Amakuru dukesha Village Urugwiro avuga ko ibi biganiro byabaye kuri uyu wa Kane tariki 19 Gicurasi 2022.

Ku ruhande rw’u Rwanda byanitabiriwe n’Umunyamabanga wa Leta muri Minisiteri y’Ububanyi n’Amahanga, ushinzwe Umuryango wa Afurika y’Iburasirazuba, Prof Nshuti Manasseh ndetse n’Umunyamabanga Mukuru w’Urwego rushinzwe iperereza n’Umutekano, Gen Maj Joseph Nzabamwita.

Amb. Bankole Adeoye agiriye uruzinduko mu Rwanda mu gihe Umugabane wa Afurika ukomeje guhangana n’ibibazo by’umutekano muke byamaze kuba akarande.

Umuryango wa Afurika Yunze Ubumwe uherutse gutangaza ko uteganya gukoresha imbaraga za gisirikare mu kurwanya inyeshyamba kuri uyu mugabane.

Icyifuzo cya Komisiyo ya AU ishinzwe ibibazo bya politiki, amahoro n’umutekano, yagaragaje ko gahunda ya Loni isanzwe ikoreshwa yo kubungabunga amahoro, bitagihagije ku bibazo by’umutekano bihora bivuka muri Afurika.

Amb. Bankole Adeoye aherutse gutangaza ko uyu mugabane ukeneye guhindura uko ibintu bikorwa, ingabo zigakoresha imbaraga za gisirikare mu bikorwa byo kurwanya no gukumira imitwe yitwaje intwaro. Ibi akaba yabitangaje ubwo yagezaga raporo ku Nteko rusange ya AU muri Gashyantare.

Iyi komisiyo igaragaza ko gahunda isanzweho yo kubungabunga amahoro itazabasha kugeza ku mahoro arambye mu bihugu byugarijwe cyane n’abarwanyi nka Somalia ndetse n’agace ka Sahel.

Kuri uyu munsi Perezida Kagame kandi yanakiriye mu biro bye Intumwa yihariye akaba n’umujyanama mu Bwami bwa Arabie Saoudite, Ahmed A. A. Kattan.

Ibiganiro byabo bombi byibanze ku buryo bwo kurushaho gushimangira umubano n’ubutwererane iki gihugu gifitanye n’u Rwanda.

Perezida Paul Kagame yakiriye Amb. Bankole Adeoye, Komiseri wa AU ushinzwe Politike, Amahoro n’Umutekano mu Muryango wa Afurika Yunze Ubumwe

Ibi biganiro byagarutse ku kibazo cy’umutekano muri Afurika byanitabiriwe n'abandi bayobozi barimo Prof Nshuti Manasseh ndetse na Gen Maj Joseph Nzabamwita

Perezida Kagame yanakiriye Intumwa yihariye akaba n’umujyanama mu Bwami bwa Arabie Saoudite, Ahmed A. A. Kattan