Perezida Kagame yamaganye ihohoterwa rikorerwa abagore n’impanuka zikomeje guhitana Abanyarwanda

Yanditswe na Ferdinand Maniraguha
Kuya 14 Nzeri 2019 saa 05:18
Yasuwe :
0 0

Perezida Paul Kagame yamaganye ibyaha by’ihohoterwa rishingiye ku gitsina bikomeje kugaragara hirya no hino mu gihugu ndetse n’impanuka zikomeje guhitana ubuzima bw’abanyarwanda.

Yabivuze kuri uyu wa Gatandatu imbere y’abanyamuryango ba FPR Inkotanyi bari bitabiriye inama ya biro politiki y’uwo muryango.

Urwego rw’Igihugu rushinzwe ubugenzacyaha (RIB) rwatangaje ko guhera muri Mata 2018 kugeza muri Werurwe 2019, mu Rwanda hagaragaye ibyaha by’ihohotera bisaga ibihumbi bitandatu, bikaba byarihariye hafi 27% y’ibyaha byakozwe mu gihugu hose.

Abagabo 5123 nibo RIB yakiriye bashinjwa gukora ibi byaha mu gihe abahohotewe cyane ari abagore barenga 5500.

Perezida Kagame yavuze ko guhohotera abagore bitari mu muco nyarwanda, nyamara ngo bikomeje gufata indi ntera.

Ati “Iyo mico yo guhohotera abagore yavuye he ko atari iya Kinyarwanda? Ni iyo mwiga? Nabyo ni ibindi mwahashye? Ririya hohotera tudakemura naryo ni iritwambura gutera imbere.”

Yavuze ko igiteye inkeke ari uko bikorwa abayobozi barebera kandi bitari mu ndangagaciro z’umuco nyarwanda ndetse no mu ntego za FPR Inkotanyi.

Ati “Abantu bahora bari aho bagahohoterwa ikibazo barabuze uwo bagitura kuko mu babahohotera harimo n’abayobozi. Biba muri he? Ko nzi ko nk’abanyamuryango mwakabaye mubikemura.”

Perezida Kagame yavuze ko umunyamuryango nyawe wa FPR Inkotanyi adakwiriye kurebera ikibi cyangwa ngo agishyigikire kuko ari byo bituma igihugu kitagera ku byo cyiyemeje.

Ati “FPR nzi, niba ikintu cyagaragaye ko atari kizima ntugikora ariko ntiwihanganira ibitari byo. Umuntu wa FPR arahagarara akacyamagana, akakirwanya, niko mukwiriye kuba mukora kuko ibyo ni ibituma tutagera aho dukwiriye kuba tugera.”

Mu Rwanda mu mwaka ushize wa 2018, impanuka zahitanye abantu 465 zikomerekeramo abagera kuri 654.

Perezida Kagame avuga ko na byo ari ibintu bimaze gukabya ku buryo hakwiriye imbaraga zirenze izisanzwe.

Yavuze ko nubwo impanuka zidashobora gucika burundu, hari uburyo bwo kuzigabanya kuko ubuzima bw’umunyarwanda umwe bugiye ari igihombo gikomeye.

Ati “Impanuka zo zizahoraho haba mu Rwanda n’ahandi ariko njye iyo nkurikiye uko ziba hari izishobora kwirindwa, dukwiriye kuba tugabanya. Niyo yaba umuntu umwe ni umuntu. Abantu ntabwo ubabara gutyo nk’ibyatsi. Icya mbere kibitera ni ukutagira umuco wo kwifata, umuvuduko ukabije. Kwiruka cyane mu gihugu cyacu n’aya makoni, uba ushaka urupfu.”

Yagarutse ku bashoferi batumva inama bagirwa, bagatwara ibinyabiziga basinze kandi batwaye abantu.

Ati “Bakavuga ngo basanze umuntu yiruka atumva kuko yari yasinze kandi ubwo ahetse abantu barimo n’abana, ariruka nk’umusazi ntazi aho ava n’aho ajya. Ejo bundi hari uwo bambwiye saa tanu z’amanywa hano mu mujyi yakoze impanuka kubera urwagwa rwinshi.”

Perezida Kagame yavuze ko hakenewe imbaraga nyinshi mu gutanga no gusuzuma ibyangombwa byo gutwara imodoka ndetse n’imodoka zigasuzumwa cyane kugira ngo impanuka zigabanyuke.

Guhera muri Gicurasi uyu mwaka Polisi y’u Rwanda yatangije ubukangurambaga bwiswe ‘Gerayo Amahoro’ buzamara ibyumweru 52.

Bwitezweho kugabanya impanuka zikorerwa hirya no hino mu mihanda ndetse bukanasobanurira abaturage n’abatwara ibinyabiziga amategeko bakwiye gukurikiza hagamijwe kurwanya izo mpanuka.

Perezida Kagame yavuze ko guhohotera abagore bitari mu muco nyarwanda, nyamara ngo bikomeje gufata indi ntera
Abanyamuryango ba FPR Inkotanyi basaga ibihumbi bibiri nibo bitabiriye inama ya biro politiki ya FPR Inkotanyi
Perezida Kagame yavuze ko nubwo impanuka zidashobora gucika burundu, hari uburyo bwo kuzigabanya kuko ubuzima bw’umunyarwanda umwe bugiye ari igihombo gukomeye.

Amafoto: Niyonzima Moïse na Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza