Perezida Kagame yavuze ku birori by’impurirane yitegura birimo ubukwe bw’umukobwa we

Yanditswe na Ishimwe Israel
Kuya 28 Kamena 2019 saa 07:44
Yasuwe :
0 0

Perezida Paul Kagame yavuze ko impamvu yatumye uruzinduko rwe muri Botswana rwihuta ari uko yitegura ibirori by’impurirane aho umukobwa we Ange Kagame azashyingirwa mu gihe u Rwanda narwo ruzaba rwizihiza ibirori by’umunsi w’ubwigenge byahujwe no kwibohora.

Yabigarutseho mu isangira yakiriwemo na Perezida wa Botswana, Mokgweetsi Eric Keabetswe Masisi, ku mugoroba wo ku wa 27 Kamena 2019.

Mu ijambo rye yashimye ikaze yahawe muri Botswana, aho yari akandagije ikirenge bwa mbere.

Yagize ati “Icyifuzo cyanjye kwari ukuza nkamara igihe kirekire, nkamenya ahantu, nkanamenyana n’abantu mu gihugu cyanyu cyiza. Hari impamvu nyinshi bitakunze zirimo imwe iri ku rwego rw’igihugu n’iy’umuryango wanjye.’’

Aseka, Umukuru w’Igihugu yavuze ko yabwiye mugenzi we ko hari ibikorwa bibiri by’ingenzi bimutegereje agomba kwitegura.

Ati “Mfite umukobwa umwe [Ange Ingabire Kagame] mu muryango wanjye w’abana bane kandi uwo mukobwa agiye gushyingirwa. Uwo ni umugisha. Njye na Madamu [Jeannette Kagame] tugomba kujya kwitegura.’’

Ubukwe bwa Ange Kagame n’umukunzi we Bertrand Ndengeyingoma buteganyijwe kuba ku wa 6 Nyakanga 2019. Buzabera mu Intare Conference Arena i Rusororo.

Perezida Kagame yakomeje avuga ko “Tunafite ibirori by’umunsi w’ubwigenge byahujwe n’uwo Kwibohora, bigiye kuba [Biteganyijwe ku wa 4 Nyakanga 2019].’’

Yahise anatumira mugenzi we wa Botswana, Mokgweetsi Eric, kuzitabira ibyo birori u Rwanda ruzihirizamo isabukuru y’imyaka 25 ishize rwibohoye.

Yamubwiye ati ’N’iyo wahagera amasaha make’, ndetse na we nta kuzuyaza ahita amwemerera ko “Nzaba mpari.’’

Umukuru w’Igihugu na Madamu Jeannette Kagame bagiriraga uruzinduko rw’iminsi ibiri rw’akazi muri Botswana aho bakiriwe mu Mujyi wa Gaborone na Perezida Mokgweetsi Masisi na Madamu Neo Masisi.

Uru ruzinduko rwari rugamije gutsura umubano hagati y’ibihugu byombi, rwasojwe kuri uyu wa Gatanu, tariki ya 28 Kamena 2019.

Perezida Kagame yavuze ko ubushake buri hagati y’ibihugu byombi bugaragaza ko nta gushidikanya ubufatanye buzagera ku ntego yo guhindura imibereho y’abaturage n’ubukungu.

Ati ‘‘Ni uruzinduko ruto ariko rufite akamaro mu mubano wacu urambye. Ba Minisitiri bamaze igihe hano kandi baramenyanye. Ntekereza ko bazagira akazi kenshi ko gukora. Tuzavuga ku musaruro mwiza mu gihe kizaza mu nzego tuzaba twemeranyijwe gukoranamo.’’

Ibi bihugu byombi bisanganywe umubano umeze neza, aho mu nzego z’ubufatanye zihari harimo ubucuruzi bw’ibikomoka ku buhinzi n’ubworozi, ubucuruzi, ishoramari, uburezi, ibidukikije, ubucukuzi bw’amabuye y’agaciro n’ibindi.

Perezida Kagame yavuze ko imikoranire hagati y’u Rwanda na Botswana idakwiye kugarukira hagati yabyo ahubwo ikwiye no kugirira inyungu Afurika yose.

Izindi nkuru wasoma:

-  Mu mafoto: Umunsi wa mbere w’uruzinduko rwa Perezida Kagame na Madamu muri Botswana

-  Perezida Kagame na Madamu batangiye uruzinduko rw’iminsi ibiri muri Botswana

Perezida Kagame yavuze ku birori by’impurirane yitegura birimo ubukwe bw’umukobwa we n'Umunsi wo Kwibohora
Perezida Mokgweetsi ayobora Botswana guhera muri Mata 2018
Perezida Kagame yashimye ikaze yahawe na mugenzi we wa Botswana, Mokgweetsi Eric Keabetswe Masisi
Perezida wa Botswana, Mokgweetsi Masisi, yemereye Perezida Kagame ko azitabira ibirori by'Umunsi wo Kwibohora
Abakuru b'ibihugu byombi bagiranye ibiganiro byihariye byagarutse ku kunoza umubano hagati yabyo
Ange Kagame n’umukunzi we Bertrand Ndengeyingoma bagiye kubana akaramata

Amafoto na Video: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza