Perezida Kagame yitabiriye inama itegura iy’Umuryango wa Afurika Yunze Ubumwe itegerejwe umwaka utaha

Yanditswe na Ndahayo Emmanuel
Kuya 25 Ukuboza 2020 saa 09:22
Yasuwe :
0 0

Perezida Paul Kagame yitabiriye inama igaruka ku itegurwa ry’Inteko Rusange y’Umuryango wa Afurika Yunze Ubumwe (AU), itegerejwe kuzaba mu mwaka utaha.

Perezida Kagame yitabiriye iyi nama mu buryo bw’ikoranabuhanga mu rwego rwo kwirinda ikwirakwira ry’icyorezo cya Coronavirus kiri guca ibintu hirya no hino ku Isi.

Muri iyi nama, Perezida Kagame yaganiriye n’abandi Bakuru b’Ibihugu, ndetse n’Abayobozi b’Imiryango y’Ubukungu igize Umuryango wa Afurika Yunze Ubumwe.

Mu bandi bitabiriye iyi nama barimo Perezida wa Afurika y’Epfo, Cyril Ramaphosa, ari nawe Muyobozi Mukuru w’Umuryango wa Afurika Yunze Ubumwe. Harimo kandi Perezida wa Misiri, Abdel Fattah el-Sisi, ari nawe waherukaga kuyobora uyu Muryango mu mwaka ushize, aho yagiye kuri uwo mwanya asimbuye Perezida Kagame w’u Rwanda.

Byitezwe ko mu Nama itaha y’Umuryango wa Afurka Yunze Ubumwe itegerejwe mu ntangiriro z’umwaka utaha, hazaganirwa cyane ku cyorezo cya Coronavirus ndetse n’uburyo umugabane wa Afurika ushobora kubona inkingo zo gukingira nibura 60% by’abawutuye kugira ngo iki cyorezo kiranduke, nk’uko byasabwe n’Ikigo GIshinzwe kurwanya Indwara z’Ibyorezo muri Afurika (CDC).

Iyi nama kandi itegerejwe mu gihe ubukungu bw’umugabane wa Afurika bwazahajwe cyane n’ihungabana ry’ubukungu rishamikiye ku ngaruka za Coronavirus, ku buryo hari abatinya ko iterambere Afurika yubatse mu myaka 10 ishize rishobora kuzayoyoka bitewe n’ihungabana ry’ubukungu ritegerejwe ku Isi hose. Banki y’Isi ivuga ko Umugabane wa Afurika wahombye miliyari 79$.

Iri hungabana kandi rinahuriranye n’ibibazo by’amadeni bimwe mu bihugu bya Afurika birimo, ibyanatumye uyu mugabane wishyira hamwe mu gusaba ubufasha ku bihugu n’ibigo bifitiwe amadeni, mu rwego rwo kugabanya umutwaro ku bihugu bya Afurika biri guhangana n’icyorezo cya Coronavirus mu gihe ubukungu bwabyo budahagaze neza.

Ku rundi ruhande, iyi nama yitezweho kuzasuzuma aho gahunda y’Isoko Rusange ku Mugabane wa Afurika (AfCFTA) igeze na cyane ko yitezweho kuzatangira ku itariki ya mbere Mutarama umwaka utaha.

Abahanga mu by’ubukungu bemeza ko n’ubwo igitekerezo cya AfCFTA kimaze imyaka cyigwaho kandi kinozwa, Afurika yagakwiriye gukoresha ingaruka izagirwaho n’icyorezo cya Coronavirus mu gushyiraho iri soko rusange no kuriha ireme, kuko bigaragara ko ari yo mizero yonyine ashoboka uyu mugabane ushobora gukoresha mu kwigobotora ingaruka z’iki cyorezo mu buryo burambye.

Banki y’Isi ivuga ko Isoko rusange rya Afurika ryitezweho kuzatuma ubucuruzi hagati y’ibihugu bigize uyu mugabane buzamuka, bukava ku kigero cya 16% buriho muri uyu mwaka, bukazagera ku kigero kiri hagati ya 40% na 50% mu myaka 20 iri imbere.

Mu gihe aya masezerano azaba atangiye gushyirwa mu bikorwa, byitezwe ko abanyafurika miliyoni 30 bazava mu bukene, kandi iri soko rikazaba ari ryo rinini ku Isi, rigizwe n’abaturage miliyari 1,3 ndetse n’umusaruro mbumbe urenze miliyari 3000$.

Perezida Kagame yitabiriye inama itegura iy'Umuryango wa Afuriika Yunze Ubumwe itegerejwe umwaka utaha
Iyi nama kandi yitabiriye n'abandi bayobozi b'ibihugu bya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .