Perezida Kagame yinjije Abanyarwanda mu 2020 abasaba kurangamira icyerekezo gishya cya 2050

Yanditswe na Philbert Girinema
Kuya 31 Ukuboza 2019 saa 08:14
Yasuwe :
0 0

Perezida Kagame yinjije abanyarwanda mu mwaka mushya wa 2020 abasaba gukora cyane kugira ngo u Rwanda ruzagere ku byo rwiyemeje mu cyerekezo gishya cya 2050.

Umukuru w’Igihugu yabigarutseho mu ijambo risoza umwaka wa 2019 ryinjiza abanyarwanda mu wa 2020. Yavuze ko umwaka wa 2019 wagenze neza ndetse abanyarwanda nibakomeza gukora uko bikwiye n’utaha uzaba mwiza kurushaho.

Perezida Kagame yavuze ko umwaka wa 2019 wabaye mwiza muri rusange kuko u Rwanda rwageze ku iterambere ntagereranywa, gusa agaragaza ko ibiza biherutse kwibasira ibice bitandukanye by’igihugu ari kimwe muri bike bitagenze neza ariko ko hakozwe ibishoboka byose kugira ngo bikumirwe abanyarwanda bakomeze kubaho neza.

Yavuze ko “Nidukomereza aho, dukora uko bikwiye uko buri wese yabigaragaje muri uyu mwaka turangije, 2020 uzaba ndetse mwiza kurusha uwo turangije.”

Perezida Kagame yavuze ko mu mwaka wa 2020 hari ibikorwa byinshi biteganyijwe byubakira ku bimaze kugerwaho, asaba abanyarwanda gukomeza “gukorera hamwe, dukore neza ibyo twakoraga neza, dukosore ibitaragenze neza, ariko icyangombwa ni uko igihugu gikomeza gutera imbere”.

Umukuru w’Igihugu yifurije abanyarwanda gukomeza kugera ku ntego zose mu ngeri buri wese abarizwamo.

Ati “Abanyarwanda ibyo nabifuriza ni ugukomeza kugera ku ntego zose twihaye ari mu buhinzi n’ubworozi, uburezi, ubucuruzi n’ubuhahirane n’ibihugu duturanye n’ibindi byo hirya kure mu zindi ntara z’Isi, uburezi bugatera imbere, ubuzima bugatera imbere, umutekano duhora duharanira twese dukorere hamwe, ari abaturage bishingiraho, ari inzego zishinzwe umutekano ku buryo bw’umwihariko byose bigaragara ko hari intambwe nziza ikomeza guterwa na buri wese.”

Umukuru w’Igihugu yavuze ko gutangira umwaka wa 2020 bijyanye n’icyerekezo gishya gikurikira icyari cyihawe cy’imyaka 20 uhereye mu 2000.

Ati “Ubu dutangiye icyo cyerekezo kiganisha ku myaka iri imbere yo kuva mu 2020 kugeza mu 2050, ikaba ari imyaka 30. Muri iyo myaka 30, twayigabanyijemo ibice bibiri mu buryo bw’imitekerereze n’imikorere ariyo 15, 15.”

“Ndakangurira abanyarwanda ko dukomeza kureba duhereye ku mwaka wa 2020, iyo myaka 30 iganisha ku 2050 hanyuma buri wese tukubakira ku byo tugezeho ubu, ku byo tuzaba dutangiye mu 2020 tuganisha kuri iyo myaka iri imbere.”

U Rwanda rwifuza ko mu 2050 buri munyarwanda azaba afite ubuzima bwiza, agerwaho n’amazi meza, amashyanarazi ahagije kandi ahendutse, serivisi zose z’ubuvuzi zizaba zaranogejwe n’uburezi bufite ireme ryo hejuru cyane rijyanye n’igihe.

Gahunda y’icyerekezo 2050 ni uko Umunyarwanda azaba yinjiza amadolari ya Amerika 12 476 (asaga miliyoni 10 Frw) ku mwaka.

Mu 2015, Umunyarwanda yabarirwaga ko yinjiza amadolari ya Amerika 720 ku mwaka, ndetse icyo gihe intumbero yari uko 2020 izasiga yinjiza 1240.

Ayo mafaranga aziyongera agere ku madolari ya Amerika 4000 mu 2035, noneho icyerekezo cya 2050 kikazasiga umunyarwanda yinjiza amadolari 12 476 ku mwaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .