00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yemeranyije na Guterres wa Loni umuti w’ibibazo by’umutekano muke muri RDC

Yanditswe na Philbert Girinema
Kuya 31 Ukwakira 2022 saa 05:57
Yasuwe :

Perezida Kagame yaraye agiranye ikiganiro kuri telefoni n’Umunyamabanga Mukuru wa Loni, António Guterres, cyagarutse ku bibazo by’umutekano muke mu Burasirazuba bwa Repubulika Iharanira Demokarasi ya Congo, bemeranya ko uburyo bumwe bwo kubikemura ari ugukurikiza inzira y’amahoro yagenwe n’ibiganiro byabereye i Nairobi hamwe n’ibya Luanda.

Ikiganiro cyahuje aba bayobozi bombi cyabaye mu masaha y’amasaha make RDC ifashe umwanzuro wo kwirukana Ambasaderi w’u Rwanda muri icyo gihugu, Vincent Karega.

Ni mu gihe kandi imirwano ishyamiranyije umutwe wa M23 n’Ingabo za Leta ikomeje gukaza umurego aho ibice bimwe na bimwe by’igihugu bikomeje kwigarurirwa n’aba barwanyi.

Mu butumwa Perezida Kagame yanyujije ku rukuta rwe rwa Twitter saa 1:59 zo mu rukerera rwo kuri uyu wa Mbere, yagize ati “Mu masaha make, nagiranye ibiganiro byiza n’Umunyamabanga Mukuru wa Loni ku makimbirane yo mu Burasirazuba bwa RDC.”

“Uburyo bwo kuyahosha no gukemura ibibazo mu mahoro, bushingiye ku masezerano ya Nairobi, Luanda ndetse no ku musanzu mpuzamahanga. Igisabwa ni ukwiyemeza kubishyira mu bikorwa.”

Mu biganiro biherutse guhuza Perezida w’u Rwanda n’uwa RDC i Luanda, ibihugu byombi byemeje kunoza umubano haba muri politiki na dipolomasi no kubakira ku mwuka wo kwizerana hagati y’ibihugu byo mu karere no gushyiraho uburyo bwiza bwo kuganira no kugisha inama mu buryo bwa politiki kugira ngo ikibazo cy’umutekano muke kiri mu Burasirazuba bwa RDC gikemuke.

Imyanzuro kandi igena ko vuba na bwangu harwanywa umutwe wa FDLR n’imitwe yayo itandukanya nka (CNRD, FLN, RUD-Urunana, na FPPH-Abajyarugamba), ari nayo nkomoko y’amakimbirane hagati y’u Rwanda na RDC kandi yakomeje no kugira uruhare rukomeye mu mutekano muke wa RDC.

Habayeho kandi kwemeranya uburyo bwo kurwanya no kwamagana imvugo zuzuye inzangano muri RDC, zakomeje kwiyongera mu bihe byashize zigamije kwibasira u Rwanda.

Iyi nama kandi yemerejwemo kongera imbaraga mu nzego z’ubutasi zihuriweho n’u Rwanda na RDC kandi bemeranya n’uburyo bufatika bwo kurwanya FDLR cyo kimwe n’indi mitwe nka yo binyuze mu bufatanye n’inzira zashyizweho mu karere.

Mu rwego rwo kugarura umubano mwiza wari usanzwe hagati ya Kigali na Kinshasa, iyi nama yemeje kandi ko komisiyo ihuriweho n’impande zombi yiswe DRC-Rwanda Commission yari imaze igihe idahura igomba gusubukura imirimo.

Amasezerano ya Nairobi Perezida Kagame yavuze mu butumwa bwe, agena ko RDC igomba kugirana ibiganiro n’imitwe yitwaje intwaro yigometse ku butegetsi bwayo, cyane ko ibibazo ahanini bituma igikomeje kubaho, bishingiye ku mpamvu za politiki no ku masezerano atarigeze ashyirwa mu bikorwa.

RDC ntiyigeze ishaka gushyira mu bikorwa ibikubiye muri ayo masezerano, kuko kuva ku munsi wa mbere yashimangiye ko idashobora kugirana ibiganiro n’umutwe wa M23 ifata nk’uw’iterabwoba.

Hagati aho, imirwano yakomeje hagati ya M23 na FARDC. Kuri iki Cyumweru tariki 30 Ukwakira, yumvikanye cyane mu bice bya Kigarama, ndetse urusaku rw’imbunda nto n’inini rwakomeje hafi ya Paruwasi gatolika ya Rugari.

Uduce twa Kiwanja na Rutshuru twamaze gufatwa na M23 two turatuje, nta mirwano ikihumvikana nubwo ntawe urizera ko idashobora kubura igihe icyo aricyo cyose.

Mu gihe Ingabo za FARDC zikomeje gutsindwa na M23, ni ko zikomeza kuvuga ko uyu mutwe urimo gufashwa n’u Rwanda, ibintu rwakomeje guhakana.

Perezida Kagame yagiranye ikiganiro kuri telefoni n’Umunyamabanga Mukuru wa Loni, António Guterres, cyagarutse ku buryo bwo gukemura amakimbirane akomeje gufata indi ntera mu Burasirazuba bwa Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .