Perezida Kagame yakiriye intumwa za Ethiopia mu gihe intambara ya Tigray ikomeje gufata indi ntera

Yanditswe na Philbert Girinema
Kuya 18 Ugushyingo 2020 saa 09:52
Yasuwe :
0 0

Perezida wa Repubulika Paul Kagame yakiriye muri Village Urugwiro intumwa za Ethiopia, ziyobowe na Minisitiri w’Intebe wungirije akaba na Minisitiri w’Ububanyi n’Amahanga, Demeke Mekonnen, zimusobanurira imiterere y’ikibazo cy’umutekano muke gihanganishije leta n’Intara ya Tigray.

Ku gicamunsi cyo kuri wa Kabiri nibwo Minisitiri Demeke Mekonnen yageze mu Rwanda, agirana ibiganiro na Minisitiri w’Ububanyi n’Amahanga w’u Rwanda, Dr Vincent Biruta, byanitabiriwe n’Umunyamabanga Mukuru w’Urwego rushinzwe Iperereza n’Umutekano (NISS), Gen Maj Joseph Nzabamwita.

Impamvu y’uru ruzinduko ni ukuganira n’u Rwanda ku kibazo cy’umutekano muke kimaze iminsi kivugwa muri Ethiopia, aho Ingabo za Guverinoma zishyamiranye n’iza Leta y’agace ka Tigray.

Mu biganiro Perezida Kagame yagiranye na Minisitiri Mekonnen, yamugararije ko yifuza ko amahoro n’umudendezo byagaruka muri Ethiopia mu gihe cya vuba.

Hashize iminsi mike muri Ethiopia hatangiye imirwano, ubuyobozi bwa Minisitiri w’Intebe Abiy Ahmed ntibwumvikana n’ubw’Intara ya Tigray iherereye mu Majyaruguru y’Igihugu byanatumye ingabo z’impande zombi zikozanyaho, ubu hari ubwoba ko mu gihe ibintu byakomeza n’abasivili benshi babigenderamo.

Imvano y’amakimbirane

Mu ntangiriro z’uku kwezi, Abiy yashinje abasirikare bo muri Tigray ko bagabye igitero ku birindiro bya gisirikare bya guverinoma.

Yahise na we yohereza ingabo muri ako gace kayoborwa n’ishyaka TPLF, Tigray People’s Liberation Front. Ni ishyaka ryigeze kugira ijambo rikomeye mu gihugu mu bihe byashize.

Hashize iminsi Abiy yavugiye kuri Televiziyo y’Igihugu ko Ingabo za Ethiopia zagabye igitero muri iyi ntara, zigashwanyaguza ahari ububiko bw’intwaro hafi y’Umurwa Mukuru w’ako gace, Mekele.

Hashize iminsi mike, Amnesty International yatangaje ko hari abaturage bishwe bicishijwe imihoro n’ibyuma mu gace ka Mai-Kadra, gusa ntiyigeze ivuga uruhande rwaba rubiri inyuma. Bivugwa ko muri icyo gitero hiciwemo abaturage benshi bataratangazwa umubare.

Mu cyumweru gishize, Ingabo za Tigray zagabye igitero cya missile muri Eritrea, ni mu gihe kuva Minisitiri w’Intebe Abiy yajya ku butegetsi yakoze ibishoboka byose kugira ngo Eritrea na Ethiopia bibane neza mu mahoro, ibintu byanamuhesheje igihembo cy’amahoro cyitiriwe Nobel mu 2019. Eritrea ihana imbibi n’agace ka Tigray.

Umuyobozi w’agace ka Tigray, Debretsion Gebremichael, yatangaje ko Eritrea yohereje ingabo n’ibifaru ku mupaka bigamije gutera ingabo mu bitugu Guverinoma ya Ethiopia. Yavuze ko ibisasu byarashwe muri Eritrea byari bigamije gusubiza inyuma ingabo zayo.

Ubu bushyamirane bwahise butuma amagana y’abaturage bo muri ako gace bahungira muri Sudani.

Abiy abinyujije ku rukuta rwa Twitter, ku wa Mbere w’iki Cyumweru yatangaje ko Guverinoma ye yiteguye kwakira kandi igatuza neza abaturage bahungiye mu bihugu by’abaturanyi. Yavuze ko abizeza umutekano. Ku munsi wakurikiyeho yahise atangaza ko Ingabo za Ethiopia zigiye gukomeza “mu cyiciro cya nyuma kandi cy’ingenzi” cy’ibikorwa bya gisirikare.

Kuva mu 2018 umwuka mubi watutumbye mu gihugu hagati ya Abiy n’abayobozi ba TPLF. Nka Minisitiri w’Intebe, Abiy yakuyeho impuzamashyaka yari imaze igihe kinini iyoboye igihugu iyobowe na TPLF, ashinga ishyaka rishya yise iry’uburumbuke, Prosperity Party.

Abasesenguzi batangaza ko ibyo byatumye TPLF yisanga igomba kwiyunga kuri Prosperity Party ikayigezaho gahunda zayo, bitaba ibyo ikava mu nzira. TPLF yahisemo kutiyunga kuri Prosperity Party.

Uyu mwaka ubwo Abiy yasubikaga amatora kubera icyorezo cya Coronavirus, abayobozi bo muri Tigray bigometse kuri uwo mwanzuro, hanyuma bo bakora amatora yabo. Abiy yahise yanga kwemera ibyavuye muri ayo matora yakozwe muri Nzeri, bituma umwuka ukomeza kuba mubi.

Mu Ukwakira uyu mwaka, abagize Inteko Ishinga Amategeko muri Ethiopia bafashe umwanzuro wo kwambura inkunga yari igenewe aka gace, biza gukomeza kwenyegeza umwuka mubi.

Mu gihe umwuka mubi wakomeza ugafata intera, ari nacyo kintu giteye ubwoba muri iki gihe, birashoboka ko akarere kose kahura n’ibibazo ku buryo umubare munini w’abaturage bava mu byabo, aho habarwa abagera kuri miliyoni 110 bahunga.

Ubu abageze mu bihumbi 25 bamaze guhungira muri Sudani.

Perezida Kagame yagiranye ibiganiro na Minisitiri w’Intebe wungirije wa Ethiopia akaba na Minisitiri w’Ububanyi n’Amahanga, Demeke Mekonnen ku kibazo cy’umutekano muke kiri muri Ethiopia
Ibiganiro bya Perezida Kagame na Minisitiri w’Intebe wungirije wa Ethiopia akaba na Minisitiri w’Ububanyi n’Amahanga, Demeke Mekonnen, byitabiriwe na Minisitiri w’Ububanyi n’Amahanga w’u Rwanda, Dr Vincent Biruta (ibumoso) na Ambasaderi wa Ethiopia mu Rwanda, Lulit Zewdie Gebremariam (wa kabiri ibumoso)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .