Perezida Kagame yashimiye Prof Rugege na Kaitesi ‘bujuje inshingano’ muri manda yabo

Yanditswe na Rabbi Malo Umucunguzi
Kuya 6 Ukuboza 2019 saa 01:45
Yasuwe :
0 0

Perezida Paul Kagame yashimiye Prof Sam Rugege wasoje inshingano nka Perezida w’Urukiko rw’Ikirenga na Kaitesi Zainabu Sylvie wari umwungirije, ku buryo bitwaye muri manda yabo bakuzuza inshingano igihugu cyabashinze.

Ni ubutumwa yatanze kuri uyu wa Gatanu ubwo yakiraga indahiro z’abayobozi bashya barimo Dr. Nteziryayo Faustin nka Perezida w’Urukiko rw’Ikirenga na Marie Thérèse Mukamulisa, visi perezida w’Urukiko rw’Ikirenga.

Yagize ati "Ndagira ngo ariko nongere nshimire cyane Perezida na Visi Perezida w’Urukiko rw’Ikirenga bacyuye igihe, aribo Prof. Rugege na Madamu Zainabu Kaitesi. Igihe bayoboye Urukiko rw’Ikirenga kuri uru rwego, bifashe neza, bayoboye abo bari bashinzwe kuyobora, neza, bujuje inshingano zabo mu nyungu z’igihugu, mu nyungu z’abaturage b’u Rwanda n’abandi abo ari bo bose, nagira ngo rwose tubibashimire."

"Ababasimbuye rero birumvikana ko bafite umusingi ukomeye wo gukomeza kubakiraho, bakageza ubutabera mu gihugu cyacu ku rundi rwego, nabo tubatezeho imirimo myiza kandi sinshidikanya ko nabo bazayuzuza uko bikwiye."

Prof Rugege na Kaitesi babonye abasimbura mu gihe manda yari kuzarangira neza kuri uyu wa Gatandatu tariki 7 Ukuboza 2019. Ni manda y’imyaka umunani idashobora kongerwa yateganywaga n’Itegeko Nshinga riheruka kuvugururwa.

Gusa mu ngingo ya 156 y’Itegeko Nshinga ryavuguruwe mu 2015 ari naryo rigenga abayobozi barahiye uyu munsi, Perezida na Visi Perezida b’Urukiko rw’Ikirenga bashyirirwaho igihe cya manda y’imyaka itanu ishobora kongerwa rimwe.

Ubwo hatangizwaga umwaka w’umucamanza wa 2019/2020 mu kwezi gushize, Prof Rugege yavuze ko ubwo yahabwaga kuyobora urwego rw’ubucamanza mu 2011, hari byinshi rwari rumaze gukora ariko hakiri n’ibibazo by’ingutu.

Byarimo ubwinshi bw’ibirego n’umubare muto w’abacamanza n’abanditsi, ugasanga ibirarane bihora ari byinshi, kubona ubutabera ku gihe bikaba inzozi mu manza zimwe.

Byaje guhinduka kuko kugeza ubu ngo urubanza rwinjiye rucibwa mu gihe kitarenze amezi ane ku mpuzandengo, mu Rukiko rw’Ikirenga igihe urubanza rufata kikaba cyaravuye ku mezi 69 mu mwaka wa 2011, kigera ku mezi 4.5 muri uyu mwaka.

Yavuze ko n’umwimerere w’ibyemezo bifatwa n’inkiko ukomeje kuzamuka, kuko umubare w’imanza zihindurirwa ibyemezo mu bujurire zavuye kuri 20% zigera ku 8%, kuva mu 2011.

Bimwe mu byo yavuze ko asize bigishakirwa umuti birimo umubare w’imanza udahwema kwiyongera ugereranyije n’umubare w’abakozi; ingengo y’imari nto ku mahugurwa y’abacamanza n’abandi bakozi b’inkiko; ikoranabuhanga rigifite ibibazo mu mikorere y’inkiko no kubona inyubako zikwiye ku nkiko zitarazibona.

Perezida Kagame na Prof Sam Rugege ubwo hatangizwaga umwaka w'ubucamanza wa 2019/2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza