Perezida Kagame yahamije ko u Rwanda na Centrafrique byinjiye mu mateka mashya

Yanditswe na Cyprien Niyomwungeri
Kuya 15 Ukwakira 2019 saa 07:44
Yasuwe :
0 0

Perezida Kagame yavuze ko u Rwanda na Centrafrique byinjiye mu bihe bishya by’umubano, nyuma yo gusinya amasezerano hagati y’impande zombi mu bijyanye n’igisirikare, ubucukuzi bw’amabuye y’agaciro, peteroli no guteza imbere ishoramari.

Kuri uyu wa Kabiri Perezida Faustin-Archange Touadéra wa Centrafrique yakiriye Perezida Kagame i Bangui, uri yo mu ruzinduko rw’umunsi umwe.

Perezida Touadéra na Kagame bagiranye ibiganiro byabereye mu ngoro y’Umukuru w’Igihugu mbere yo gukurikirana isinywa ry’amasezerano no gushyiraho komisiyo ihuriweho n’impande zombi.

Perezida Kagame kandi yakiriwe ku meza na Perezida Touadéra mu isangira, aho yanahawe umudali w’icyubahiro witwa ‘Grand Croix de la Reconnaissance’, umuyobozi w’Umujyi wa Bangui amushyikiriza urufunguzo rw’uwo mujyi nk’ikimenyetso cy’uko yagizwe umuturage w’icyubahiro wawo.

Nyuma yo guhabwa uyu mudali, Perezida Kagame yavuze ko awishimiye kandi ashimira Guverinoma ya Centrafrique kubera icyo cyubahiro yamuhaye. Yishimiye kandi kuba yagizwe umuturage w’icyubahiro wa Bangui.

Yavuze ko uru ruzinduko rushimangira intangiriro y’umubano mushya w’u Rwanda na Centrafrique ndetse amasezerano yasinywe ari umusingi wo kuwusigasira.

Ati “Uyu munsi twasinye amasezerano menshi y’ingenzi atuma ibikorwa duhuriyeho bishinga imizi. Iyi ni intangiriro. Aya masezerano agomba kwitabwaho mu gushyirwa mu bikorwa kugira ngo tubashe kuyubakiraho tugere kuri byinshi dufatanyije mu myaka iri imbere”.

Yavuze ko ibihugu byombi byanyuze mu mateka akomeye ariko nta gihugu gikwiye kuba imfungwa y’amateka yacyo.

Perezida Kagame yavuze ko buri gihe hari amahitamo ashobora gukorwa mu bufatanye bwo kubaka ahazaza, aho buri muturage yiyumvamo agaciro no kumva ko bimureba. Yatanze urugero ku Rwanda avuga ko rwahisemo kubakira ku bumwe.

Ati “Ku Rwanda, icy’ingenzi mu rugendo rwo kubaka amahoro iwacu byashingiye ku bumwe bw’igihugu. Tugerageza gushaka ibisubizo by’ibibazo byacu binyuze mu biganiro n’ubwumvikane”.

Yakomeje avuga ko politiki igomba guhuriza abantu hamwe mu guteza imbere imibereho myiza ya buri wese aho kubatanya.

Perezida Kagame yavuze ko Abanyarwanda bafashijwe n’abavandimwe babo bo muri Afurika n’ahandi mu rugendo barimo rwo kwiyubaka, ari yo mpamvu rutewe ishema no kuba rubashaka gusangiza abandi icyo rufite cyose aho gikenewe.

Yashimiye abanya-Centrafrique urugendo bakomeje rw’amahoro n’ubwiyunge, abizeza ko u Rwanda rwiteguye gukomeza kubaherekeza mu rugendo rujya imbere barimo.

Uru rugendo kandi ruri muri gahunda y’u Rwanda yo gukomeza kubaka ubucuti n’ibihugu bikoresha Ururimi rw’Igifaransa nyuma y’imyaka itatu rwongeye kwinjira mu Muryango w’Ubukungu bw’Ibihugu bya Afurika yo Hagati, CEEAC, rwari rwikuyemo mu 2007.

U Rwanda na Centrafrique bisanganywe umubano mwiza mu by’umutekano ndetse muri uyu mwaka hari ingabo zo muri iki gihugu zahuguriwe mu rwa Gasabo.

U Rwanda ruri ku mwanya wa gatatu mu bihugu bifite ingabo nyinshi mu bikorwa by’Umuryango w’Abibumbye bigamije kubungabunga amahoro muri Repubulika ya Centrafrique (MINUSCA), aho abasirikare barwo barenga 1,370 n’abapolisi 430.

U Rwanda rwatangiye kohereza abapolisi mu bikorwa by’Umuryango w’Abibumbye bigamije kugarura amahoro n’umutekano muri Centrafrique muri Nzeri 2014. Nyuma y’umwaka umwe, hatangiye koherezwayo abapolisi bashinzwe kurinda ubusugire bw’abayobozi bakuru b’igihugu n’ab’Umuryango w’Abibumbye n’ibyabo.

Centrafrique ni igihugu gikungahaye ku mabuye y’agaciro arimo zahabu, diamant, uranium na peteroli ndetse n’ibiti by’imbaho zifite agaciro gahambaye.

Perezida Faustin-Archange Touadéra wa Centrafrique yakiriye Perezida Kagame i Bangui
Perezida Kagame yemeje ko u Rwanda na Centrafrique binjiye mu mateka mashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza