00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yasoje uruzinduko rw’akazi yagiriraga i Brazzaville (Amafoto)

Yanditswe na Akayezu Jean de Dieu
Kuya 13 April 2022 saa 01:48
Yasuwe :

Perezida Paul Kagame yasoje uruzinduko rw’akazi yari amazemo iminsi itatu muri Repubulika ya Congo [Congo-Brazzaville], aho yagiranye ibiganiro na mugenzi we, Denis Sassou Nguesso ndetse ibihugu byombi bikanagirana amasezerano y’ubufatanye mu nzego zitandukanye.

Uruzinduko rw’Umukuru w’Igihugu i Brazzaville rwatangiye ku wa 11 Mata rusozwa mu gitondo cyo kuri uyu wa 13 Mata 2022 nk’uko byatangajwe na Perezidansi z’ibihugu byombi binyuze ku mbuga nkoranyambaga.

Nk’uko byagenze ubwo yageraga muri icyo gihugu, Perezida Kagame yakiriwe na mugenzi we, Denis Sassou Nguesso ndetse ninawe wamuherekeje ubwo yari agiye ku Kibuga cy’Indege, yerekeje i Kigali.

Perezida Kagame avuye i Brazzaville, we na mugenzi we Denis Sassou Nguesso bagiranye amasezerano umunani arimo ajyanye n’ubufatanye mu bukungu, kurengera no guteza imbere ishoramari hagati y’u Rwanda na Congo.

Hari kandi amasezerano y’ubufatanye mu bijyanye n’ubucukuzi bw’amabuye y’agaciro, guteza imbere ubucuruzi buciriritse, ubukorikori, umuco n’ubugeni, ubuhinzi, uburere mboneragihugu, kungurana ubumenyi.

Ni amasezerano yaje yiyongera kuyo ibihugu bisanzwe bifitanye arimo ay’ubutwererane mu bya gisirikare, ubufatanye mu kuzamura imyigire n’imyishirize muri za Kaminuza, ubutaka, ubufatanye mu iterambere rirambye, kubungabunga ibidukikije, guteza imbere ubucuruzi hagati y’ibihugu byombi no gukomeza kwagura ubufatanye mu guteza imbere ingendo zo mu kirere.

Incamake y’ibyaranze uruzinduko rwa Perezida Kagame i Brazzaville

Uru ruzinduko rwa Perezida Kagame muri Congo Brazzaville rwatangiye ku wa Mbere w’iki Cyumweru, hagamijwe gushimangira umubano mwiza uri hagati y’ibihugu byombi.

Ku munsi wa mbere w’uruzinduko, Perezida Kagame yakiriwe ku Kibuga cy’Indege na Perezida wa Repubulika ya Congo, Denis Sassou Nguesso, ndetse kuri uwo munsi ageza ijambo ku bagize Inteko Ishinga Amategeko, imitwe yombi.

Mu ijambo rye, Perezida Kagame yavuze ko abaturage b’u Rwanda na Congo Brazzaville bahujwe n’intego yo kubaka iterambere rirambye kandi rigera kuri bose.

Ati “Abaturage b’u Rwanda n’aba Congo [Brazzaville] bahujwe n’intego imwe yo kugira igice gitekanye kandi giteye imbere. Duhuje kandi intego yo kuhuza ibihugu n’abaturage ba Afurika, tugakorera hamwe mu kubaka Umugabane ukomeye kandi uteye imbere.”

Ku munsi wa mbere w’uruzinduko rwe kandi nibwo Perezida Kagame yakiriwe na mugenzi we, mu musangiro, aho yashimiriye Denis Sassou Nguesso wamutumiye ngo agenderere igihugu n’abaturage ba Congo muri rusange.

Mu ijambo yavuze, Perezida Kagame yashimangiye ko mu myaka myinshi ishize, hubatswe umusingi ukomeye mu mubano w’ibihugu byombi. Yanavuze ko ibihugu byombi ubushobozi bwabibashisha guca ukubiri n’imbogamizi bishobora kuba byahura nazo kugira ngo byiyemeze iterambere ryihuse.

Ku munsi wa kabiri w’uruzinduko rwe, Perezida Kagame na Denis Sassou Nguesso bagiranye ibiganiro byihariye byabereye mu muhezo, nyuma biza kwitabirwa n’itsinda ry’impande zombi, ari nabyo byabereyemo isinywa ry’amasezerano y’ubufatanye.

Kuri uwo munsi kandi nibwo Perezida Kagame yakiriwe mu Mujyi wa Oyo, aho mu bikorwa bitandukanye yakoreye muri uwo mujyi harimo gusura Ingoro Ndangamurage ya Kiebe-Kiebe.

Kuri uwo munsi kandi Abakuru b’ibihugu byombi kandi basuye Uruganda rw’Amata ndetse n’Ifamu y’Inka.

Afurika izi ibibazo ifite kandi ifite n’ibisubizo

Ubwo yagezega ijambo ku bagize Inteko Ishinga Amategeko ya Congo, imitwe yombi iteranye, Perezida Kagame yavuze ko Afurika idakwiye guhazwa no kugaragaza intego z’iterambere ifite ariko ugasanga nta gishyirwa mu bikorwa, avuga ko imvugo ikwiriye kuba ingiro.

Muri icyo kiganiro cyari cyanitabiriwe na bamwe mu bagize Guverinoma ya Congo ndetse n’abahagarariye ibihugu byabo muri icyo gihugu, Perezida Kagame yagize ati “Tuzi ibibazo Afurika ifite. Kandi tuzi n’ibisubizo [bikenewe]. Ikibura gusa ni uko dukorera hamwe, tukava mu mvugo tukajya mu bikorwa, [kandi] dufite ubushake bwo kwihutisha ibikorwa.”

Yakomeje agira ati “Ntabwo dukwiriye guterwa ishema no kuvuga ibintu byiza gusa, bikamara imyaka myinshi, ariko ugasanga mu myaka myinshi iri imbere kuva uyu munsi, nubwo twavuze ibintu byiza, ariko nta byinshi twagezeho. Dukeneye kujya imbere tugashyira mu bikorwa ibyo twiyemeje, by’umwihariko ibyo twasezeranyije abaturage bacu.”

Umukuru w’Igihugu yagaragaje ko Afurika ifite ibyo ikeneye mu kwiteza imbere, ashimangira ko igihe kigeze ngo abatuye umugabane bashyire hamwe mu gukora ibyiza biwuteza imbere.

Ati “Afurika yakomeje kuvuga kwishyira hamwe ndetse no kugira ubumwe kuva yatangira kubaho. Dukeneye gukomeza gutera intambwe vuba. Hakoreshejwe ubumenyi n’umutungo Umugabane wacu ufite, nta mpamvu yagatumye dukomeza kuba aho turi uyu munsi.”

Umukuru w’Igihugu yatanze urugero ku Muryango wa Afurika y’Iburasirazuba uherutse kwakira Repubulika Iharanira Demokarasi ya Congo, avuga ko ari ingenzi kuko iyo imiryango y’ubucuruzi iteye imbere, bigira ingaruka nziza ku iterambere rya Afurika muri rusange, ari nabyo bizihitisha ishyirwa mu bikorwa by’amasezerano y’Isoko Rusange rya Afurika (AfCFTA).

Mu ruzinduko yagiriraga i Brazzaville, Perezida Kagame yari yaherekejwe n’abarimo Minisitiri w’Ububanyi n’Amahanga, Dr Vincent Biruta; Minisitiri w’Imari n’Igenamigambi, Dr. Uzziel Ndagijimana; Umuyobozi w’Urwego rw’Iterambere, RDB, Clare Akamanzi n’abandi.

Perezida Kagame yakiriwe mu Mujyi wa Oyo, aha yari kumwe na mugenzi we, Denis Sassou Nguesso.
Perezida Kagame yakiriwe ku meza na mugenzi we, Denis Sassou Nguesso.
Perezida Kagame yafashe ifoto y'urwibutso n'abakozi b'Ingoro Ndangamurage ya Kiebe-Kiebe.
Perezida Kagame na Denis Sassou Nguesso bakurikiranye isinywa ry'amasezerano hagati y'ibihugu byombi.
Perezida Kagame na Denis Sassou Nguesso basuye uruganda rw'amata.
Abaturage bo muri Repubulika ya Congo bari babukereye bajya kwakira Perezida Kagame.
Bari bafite ibyapa bigaragaza ko bishimiye umubano n'ubucuti bw'u Rwanda na Congo.
Ku kibuga cy'Indege, Perezida Kagame yaherekejwe na mugenzi we wa Repubulika ya Congo.
Perezida Kagame yasoje uruzinduko rw'iminsi itatu yagiriraga muri Repubulika ya Congo.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .