Perezida Kagame yayoboye inama y’abaminisitiri ishobora gufatirwamo ingamba nshya zo kurwanya Coronavirus

Yanditswe na IGIHE
Kuya 26 Kanama 2020 saa 06:07
Yasuwe :
0 0

Perezida Kagame ku gicamunsi cyo kuri uyu wa Gatatu tariki 26 Kanama 2020, yayoboye inama y’abaminisitiri ishobora gufatirwamo ingamba nshya zo kurwanya icyorezo cya Coronavirus gikomeje gukaza umurego mu Rwanda.

Iyi nama ibaye mu gihe icyorezo cya Coronavirus kirimo kugaragaza isura nshya mu Rwanda, aho mu minsi itandatu ishize, ni ukuvuga kuva tariki 20 Kanama kugeza tariki 25 Kanama, abantu batanu bamaze kwicwa n’iki cyorezo.

Imibare y’abandura nayo ikomeje kwiyongera cyane kuko mu minsi itatu ishize habonetse nibura abantu 200 kuzamura. Tariki 23 Kanama handuye abantu 200, tariki 24 Kanama handuye abantu 217 naho tariki 25 Kanama handura abantu 231 ari nabo benshi bamaze gusangwamo uburwayi mu masaha 24 mu Rwanda.

Inama y’abaminisitiri iheruka yabaye tariki ya 14 Kanama 2020, yasuzumye ingamba zafashwe zo gukumira ikwirakwira ry’Icyorezo cya COVID-19, yemeza n’ingamba zigomba gukurikizwa. Yemeje ko izi ngamba zizongera kuvugururwa hashingiwe ku isesengura ry’inzego z’ubuzima.

Iyi nama yemeje ko gahunda yo gupima abantu COVID-19 izakomeza mu gihugu hose, udupfukamunwa tugakomeza kwambarwa neza igihe cyose umuntu agiye aho ahurira n’abandi bantu.

Hemejwe ko serivisi zose zemerewe gukora zizakomeza kubahiriza amabwiriza atangwa n’inzego z’ubuzima arimo gukaraba intoki, kwambara udupfukamunwa no gusiga intera hagati y’umuntu n’undi.

Yanzuye ko abacuruzi bose bakangurirwa kwemera kwishyurwa hakoreshejwe ikoranabuhanga nka bumwe mu buryo bwo kwishyurana, kandi ingendo zibujijwe guhera saa tatu z’ijoro (9:00 pm) kugeza saa kumi n’imwe za mu gitondo (5:00 am).

Tariki 14 Kanama ubwo haheruka kuba inama y’abaminisitiri, hari hamaze kuboneka abantu 2293 banduye Coronavirus mu bipimo 323 905 byari bimaze gufatwa, 1604 bari bamaze kuyikira mu gihe 681 bari bakirwaye naho umunani bari bamaze kwitaba Imana.

Uyu munsi, imibare ya Minisiteri y’Ubuzima yo kuwa 25 Kanama, ni ukuvuga iminsi 11 nyuma yaho, abamaze kwandura ni 3537 mu gihe abamaze gusezerwa mu bitaro ari 1806, naho abamaze kwicwa na Coronavirus ni 15.

Perezida Kagame kuri uyu wa Gatatu yayoboye Inama y'Abaminisitiri
Iyi nama ibaye mu gihe icyorezo cya Coronavirus gikomeje gukaza umurego
Iyi nama yitezweho gufata ingamba zo kwirinda Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .