Perezida Kagame yavuze ku maraso y’Abanyarwanda Rusesabagina agomba kuryozwa, aca amarenga y’ifatwa rye

Yanditswe na Philbert Girinema
Kuya 6 Nzeri 2020 saa 03:50
Yasuwe :
0 0

Perezida Kagame yatangaje ko Paul Rusesabagina uherutse gutabwa muri yombi, agomba kugezwa imbere y’ubutabera akabazwa ku bikorwa yakunze kwigamba by’ibitero byaguyemo Abanyarwanda, anahishura ko kugira ngo agere mu Rwanda nta cyaha na kimwe cyigeze gikorwa.

Perezida Kagame yabigarutseho mu kiganiro yagiranye na RBA, cyabereye muri Village Urugwiro, kiyoborwa na Barore Cléophas na Fiona Mbabazi. Cyagarutse ku ngingo zitandukanye zirimo ibihe igihugu kirimo byo kurwanya Coronavirus, ifatwa rya Kabuga Félicien, Paul Rusesabagina n’izindi ngingo.

Cyabaye nyuma y’iminsi irindwi bitangajwe ko Paul Rusesabagina yatawe muri yombi aho akurikiranyweho ibyaha by’iterabwoba byakorewe mu Turere twa Nyaruguru, Rusizi na Nyamagabe.

Perezida Kagame yavuze ko ifatwa rya Rusesabagina nk’Umunyarwanda abenshi bari bazi ariko umaze imyaka aba hanze, ikibazo cye cyoroshye, kuko gishingiye ku kuba umuntu ashobora gukora ikintu cyiza kikamuha izina, cyangwa agakora ikibi kikamuha izina ribi ariko rikamenyekana.

Ati “Hari irimenyekana ku kintu kizima, hari irimenyekana ku kintu kibi. Byose biramenyekana ku Isi hose bakamenya umuntu, yaba ari ruharwa mu gukora nabi, yaba yarakoze neza bose bakamenyekana. Hari ubwo ikibazo kiba ari uko gusa abantu bashoboye gusesengura bakavuga ngo ari uko uyu ibyiza bamuvuzeho ni byo koko?”

Yavuze ko ikibazo cya Rusesabagina atari we nk’umuntu ufunzwe, ahubwo muri we “harimo ibindi byinshi” bitari we.

Umukuru w’Igihugu yatanze ingingo abishingiraho, avuga ko imwe ishingiye kuri Rusesabagina witiriwe ibintu, bigakurura impaka ku kuba ari byo cyangwa atari byo.

Ati “Iby’uko yakijije abantu mu mateka yacu mabi ashize, ngo yakijije abantu muri Mille Collines, ibyo biragenda bimuha izina ko ari igitangaza ndetse akina n’amafilimi ajyanye nabyo, ibyo bifite amateka yabyo.”

Yavuze ko hari abantu bari muri iyo hotel bashobora gutanga ubuhamya ku buryo byamenyekana neza koko ko ari ukuri, gusa ngo kuri we icyo si ikintu cy’ingenzi.

Ati “Ibyabaye bamwitirira, ibitari byo ni bibi, ariko nta n’ubwo ari icyaha twashinga urubanza ngo tugiye kuburana nawe. Ibyo ntabwo bintwarira umwanya, bizagira igihe cyabyo buhoro buhoro bizajya bisobanuka.”

Perezida Kagame yavuze ko yaba ari Rusesabagina wubakiye ku izina bamuhaye ritari ryo, byaba ari uko hari abamushutse bakamugira igitangaza ku nyungu zabo, bigatuma aba umuntu ushaka no guhindura ubuzima bw’igihugu, aho ariho hari ikindi kibazo.

Ati “Ibyo bikorwa bigomba gukorwa kugira ngo iki gihugu kibure amahoro ndetse kigane aho Rusesabagina agishaka cyangwa aho abamukoresha bagishaka ko kijya, kuko bigomba kuba birimo ibyo gukoresha nta gushidikanya. Aho niho hari ipfundo, ibyo yakoze, hari imitwe y’abantu barwanya igihugu, hirya no hino, mu karere, mu Bubiligi, mu Bufaransa, muri Amerika, bafatanyije [...] aho niho hari ikibazo.”

“Muri iyo mitwe, imitwe igirira nabi Abanyarwanda, bashobora no kuba bavuga ko icyo bagamije ari uguhindura, ko u Rwanda rutameze neza, kurugira neza, ariko ubwo buryo bakoresha, barica abantu.”

Perezida Kagame yatanze urugero ku mitwe irimo FLN na MRCD, hanyuma Rusesabagina akitwa ko ari umuyobozi wabyo, akitirirwa ibikorwa byayo kandi nawe akabyigamba, byo kwica abaturage.

Ati “Abaturage muri Nyamagabe bicwa, muri ariya mashyamba ya Nyungwe, bigaturuka mu Burundi, bikica abantu akabyiyitirira, akabyigamba akabivuga. Aho hari ikibazo agomba gusubiza.”

Perezida Kagame yavuze ko kugisubiza, azagisubiza yaba hari abamukoresha, kuko iyo bigeze aho, ibyo bamufasha ari ukwiyita amazina y’igitangaza ariko kwica Abanyarwanda, kubabuza amahoro, byo abibazwa.

Ati “Amaraso y’Abanyarwanda afite ku ntoki ze kubera ibyakozwe n’iyo mitwe navugaga, ibyo ni ibyo agomba gusubiza byanze bikunze.”

Uko Rusesabagina yafashwe bizamenyekana

Perezida Kagame yavuze ko uko Rusesabagina yageze mu Rwanda bizamenyekana ariko ko nta n’urubanza rwaba rurimo kuvuga ko ariwe wizanye.

Ati “Uwabwira n’abantu ko ariwe wizanye ubwo urubanza rwaba rurihe? Rwaba ruri kuri nde? Urabizi ushobora kwizana wabeshywe ukisanga hano, ubwo icyaha ni icyo kubeshya gusa ntabwo ari ikindi kibazo. Kuko kuva aho yavuye kugera hano nta cyaha cyigeze gikorwa hagati aho na kimwe.”

Yatanze urugero avuga ko uko yageze mu Rwanda bisa n’uko umuntu yashaka guhamagara nimero runaka, akisanga yahamagaye itari yo.

Perezida Kagame yavuze ko nta kibazo na kimwe afite ku kuba Rusesabagina hagira abantu bamufata nk’intwari, ahubwo ikibazo kiri mu bikorwa bye byo kugambanira Abanyarwanda no kubica ndetse no kugirira nabi abaturage.

Yashimangiye ko u Rwanda ruzi neza inshingano zarwo, uko rukwiye kwitwara mu kibazo nk’iki ku buryo dosiye ye izitabwaho mu mucyo bityo ko nta muntu n’umwe ukwiye kugira impungenge.

Perezida Kagame yagaragaje uruhare rw’amahanga mu bwicanyi bwabereye muri Congo bukegekwa ku Rwanda
Perezida Kagame yavuze ko ibibazo by’u Rwanda na Congo byatangiye kera kandi amateka agaragaza ko atari u Rwanda rwabitangije
Perezida Kagame yavuze ko abakomeje gukuririza ibyo bibazo bashatse bakwitonda kuko uruhare runini ruri kuri bo kurusha abandi bose
Perezida Kagame yavuze ko ubwo Jenoside yakorewe Abatutsi yabaga, nabwo abagize uruhare muri Jenoside bambutse bajya muri Congo bakakirwa neza
Perezida Kagame yavuze ko ibibazo bivugwa muri Rayon Sports bikurikiranwa na Minisitiri Munyangaju Aurore Mimosa kandi yizera ko byabonewe igisubizo
Iki kiganiro cyabereye muri Village Urugwiro ku Kacyiru
Abanyamakuru b’Ikigo cy’Igihugu cy’Itangazamakuru, RBA, Barore Cléophas na Fiona Mbabazi ni bo bayoboye ikiganiro

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .