Perezida Kagame yasabye abaturage gutora abakandida-depite ba FPR nk’uko bamutoye

Yanditswe na Mathias Hitimana
Kuya 23 Kanama 2018 saa 02:59
Yasuwe :
1 0

Chairman w’Umuryango FPR Inkotanyi akaba na Perezida wa Repubulika, Paul Kagame, yasabye abaturage kuzatora abakandida bawo mu matora ateganyijwe mu kwezi gutaha, nk’uko bamutoreye kuyobora u Rwanda mu myaka irindwi iri imbere, muri Kanama 2017.

Yabigarutseho ubwo kuri uyu wa Kane yari mu Murenge wa Muganza mu gikorwa cyo kwamamaza abakandida-depite 80 ba FPR Inkotanyi n’imitwe ya politiki byifatanyije, hitegurwa amatora y’abadepite azaba ku wa 2-3 Nzeri 2018.

Perezida Kagame yabanje gushimira abaturage uko bitwaye mu matora y’Umukuru w’Igihugu yabaye umwaka ushize, bakamutora ku majwi 98,79%.

Yakomeje agira ati “Birumvikana rero nta kuntu mwaba mwaratoye umukandida wa FPR Inkotanyi ngo abe Umuyobozi w’igihugu ngo nibigera ku bababahagararira mu Nteko mwibagirwe FPR!”

Yabijeje ko ibyo yabasezeranyije bizagerwaho, anibutsa ko mu mwaka ushize ubwo yiyamamazaga yabemereye umuhanda wa kaburimbo.

Uyu muhanda uzahuza Gisagara na Huye uzuzura mu mwaka umwe, utware miliyari 6.5Frw, maze Gisagara ibone umuhanda wa mbere wa kaburimbo mu mateka yayo.

Perezida Kagame yakomeje agira ati “Ndashaka kubabwira ko mbere y’uko uyu mwaka urangira, ibikorwa by’uwo muhanda bizaba byatangiye.”

Yabwiye abaturage ko atavuga ko ibintu byose byera de, ari yo mpamvu abasaba gukomeza kugirira icyizere FPR Inkotanyi n’amakosa yakozwe agakosorwa.

Yakomeje agira ati "Gisagara rero, muzongere mutore neza muduhe amahirwe, ari perezida mwatoye, ari n’abakandida ba FPR bazabahagararira mu Nteko."

"Muduhe ayo mahirwe yo gukomeza kubakorera, muduhe ayo mahirwe yo gukosora ibyaba bitaragenze neza, kubera ko muri rusange aho tugana turahazi ni heza, igisigaye ni ugufatanya twese, ari abayobozi, ari abaturage, kugirango tugere kuri iyo ntego."

Yabwiye aba baturage ko yumvaga afite umwenda wo gusubirayo kubashimira kuba baratoye Chairman wa FPR Inkotanyi ngo abe Umukuru w’Igihugu, ati "Mwarakoze."

Perezida Kagame yanashimiye imitwe ya politiki yifatanyije na FPR Inkotanyi, avuga ko ari byo byatumye iterambere ry’igihugu rigera aho riri ubu.

Ati "Nta zindi nzego ziturutse ahandi, nta bandi bantu, nta yindi mitwe yatujyana mu nzira idushyira mu majyambere twifuza. Byose bikubiye mu bufatanye, nta cyasimbura ubufatanye, ntacyasimbura FPR n’abo bafatanyije ngo kiduhe ibyo ubwo bufatanye buduha.”

Ku rutonde rw’abakandida depite 80 FPR Inkotanyi yashyikirije Komisiyo y’amatora, hariho abanyamuryango bayo 70 n’abakandida icumi baturuka mu mitwe ya politiki itandatu byifatanyije, irimo PDI, PSR, PDC, PPC, UDPR na PSP.

Abaturage ba Gisagara bagaragaje urugwiro bafitiye Perezida Kagame
Senateri Tito Rutaremara yitabiriye ibikorwa byo kwamamaza abakandida ba FPR Inkotanyi i Gisagara
Umunyamabanga Mukuru w’Umuryango wa FPR Inkotanyi, Ngarambe François, nawe yari i Gisagara
Minisitiri w'Ingabo Gen James Kabarebe yaherekeje Umukuru w'Igihugu mu kwamamaza bakandida ba FPR Inkotanyi
Bacinye n'akadiho
Amashyaka yifatanyije na FPR-Inkotanyi yari yabukereye
Guverineri w'Intara y'Amajyepfo Mureshyankwano Marie Rose yasabye abaturage kuzatora abakandida ba FPR Inkotanyi
Abayobozi b'amashyaka yifatanyije na FPR Inkotanyi mu matora y'Abadepite
Perezida Kagame yagaragaje ko Intare ari urugero rwo kurinda ntawe uhutaje
Perezida Kagame yibukije abatuye Gisagara guharanira kurinda ibyo bageraho, ibyo hakurya y’igihugu bakabirekera abaho
Guverineri w'Intara y'Amajyepfo Mureshyankwano Marie Rose yasabye abaturage kuzatora abakandida ba FPR Inkotanyi

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza