Perezida Kagame yashimangiye ko urukingo rwa COVID-19 rukwiye gusaranganywa mu buryo bungana

Yanditswe na Rabbi Malo Umucunguzi
Kuya 22 Ugushyingo 2020 saa 10:19
Yasuwe :
0 0

Perezida Paul Kagame yagaragaje ko isaranganya ryihuse kandi ringana ry’inkingo za COVID-19, ari ngombwa kugira ngo iki cyorezo kibashe guhashywa mu bihugu byose, kandi hakabaho ubufatanye ngo hatazagira usigara inyuma mu kurenga ingaruka zacyo.

Ni ijambo umukuru w’igihugu yavuze kuri uyu wa Gatandatu, mu nama yahuje ibihugu 20 bikize ku Isi (G20), yabaye mu buryo bw’ikoranabuhanga, yakirwa na Arabie Saoudite nk’igihugu kiyoboye uwo umuryango.

Ni inama yabaye mu gihe ubukungu bw’ibihugu ku Isi bwifashe nabi bitewe n’icyorezo cya COVID-19, kimaze kwandura abantu miliyoni 58 no guhitana abasaga miliyoni 1,3, ariko nanone iba mu gihe ibigo bikora inkingo bikomeje gutangaza amakuru meza.

Pfizer yo muri Amerika na BioNTech yo mu Budage, biheruka gutangaza ko urukingo byakoze rurinda umuntu kwandura Coronavirus ku kigero cya 95%, mu gihe urwakozwe na Moderna Inc. rukora kuri 94.5 ku ijana, nubwo igeragezwa ritarasozwa.

Mu gihe izi nkingo zigaragaza ko zikora ndetse ibigo byatangiye gusaba ko zahabwa abantu mu buryo bw’ingoboka, impungenge zikomeye zisigaye ku kureba niba nizemezwa zizagera ku bihugu byose, kuko ibihugu bikize bishobora gutangatanga inganda zose, bikikubira inkingo zose zikabanza guhabwa abaturage babyo, ibihugu bikennye bigategereza igihe kinini, ari nako abaturage benshi bapfa.

Ni ingingo ikomeje kuganirwaho kenshi, abahanga mu by’ubuzima bagashyigikira ko ibihugu byose bikwiye gusaranganywa inkingo, zikabanza guhabwa abazikeneye kurusha abandi mu bihugu byose.

Perezida Kagame wavugaga nk’umuyobozi w’Ikigo cy’Umuryango wa Afurika yunze Ubumwe Gishinzwe Iterambere, NEPAD, yagaragaje ko hakenewe ko inkingo zikwirakwizwa mu buryo bungana.

Ati “Tugomba guhagarika iki cyorezo binyuze mu buryo bwihuta kandi bungana bwo gukwirakwiza inkingo kuri buri gihugu ku Isi, kandi tugomba kunoza inzira yatuma twongera kugera ku izamuka ry’ubukungu bw’Isi. Ndashimira G20 ku gukusanya inkunga ijyanye no kubona ibikoresho byo kurwanya icyorezo cya COVID-19 (Access to COVID-19 Tools (ACT) Accelerator) by’umwihariko muri gahunda igamije gukwirakwiza inkingo ya Covax.”

“Kuba harimo kuboneka icyizere ku nkingo nyinshi ziri mu igeragezwa, byazamuye icyizere cyo kuba ibintu byasubira ku murongo mu 2021. Gutera inkunga Covax ni ngombwa cyane kugira ngo urukingo rubashe kuboneka ahantu hose, kandi ntabwo twakwibagirwa ko inzego z’ubuzima zikomeye mu gihugu ari ngombwa kugira ngo urukingo rubashe gukwirakwizwa uko bikwiye.”

Kugeza ubu ibihugu bikize 94 na 92 bikennye n’ibiri mu nzira y’amajyambere byamaze kugaragaza ko bishyigikiye gahunda ya COVAX, aho intego ari ukugura inkingo miliyari 2 kugeza mu mpera z’umwaka wa 2021, zigenewe ibihugu bikennye n’biri mu nzira y’amajyambere. Ni gahunda ariko igikeneye amafaranga menshi, kuko haheruka kwemezwa miliyari 1.8$, mu gihe bibarwa ko hakenewe miliyari zisaga 5$.

Perezida Kagame yavuze ko guhagarika icyorezo cya COVID-19 byatuma ibihugu byongera gutera imbere, ariko ubwabyo ngo ntabwo bihagije kuko hakenewe n’ubushobozi bwo gutera inkunga ibikorwa byazahajwe n’ibihe by’icyorezo.

Yashimye uburyo G20 yakomeje gushyigikira gahunda yo gusubika amadeni ibihugu bifite nk’uburyo bwafasha muri iyo gahunda, gusa ngo hakenewe ubushobozi bw’inyongera mu bihugu biri mu nzira y’amajyambere kimwe no mu byateye imbere.

Yakomeje ati “Tugomba gukomeza gukorera hamwe kugira ngo hatagira usigara inyuma, mu gihe isi izaba irimo kurenga ibi bibazo.”

Mu kwezi gushize nibwo ibihugu bigize G20 byemeranyije ku kongera igihe cyo gusubikira ibihugu bikennye kwishyura imyenda byahawe, cyongerwaho amezi atandatu azageza muri Kamena 2021, ngo ubushobozi bibushyire mu rwego rw’ubuzima.

Ubwo hafungurwaga inama ya G20 kuri uyu wa Gatandatu, Umwami Salman bin Abdulaziz Al Saud wa Arabie Saoudite yavuze ko nubwo hatangiye kuboneka icyizere ku rukingo rwa COVID-19, hakwiye kunozwa uburyo bwatuma rugera ku bantu bose, kandi ibihugu bikarushaho kwitegura ibindi byorezo bishobora kubaho mu bihe biri imbere.

Muri Kamena 2020, ibihugu bigize G20 byiyemeje gukusanya miliyari 21$ zo kwifashihwa mu bikorwa byo guhangana na COVID-19, yakoreshejwe ahanini binyuze mu bikoresho byo byifashishwa guhangana n’iki cyorezo, gushakisha inkingo n’ibindi.

Umwami Salman kandi yavuze ko ibi bihugu bigize G20 bimaze gutanga agera kuri miliyari 1100$ (tiriyali 11$), mu bikorwa bigamije kuzahura ubukungu hashakishwa uburyo bwabasha kurenga ingaruka za COVID-19.

Perezida Kagame yashimangiye ko urukingo rukwiye gusaranganywa, kandi hakabaho ubufatanye ngo hatazagira usigara inyuma
Ni inama yahuje ibihugu 20 bikize ku Isi
Perezida Kagame yitabiriye inama mu izina rya NEPAP

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .