Perezida Kagame yasabye Inteko Nyafurika gushishikariza ibihugu kwemeza isoko rusange

Yanditswe na Ferdinand Maniraguha
Kuya 22 Ukwakira 2018 saa 02:05
Yasuwe :
0 0

Perezida Paul Kagame yasabye Inteko Nyafurika Ishinga Amategeko, kugira uruhare mu gutuma ibihugu bigize Umuryango wa Afurika yunze Ubumwe, AU, byemeza burundu amasezerano ashyiraho isoko rusange no koroshya urujya n’uruza rw’abantu.

Amasezerano ashyiraho isoko rusange rya Afurika, AfCFTA, yasinyiwe i Kigali muri Werurwe uyu mwaka n’ibihugu 44 bigize AU, byanakomeje kwiyongera.

Ubu biri mu rugendo rwo kwishakamo 22 byayemeza burundu kugira ngo atangire gushyirwa mu bikorwa.

Ubwo kuri uyu wa Mbere Perezida Kagame uyoboye AU muri uyu mwaka, yatangizaga Inteko rusange ya mbere y’Inteko Ishinga Amategeko ya gatanu ya AU, yayisabye ubufasha n’ubuvugizi ngo kwemeza burundu ayo masezerano byihute.

Yavuze ko natangira gushyirwa mu bikorwa bizateza imbere ubukungu bwa Afurika n’imibereho myiza y’abaturage, bikayikuraho icyasha yambitswe.

Yagize ati “Ndabasaba inkunga kugira ngo kwemeza burundu amasezerano y’ubuhahirane ku mugabane wa Afurika no koroshya urujya n’uruza n’izindi nkingi z’icyerecyezo 2063 byihute."

"Nibijya mu bikorwa, bizagira akamaro kurusha icyari cyo cyose mu kwihutisha iterambere ry’ubukungu, bikureho isura mbi yagiye ihabwa umugabane wacu.”

Perezida Kagame yavuze ko Afurika ikeneye gushyira hamwe kugira ngo igere ku ntego zayo.

Yavuze ko hari impinduka ziteguwe zigamije guteza imbere Afurika, ariko zitagerwaho hatabayeho ubufatanye.

Perezida Kagame mu mwaka wa 2016 ni we wahawe kuyobora amavugurura ya AU kugira urwo rwego rubashe kugera ku ntego zarwo.

Yavuze ko umusaruro w’ayo mavugurura utangiye kwigaragaza, kuko ubu ingengo y’imari umuryango ukoresha yagabanyutse ariko imisanzu ibihugu bitanga ikiyongera.

Yagize ati “Ubumwe bwacu burakomeye muri iki gihe kurusha ikindi gihe cyose. Ingengo y’imari y’umwaka utaha yagabanyutseho 12 % ariko imisanzu yatanzwe n’ibihugu bigize umuryango yariyongereye cyane. Uruhare mu bikorwa by’amahoro ruri ku rwego rwo hejuru.”

Julius Malema, umudepite mu Nteko Ishinga Amategeko ya Afurika y’Epfo yabwiye IGIHE ko nubwo hari ibihugu bitaremeza amasezerano y’ubuhahirane n’urujya n’uruza, ngo yizeye ko bizakorwa kandi vuba.

Malema yavuze ko kubera ko igitekerezo cyari gishya, hari ibihugu byagize impungenge biba bibanza kugisha inama.

Ati “Ni ibintu bishya, haracyari ibihugu bifite impungenge. Ibihugu byinshi biracyakeneye kubanza kugisha inama […] Dukeneye gushyira hamwe ku mugabane kandi ibyo bizagerwaho igihe tuzaba tubasha kugenda nta mbogamizi, duhahirana byoroshye tukagira ifaranga rimwe.”

Umuyobozi w’Inteko Ishinga Amategeko y’Umuryango wa Afurika y’Iburasirazuba, Martin Ngoga yavuze ko ibikenewe byose bimaze kuboneka kugira ngo hashyirwe mu bikorwa ibyifuzo byagizwe n’abari bayoboye ibihugu bya Afurika ubwo yari ikibona ubwigenge.

Yavuze ko kuba AU ifite inzego zubatse, ibihugu biyigize bikaba bihuriye mu miryango ihuza uturere, ari ikimenyetso ko gushyira hamwe bizashoboka.

Iri soko ryitezweho inyungu nyinshi kuko rizahuriza miliyari 1.2 z’abatuye Afurika ku isoko rimwe rusange ry’umusaruro mbumbe wa tiriyali 2.19$. Bizanazamura uburyo Abanyafurika bakorana ubucuruzi, ubusanzwe byari ku kigero cyo hasi cyane.

Inteko rusange ya mbere y’Inteko Ishinga Amategeko ya AU yitabiriwe n’abadepite 265 bagizwe n’abadepite batanu baturutse muri buri gihugu muri 53 bya Afurika.

Iyo nteko ifite inshingano zo guharanira ko ibikorwa na Afurika Yunze Ubumwe biba Ibishyira mu bikorwa ibyifuzo by’abaturage hagamijwe iterambere.

Yatangiye i Kigali tariki 18 Ukwakira, ikazasoza imirimo ku wa 3 Ugushyingo 2018.

Perezida Kagame uyoboye AU, yatangije ku mugaragaro Inteko rusange ya mbere y’Inteko Ishinga Amategeko ya gatanu ya AU

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza