Perezida Kagame yakomoje ku biganiro byagejeje ku ifungurwa rya CMU Africa mu Rwanda (Video)

Yanditswe na Rabbi Malo Umucunguzi
Kuya 21 Ugushyingo 2019 saa 01:35
Yasuwe :
0 0

Perezida Paul Kagame yagaragaje ko hari abantu bamwe batumvaga ko igihugu nk’u Rwanda cyatangizwamo kaminuza ikomeye nka Carnegie Mellon University, yahashyize icyicaro cyayo gikomeje gifasha Abanyafurika guhanga abahanga mu ikoranabuhanga.

Yabigarutseho kuri uyu wa Kane ubwo hafungurwaga ku mugaragaro icyicaro gishya cya Carnegie Mellon Africa, cyubatswe mu cyanya cyahariwe inganda i Masoro, mu mushinga uzaba ugizwe n’ibigo bikomeye wiswe Kigali Innovation City.

Wari umunsi ukomeye kuko ugaragaza intambwe ikomeye imaze guterwa mu myaka irindwi ishize, kuko CMU Africa imaze kurangizamo abanyeshuri 196 bakomoka mu bihugu 19. Bari bavuye ku banyeshuri 20 batangiranye nayo mu 2012.

Perezida Kagame yavuze ko ubwo u Rwanda rwongeraga kwiyubaka nyuma ya Jenoside yakorewe Abatutsi mu 1994, urwego rw’uburezi ari rumwe mu zo byabonekaga ko rugomba kongererwa imbaraga kuko abahanga bakenewe batari bahagije.

Bumwe mu buryo bwifashishijwe kwari ukohereza abanyeshuri kwiga mu mahanga, bamwe boherezwa mu Buhinde, Afurika Epfo, mu Burayi, Leta Zunze Ubumwe za Amerika n’ahandi.

Yakomeje ati “Mu gihe igihugu cyari gikomeje kujya ku murongo, tugenda tubona ubushobozi buduturutsemo ndetse n’abafatanyabikorwa bacu, twaravuze ngo mu gihe tugerageza gukemura ibibazo bitandukanye, kuki tutashyira izo nzego z’uburezi hano mu Rwanda, kugira ngo uko twohereza abantu kwiga mu mahanga, tunagire inzego hano zafata abandi banyeshuri, ni uko ibiganiro byatangiye.”

Yavuze ko habaye ibiganiro n’ubuyobozi bwa Carnegie Mellon University i Pittsburgh mur Leta Zunze Ubumwe za Amerika, abayobozi bayo bagiye basimburana bashyigikira icyo gitekerezo.

Yagize ati “Ntabwo abantu bose bumvaga ko bizakunda, bamwe batekerezaga ko ari uguta umwanya, ariko hari abandi benshi batekerezaga ko bizafasha kandi bakora ibishoboka byose kugeza ubwo ibi tubona uyu munsi bigezweho.”

“ Ubwo twateraga intambwe hanabayeho gutekereza uko urwego nk’uru rukomeye ku isi Carnegie Mellon yari yemeye gutangiza hamwe natwe, rutafasha u Rwanda gusa ahubwo bikaba umugabane wose, ari nayo mpamvu ubu tubona urubyiruko rwinshi rwavuye muri Ghana, ibice bitandukanye by’umugabane wacu.”

Perezida Kagame yashimiye ubuyobozi bwa CMU bwagiriye icyizere u Rwanda, na buri wese wagize uruhare mu bufatanye bwatumye iyi kaminuza itangira mu Rwanda, bigizwemo uruhare n’abarimo MasterCard Foundation na Smart Africa, kimwe na Banki Nyafurika Itsira Amajyambere yatanze amafaranga yo kubaka iki cyicaro.

Yagaragaje ko ari amahirwe kuba aba banyeshuri bigira muri Afurika, ari nawo mugabane ufite ibibazo abarangiza hano bagomba gushakira umuti.

Umuyobozi Mukuru wa CMU Africa, Prof Vijayakumar Bhagavatula yavuze ko bishimishije kuba bimukiye mu cyicaro gishya nyuma y’igihe bakorera muri Telecom House ku Kacyiru.

Ni icyicaro gifite amashuri menshi kurushaho, byose bigamije gutuma nk’abanyeshuri bari mu Rwanda babasha kubona amasomo atangirwa mu mujyi wa Pittsburgh muri Leta ya Pennsylvania aho Carnegie Mellon University ifite icyicaro gikuru, ndetse n’abanyeshuri bari Pittsburgh bagafata amasomo yigishirizwa mu Rwanda.

Ati “Hari umwanya wafasha abashaka gukurikirana inzozi zabo mu bijyanye n’ikoranabuhanga, hari umwanya wagenewe Kigali Collaborative Research Center, ikigo cy’ubushakashatsi kigamije guhuriza hamwe abashakashatsi ba CMU Africa na CMU Pittsburgh n’ab’ahandi kugira ngo bakore ubushakashatsi ku bibazo bigaragara muri Afurika.”

“Iyi nyubako izadufasha kurushaho guhugura Abanyarwanda n’abanyeshuri b’abanyafurika ku bintu by’ingenzi mu ikoranabuhanga nka software engineering, ubwenge bw’ubukorano (Artificial Intelligence), mudasobwa, umutekano w’ikoranabuhanga n’ibijyanye n’ingufu.”

Minisitiri w’Uburezi, Dr Eugene Mutimura, yavuze ko CMU Africa imaze mu Rwanda igihe kitaragera ku myaka icumi, ariko umusaruro wayo umaze kuba mwinshi, ndetse mu bayizemo Abanyarwanda bihariye 51%.

Yavuze ko ubumenyi butangirwa muri iyi kaminuza ari ingenzi ku iterambere ry’imibereho n’ubukungu mu Rwanda na Afurika. Yavuze ko u Rwanda rwanamaze gushyiraho Ikigega gifasha abahanga udushya, ndetse uyu mushinga umaze gufasha inzego 15 mu nzego zitandukanye.

Perezida wa CMU Africa, Farnam Jahanian, yashimiye Perezida Kagame ku miyoborere myiza akomeje kugaragaza, ari nayo yatumye umushinga wa Carnegie Mellon Africa ubasha kugerwaho.

Yakomeje ati “Ifungurwa ry’iki cyicaro gishya rigaragaza intambwe ikomeye kuri Carnegie Mellon mu Rwanda ndetse no ku Isi yose, inyubako ya mbere nk’iyi muri Kigali Innovation City izafasha abakozi ba CMU Africa ndetse n’abanyeshuri, kandi byihutishe iterambere mu bijyanye n’ikoranabuhanga ndetse na engineering.”

Yavuze ko uburezi ari ikintu cy’ingenzi muri sosiyete gituma habaho ugutera imbere kw’imibereho, ubukungu n’ibindi, ku buryo bijyanye n’ubukungu bwa none bwubatse ku bumenyi, uburezi ari ingenzi cyane, bikaba umwihariko iyo bigeze kuri Afurika.

Ibyo bikaba akarusho kubera ko binamaze kugaragara ko abitabira aya masomo ya CMU bamaze kwikuba gatatu kuva yatangira mu Rwanda, ndetse bigaragara ko abarangiza, nibura 90% by’abarangiza muri iyi kaminuza baguma muri Afurika, bakagira uruhare mu guteza imbere ikoranabuhanga muri uyu mugabane ndetse bakahashyira ishoramari ryabo.

Bibarwa kandi ko mu myaka nibura icumi iri imbere, abahanga mu ikoranabuhanga basaga 800 bazaba bamaze kurangiza muri CMU Africa, bakarushaho guteza imbere uyu mugabane, bagasanga abandi 120 000 barangije muri CMU bo mu bihugu 144.

Perezida Kagame na Perezida wa CMU, Farnam Jahanian bafungura icyicaro cy'iyi kaminuza muri Afurika
Byari ibyishimo bikomeye ku bayobozi bombi kubera intambwe itewe mu bikorwa bya Carnegie Mellon University muri Afurika
Abayobozi bafashe ifoto y'urwibutso nyuma yo gufungura iki cyicaro ku mugaragaro
Perezida Kagame amurikirwa bimwe mu byigishirizwa muri iyi kaminuza
Perezida Kagame na Perezida wa CMU Africa, Farnam Jahanian berekeza ahabereye ibiganiro nyuma yo gufungura iyi kaminuza ku mugaragaro

Amafoto: Niyonzima Moise

Video: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .