mu bikorwa ry’amasezerano y’isoko rusange, CFTA.

Intambara yo muri Sudani y’Epfo imaze guhitana abantu 380,000 mu gihe miliyoni nyinshi zo ziri mu bukene.

Kuri Libya, AU yakunze kugaragaza ukutishimira uburyo isa n’ihezwa mu bikorwa bya Loni bigamije inzira y’amahoro.

Iyi nama iri kwiga uburyo bwo guhosha amakimbirane ku mugabane wa Afurika
Perezida Kagame asuhuzanya na Minisitiri w'Intebe wa Ethiopia, Abiy Ahmed, ubwo bari bitabiriye inama ya 33 ya AU kuri iki Cyumweru
Perezida Kagame arageza ijambo ku bakuru b'ibihugu bitabiriye iyi nama igaruka ku bimaze gukorwa ku mavugurura ya AU
Iyi nama ibaye mu gihe mu bice bitandukanye bya Afurika hakirangwa amakimbirane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .