Perezida Kagame yanenze abayobozi batega iminsi abashya mu kazi

Yanditswe na IGIHE
Kuya 31 Ukwakira 2020 saa 01:08
Yasuwe :
0 0

Perezida Kagame yasabye abayobozi bamaze igihe mu mirimo, kwirinda guca intege abashya n’abakiri bato bayinjiyemo kuko hari ubwo kubera imikorere mibi baba basanganywe, bashaka kwereka abinjiye mu kazi ko nta gishya bazageraho kuko ibyo baba bashaka gukora abo basanze baba barabigerageje ariko bikanga.

Umukuru w’Igihugu yabigarutseho mu muhango wo kumurika uko imihigo y’umwaka wa 2019/20 yeshejwe no gusinya iya 2020/21 wabereye i Nyagatare ku wa Gatanu w’iki cyumweru ku wa 30 Ukwakira.

Mu mihigo y’umwaka ushize, Akarere kaje ku mwanya wa mbere ni Nyaruguru kakurikiwe n’aka Huye na Rwamagana, mu gihe Nyabihu, Karongi na Rusizi aritwo twa nyuma.

Umukuru w’Igihugu yavuze ko uko u Rwanda rutera imbere, hari abajya mu mirimo ya leta cyangwa iy’abikorera, ariko ugasanga nk’umuntu uvuye hanze aho yakoraga, aho ibintu byose byabaga biri ku murongo ku buryo n’ikosa akoze arihanirwa ako kanya, atangiye gucibwa intege n’abo asanze kuko aba abasanganye imikorere itandukanye n’iyo yari amenyereye aho mu mahanga.

Ati “Wenda ukaza uvuye hanze aho wakoraga, bo rwose nujya guhusha ku byo bakweretse bashaka nk’intego yabo ukajya mu bindi barakwirukana ndetse nukora utuntu tumwe tunyuranyije n’amategeko uwo mwanya baragufunga bigatuma kubera iyo mikorere igusaba gukora neza, gukurikiza amategeko [...] ariko ugira utya gato ukabyishyura mu buryo bumwe cyangwa ubundi.”

Yakomeje agira ati “Abo rero bamenyereye ibyo, baba baje bageze iwacu hano, bakora, bagenzi babo bakababwira ngo nushaka ucishe make, uwo muriro uzanye uraza kuzima. Abantu bagatangira bakagutera iterabwoba, umuntu yagera aho akavuga ati ndapfuye. Cyangwa se abantu ugasanga bari aho baraganira ibyo kuvuga ngo ibyo twarabigerageje, ngwino nawe, ngaho, ibyo twese twarabigerajeje byaranze nawe ntabyo uzashobora.”

Perezida Kagame yakomeje avuga ko bene abo bantu bahora baca intege abashya mu kazi, batanatekereza ku kuba babareka bakagerageza ibyo bashoboye, byakunda bakabigiraho.

Ati “Abantu bakora batyo, ni kuki babikora, ni kuki babivuga. Kandi ugasanga no mu bandi batari babirimo barabiganira, barabigira urwenya, aho kugira ngo uvuge uti ibyo ntabwo aribyo turashaka abantu baza tugafatanya tugatera imbere ariko none wowe nuje avuye aho yari aje gukorera igihugu cyacu ugiye kumuca intege nicyo uhereyeho.”

“Uramutega iminsi, ntiwanamureka se noneho akagerageza wenda akazaba ahura nabyo aho ndetse agahangana nabyo aho kugira ngo ube wamuca intege?”

Perezida Kagame yavuze ko iyi mikorere ikwiye guhinduka, abantu bakimakaza gukorera hamwe bashyize imbere inyungu z’igihugu.

Perezida Kagame aganira n'abandi bayobozi bayoboye inzego nkuru z'igihugu
Perezida Kagame akurikirana uburyo imihigo y'umwaka wa 2020/21 isinywa. Kuri iyi nshuro byakozwe hifashishijwe ikoranabuhanga
Perezida Kagame yasabye abayobozi barambye mu kazi kwirinda guca intege no gutega iminsi abashya babasanzemo
Uyu muhango wari witabiriwe n'abayobozi mu nzego zitandukanye z'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .