Perezida Kagame yitabiriye inama ikomeye y’ubukungu muri Côte d’Ivoire

Yanditswe na Cyprien Niyomwungeri
Kuya 14 Ukwakira 2019 saa 12:44
Yasuwe :
0 0

Perezida Kagame yageze i Abidjan muri Côte d’Ivoire, aho yitabiriye Inama y’Ubukungu ihuza abashoramari bakomeye muri icyo gihugu izwi nka ‘‘CGECI Academy 2019.’’

Visi Perezida wa Côte d’Ivoire, Daniel Kablan Duncan niwe wakiriye Perezida Kagame, witabiriye iyi nama igiye kuba ku nshuro ya munani. Itegurwa n’Impuzamashyirahamwe y’ibigo by’ishoramari muri Côte d’Ivoire (Confédération générale des entreprises de Côte d’Ivoire- CGECI).

Kuri iyi nshuro irahuriza hamwe abikorera bo muri Afurika y’Uburengerazuba n’u Rwanda rwitabiriye nk’umutumirwa. Igamije gusangira amasomo ku buryo bwo guteza imbere ibijyanye no koroshya ubucuruzi no gutuma inzego z’abikorera zikora neza.

Biteganyijwe ko Perezida Kagame ari bugeze ijambo ku bayitabiriye mu muhango wo kuyifungura ku mugaragaro, akaba ari bukurikirwe n’ikiganiro gihuza Visi Perezida Daniel Kablan Duncan n’abayobozi babiri b’inzego z’abikorera ari bo; Baïdy Agne wo muri Senegal na Célestin Tawamba wo muri Cameroon.

Perezida Kagame kandi arageza ijambo kuri ba rwiyemezamirimo bakiri bato baturutse mu bihugu bitandukanye byo muri Afurika y’Uburengerazuba.

Iyi nama yitabiriwe n’abagera kuri 50 baturutse mu byiciro bitandukanye by’abikorera mu Rwanda birimo; ubuhinzi, inganda n’ikoranabuhanga. Baragirana kandi ibiganiro n’abagize urugaga rw’abikorera muri Côte d’Ivoire.

CGECI Academy 2019 yagombaga kuba ku wa 17-18 Ukwakira ariko ihindurirwa amatariki ishyirwa ku wa 14-15 Ukwakira 2019 kugira ngo Perezida Kagame azayitabire.

Umuyobozi wa CGECI, Stéphane Aka-Angui, yabwiye itangazamakuru ku wa 19 Nzeri 2019 ko u Rwanda rwatoranyijwe nk’umutumirwa w’imena mu bihugu bizayitabira kubera umurava rwagaragaje mu korohereza ishoramari.

Raporo ya Banki y’Isi yo mu Ukwakira 2018, yagaragaje ko mu koroshya ubucuruzi, u Rwanda ruri ku mwanya wa 29 mu bihugu 190 ku Isi, n’uwa kabiri muri Afurika inyuma y’Ibirwa bya Maurice.

Stéphane yagize ati ‘‘Buri wese azi neza ko u Rwanda rwashyize imbaraga mu kubaka uburyo buboneye butuma abashoramari n’abikorera bashobora kwiteza imbere.’’

Yatangaje ko yaganiriye na Perezida Kagame akemera kwitabira iyi nama ifite insanganyamatsiko igira iti ‘‘Ishoramari, ni ubuhe buryo buboneye mu iterambere ry’ibigo muri Afurika.’’

Mu bayitabiriye harimo abatanga ibiganiro bitandukanye biganisha ku ishoramari, gutera inkunga imishinga mito n’iciriritse, guhanga udushya, imiyoborere n’ibindi.

Iyi nama ngarukamwaka yatangiye kuba mu 2012, itangijwe na CGECI. Iya 2019, yitezwemo abasaga 6000 barimo abayobozi b’ibigo bikomeye bagera ku 1000.

Visi Perezida wa Côte d’Ivoire, Daniel Kablan Duncan niwe wakiriye Perezida Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza