00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yakiriye Umuyobozi Mukuru wa AUDA-NEPAD

Yanditswe na Igizeneza Jean Désiré
Kuya 20 Mutarama 2023 saa 10:56
Yasuwe :

Perezida Paul Kagame yakiriye Umuyobozi Mukuru w’Urwego rw’Umuryango wa Afurika Yunze Ubumwe Rushinzwe Iterambere, AUDA-NEPAD, Nardos Bekele-Thomas bagirana ibiganiro ku gicamunsi cyo kuri uyu wa 20 Mutarama 2023.

Ubutumwa bwanyujijwe kuri Twitter y’Ibiro by’Umukuru w’Igihugu buvuga ko bagiranye ibiganiro bijyanye no kurebera hamwe aho imirimo y’uru rwego igeze ishyirwa mu bikorwa.

Nardos Bekele-Thomas yakiriwe na Perezida Kagame nyuma y’umunsi umwe yakiriwe na none na Perezida wa Kenya, William Ruto.

Uyu muyobozi ari kugirana ibiganiro n’abakuru b’ibihugu mu gihe hasigaye iminsi itarenze 11 ngo habe inama izahuza abagize uru rwego ndetse n’Abanya-Afurika muri rusange mu rwego rwo kwigira hamwe uko uyu mugabane watera imbere mu nguni zitandukanye.

Iyi nama izabebera i Dakar muri Senegal ku wa 01-03 Mutarama 2023, ikaziga uburyo imishinga igamije kubaka ibikorwaremezo bihuriweho yakomeza kwihutishwa.

Biteganyijwe ko abafatanyabikorwa bazagira igihe gihagije cyo kuganira ku cyakorwa mu gushyira imbaraga mu ishyirwa mu bikorwa ry’imishinga nyamukuru izagira uruhare mu guhindura Afurika ikize ku bikorwaremezo bizatuma ifatanyiriza hamwe mu kwimakaza ubukungu buhuriweho.

Muri Kamena 2022 kandi Nardos Bekele-Thomas nabwo yakiriwe na Perezida Kagame bagirana ibiganiro ku ngamba zo kuzamura ubukungu bushingiye ku kwihuza kw’ibihugu.

Byari nyuma y’ukwezi kumwe Nardos Bekele-Thomas ahawe inshingano zo kuyobora AUDA-NEPAD aho yari yemejwe n’abakuru b’ibihugu byo mu muryango wa Afurika Yunze Ubumwe mu nama idasanzwe yabahuje muri Gashyantare 2022.

Ni we mugore wa mbere wahawe inshingano nk’izi asimbuye Dr. Ibrahim Assane Mayaki. Yahoze ari Umuhuzabikorwa wa Loni anahagarariye Umunyamabanga Mukuru muri Afurika y’Epfo.

Ubwo yatangiraga imirimo ye, Nardos Bekele-Thomas yashimiye umuyobozi wa NEPAD, Perezida Kagame, Perezida wa Komisiyo ya Afurika Yunze Ubumwe, Moussa Faki Mahamat yizeza ko ibyo yitezweho biri ku rwego rwo hejuru.

Perezida Kagame ni Umuyobozi w’Akanama k’abakuru b’ibihugu kiga ku cyerekezo cy’urwego rw’Umuryango wa Afurika Yunze Ubumwe rushinzwe iterambere (AUDA-NEPAD) kuva mu 2020.

AUDA-NEPAD yashinzwe mu buryo bwo kwimakaza intego ya Afurika y’uko mu 2063 uyu mugabane uzaba warageze ku iteramberere rirambye, ubuyobozi budaheza n’amahoro aho nta nzara n’intugunda byakongera kugaragara mu baturage bityo guhora iteze amaboko ku yindi migabane bigashyirwaho akadomo.

Perezida Kagame yakiriye Umuyobozi Mukuru wa AUDA-NEPAD bagirana ibiganiro
Perezida Kagame yakiriye Umuyobozi Mukuru wa AUDA-NEPAD, Nardos Bekele Thomas ari kumwe n'abandi bayobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .