Perezida Kagame yashimye Arsenal yegukanye igikombe cya 14 cya FA

Yanditswe na Ishimwe Israel
Kuya 1 Kanama 2020 saa 10:20
Yasuwe :
0 0

Perezida Kagame yashimye Ikipe ya Arsenal yegukanye Igikombe cya FA itsinze Chelsea FC ibitego 2-1 mu mukino wabereye kuri Stade ya Wembley kuri uyu wa 1 Kanama 2020.

Arsenal FC yegukanye igikombe cya 14 cya FA ibifashijwemo na rutahizamu wayo, Pierre-Emerick Aubameyang wayitsindiye ibitego bibiri [ku munota wa 28 n’uwa 67], mu gihe kimwe rukumbi cya Chelsea kinjijwe na Christian Pulisic ku munota wa gatanu w’umukino.

Intsinzi ya Arsenal yashimishije abakunzi bayo bo mu mfuruka zitandukanye z’Isi barimo na Perezida Kagame wihebeye iyi kipe abakunzi bayo bita ‘The Gunners.’

Mu butumwa Umukuru w’Igihugu yanyujije ku rukuta rwe rwa Twitter yagaragaje ko ashimishijwe n’intsinzi ya Arsenal ndetse ko abakunzi bayo bayifitiye icyizere.

Yagize ati “Ni byiza kuri Arsenal, mwakoze ku ntsinzi yari ikwiye kandi ikenewe yo gutwara FA CUP. Twe, abafana n’abakunzi turacyabafitiye icyizere…mu gihe kiri imbere reka dukomeze twihe intego yo kugera ku byisumbuye. Twabishobora.’’

Igikombe Arsenal yegukanye cyayihesheje itike yo kuzaserukira u Bwongereza mu irushanwa rya Europa League mu mwaka w’imikino utaha.

Usibye kuba Perezida Kagame ari umufana wa Arsenal FC, ni n’umwe mu bayobozi bakunda umupira w’amaguru ndetse afite n’igikombe cyimwitirirwa cya Cecafa Kagame Cup.

Ku wa 3 Gicurasi 2014, Ikipe ya Arsenal yamugeneye impano azishyikirizwa na Tony Adams wahoze ari kapiteni wayo.

Tony Adams yatangaje ko iyi kipe yamugeneye umupira wo gukina wa Arsenal, imuha imipira itatu yo kwambara ya Arsenal hariho umwe uriho amazina ye na numero imwe.

Mu 2007 ubwo Perezida Kagame yizihizaga isabukuru y’imyaka 50 y’amavuko, umutoza Arsene Wenger [watozaga Arsenal] yamuhaye impano y’idarapo ry’iyi kipe ririho imikono y’abakinnyi bose mu kumushimira.

Mu Ukwakira 2013, Perezida Kagame yari ku kibuga cya Arsenal, Emirates, ubwo iyi kipe yatsindaga Napoli ibitego 2-0 mu mikino ya UEFA Champions League.

Icyo gihe yanyuzwe no kureba uwo mukino. Yagize ati “Nishimiye kurebera umupira i Emirates. Ndashimira Wenger na Arsenal bagarutse ku mukino mwiza wo gutsinda.”

Perezida Kagame ni umufana wa Arsenal kuva mu 1996, aho avuga ko ayikundira umukino mwiza ikina yatsinda cyangwa igatsindwa.

Arsenal ifitanye umubano n’u Rwanda kuko kuva muri Gicurasi 2018 Ikigo cy’Igihugu cy’Iterambere (RDB) cyinjiye mu bufatanye bw’imyaka itatu n’iyi kipe ya Arsenal FC yo muri Premier League, u Rwanda ruyibera umuterankunga wa mbere ku maboko y’imipira, aho yambara ‘Visit Rwanda’ ku kuboko kw’ibumoso ku ikipe nkuru, iy’abatarengeje imyaka 23 no mu ikipe y’abagore.

Mu ntangiriro za 2020, RDB yatangaje ko mu mwaka wa mbere u Rwanda rukorana na Arsenal, rwinjije miliyoni 33£ mu gihe rwari rwiteze kubona miliyoni 28£ ndetse gukorana n’iyi kipe yo mu Bwongereza byongereye umubare wa ba mukerarugendo basura u Rwanda.

Umusaruro u Rwanda rukura mu bukerarugendo wageze kuri miliyoni $438 mu 2017, wiyongeraho miliyoni $34 ugereranyije n’uwa 2016. Rwiteze miliyoni $800 mu 2024.

Mu Ukwakira 2019, Perezida Paul Kagame yakiriye myugariro wa Arsenal FC David Luiz, wari mu Rwanda mu bikorwa bitandukanye bigamije kumenyekanisha ubukerarugendo bw’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .