Perezida Kagame yashimangiye ko amavugurura ya AU ari ikimenyetso ko ejo heza hashoboka

Yanditswe na Ferdinand Maniraguha
Kuya 19 Ugushyingo 2018 saa 07:47
Yasuwe :
0 0

Perezida Paul Kagame uyoboye Umuryango wa Afurika yunze Ubumwe (AU), yashimangiye ko amavugurura y’uyu muryango ari ikimenyetso ko ejo heza abanyafurika bakeneye hashoboka.

Komisiyo ya AU niyo ikurikirana umunsi ku munsi ibikorwa by’uwo muryango, ikanafasha mu ishyirwa mu bikorwa ry’imyanzuro iba yemejwe.

Muri Nyakanga 2016 nibwo Perezida Kagame yahawe inshingano zo gutegura no gukurikirana amavugurura akenewe muri iyo Komisiyo kugira ngo ibashe kugeza AU ku cyerekezo yihaye cya 2063.

Ubwo yasozaga Inama idasanzwe y’abakuru b’ibihugu na za Guverinoma bigize AU, ari naho yamurikiye abayitabiriye aho ayo mavugurura ageze, yashimiye uburyo ibihugu bya Afurika byamushyigikiye mu myaka ibiri ishize ayoboye ayo mavugurura.

Ibimaze kugerwaho muri aya mavugurura, abakuru b’ibihugu na za Guverinoma babyemeje ku bwiganze busesuye, hakaba hasigaye kubinoza kugira ngo bizemezwe burundu mu nama y’abakuru b’ibihugu itaha.

Kagame yavuze ko umuhate abayobozi bo muri Afurika bagaragaje mu gushyigikira ayo mavugurura, ari ntagereranywa.

Ati “Ndabashimira ba nyakubahwa kubw’uyu musaruro. Muri uru rugendo, umuhate wanyu wagaragaje itandukaniro iri mu kugambirira neza n’ibikorwa bya nyabyo.”

Yavuze ko kuba ibikwiriye kuvugururwa byarateguwe atari iherezo ry’ikigambiriwe, asaba umuhate wa buri wese ngo bishyirwe mu bikorwa.

Ati “Amavugurura ubwayo ntabwo ari iherezo. Igifite agaciro ni uburyo tuyifashisha mu gutegura ejo heza h’umugabane wacu. Ndasaba Komisiyo n’ibihugu binyamuryango gushyira iyi myanzuro mu bikorwa vuba bishoboka.”

Nyuma y’inama aganira n’itangazamakuru, Perezida Kagame yashimangiye ko yemeye kuyobora amavugurura abizi ko atari umurimo woroshye, gusa avuga ko abamubanjirije bamubereye intangiriro kandi ko abayobozi bo muri Afurika bamubaye hafi.

Yavuze ko ubwo bufatanye bugaragaza ko Afurika yifuzwa izagerwaho.

Ati “Nshimiye abayobozi ba Afurika bemeje ku bwumvikane busesuye amavugurura y’ingenzi azahindura imikorere y’urwego rwacu mu myaka myinshi iri imbere. Dufatanyije, turi kubaka Afurika ikomeye kandi nziza, Afurika twifuza ikwiriye abaturage bacu.”

Muri iyi nama idasanzwe ya AU haganiriwe ku mavugurura n’imikorere bya Komisiyo ya AU, ishyirwaho ry’Ikigega nyafurika cy’Iterambere n’uburyo bwo kwishakamo ingengo y’imari ya AU hatarambirijwe ku nkunga z’amahanga.

Amwe mu mavugurura aheruka kwemezwa ni uko ibihugu bigomba kujya bitanga 0.2% by’umusoro w’ibyinjizwa mu gihugu, hagamijwe gushyigikira ingengo y’imari ya AU.

Ni gahunda byitezwe ko izafasha Afurika gukusanya imisanzu mu bihugu, izabasha gutera inkunga 100 % ibikorwa by’ubuyobozi bw’umuryango, 75% bya porogaramu z’umuryango na 25% by’ibikorwa by’amahoro.

Kugira ngo AU ibashe kugera ku ntego, yabanje kumva ko hakenewe uburyo buhamye bwo gutera inkunga ibikorwa byayo, nyamara muri icyo gihe, yari ibeshejweho n’imisanzu itangwa n’ibihugu hamwe n’abaterankunga buri mwaka.

Imibare yerekana ko abaterankunga bari bihariye 72% by’ingengo y’imari ya AU, ibintu byari biteye inkeke ko havuka ikibazo igihe umwe mu bafatanyabikorwa yahura n’ingorane mu bukungu, ndetse ugasanga izo gahunda Abanyafurika ntibazigira izabo.

Perezida Kagame yavuze ko amavugurura ya AU ari ikimenyetso cyo kugera kuri Afurika yifuzwa
Perezida Kagame yashimiye abakuru b'ibihugu bya Afurika ku muhate bashyize mu mavugurura ya AU
Kagame yavuze ko umuhate abayobozi bo muri Afurika bagaragaje mu gushyigikira ayo mavugurura, ari ntagereranywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza