Perezida Kagame yakiriye intumwa yihariye ya Perezida Ramaphosa wa Afurika y’Epfo

Yanditswe na IGIHE
Kuya 18 Ukwakira 2019 saa 10:11
Yasuwe :
0 0

Perezida Paul Kagame, kuri uyu wa Gatanu yakiriye Jeff Radebe, uheruka kugirwa intumwa yihariye ya Perezida wa Afurika y’Epfo, Cyril Ramaphosa, ngo amenyeshe ibihugu bitandukanye bya Afurika ingamba igihugu cye cyafashe ku kibazo cy’ibikorwa, mu minsi ishize byibasiye abanyamahanga b’Abanyafurika bakoreraga muri icyo gihugu.

Radebe wahoze ari Minisitiri w’Ingufu akaba ari n’Umuyobozi ukomeye mu ishyaka ANC riri ku butegetsi, yageze mu Rwanda mu gihe mu minsi ishize yagiye mu bindi bihugu birimo Ghana, akagirana ibiganiro na Perezida Nana Akufo-Addo.

Ibikorwa byo kwibasira abanyamahanga byabaye cyane mu duce twa Gauteng na Western Cape, byibasira abarimo Abanya-Nigeria, nabo bihimura ku bikorwa bya Afurika y’Epfo i Lagos.

Uretse iyi ngingo yo kwibasira abimukira, muri iki gihe hari ingingo nyinshi zireba umubano w’u Rwanda na Afurika y’Epfo zitabura kuganirwaho igihe ibihugu byombi byahuye.

Nubwo umubano w’u Rwanda na Afurika y’Epfo ugenda ugarura isura, hari ibitaranoga kuko nyuma yo kurangiza inshingano kwa Ambasaderi George Nkosinati Twala muri Gashyantare 2019, Afurika y’Epfo nta ambasaderi ifite i Kigali.

Ibyo bikiyongeraho ko Afurika y’Epfo ari nacyo icumbikiye Kayumba Nyamwasa ukuriye ishyaka rya RNC n’Umutwe w’abarwanyi wa P5, uhuriweho n’amashyaka atanu arwanya Leta y’u Rwanda.

Uyu mutwe wakomeje gutegura ibikorwa bigamije guhungabanya umutekano w’u Rwanda no kugirira nabi ubutegetsi buriho ndetse bamwe mu bari bawugize barimo umuyobozi wabo Rtd Major Mudathiru Habib, barimo kuburanishwa n’inkiko za gisirikare mu Rwanda, nyuma yo gufatwa n’ingabo za RDC, abandi bakishyikiriza MONUSCO.

Kugeza ubu kandi Abanyarwanda bakomeje kugorwa no kubona viza zo kwerekeza muri Afurika y’Epfo, ikibazo Perezida w’icyo gihugu, Cyril Ramaphosa aheruka kuvuga ko kigiye gukemurwa, ariko imyaka igihe kuba ibiri bitarashoboka.

Mu gihe byatangazwaga ko ikibazo kigomba kuganirwaho na ba Minisitiri w’Ububanyi n’Amahanga b’ibihugu byombi, ibintu byarushijeho kuzamba mu mpera z’umwaka ushize ubwo Lindiwe Sisulu wari Minisitiri w’Ububanyi n’Amahanga wa Afurika y’Epfo, yatangazaga ko yagiranye ibiganiro na Kayumba Nyamwasa, amusaba ibitekerezo ku mugambi w’icyo gihugu wo kuganira n’u Rwanda, hagamijwe kuzahura umubano hagati y’ibihugu byombi.

Ibyo biganiro byarakaje Guverinoma y’u Rwanda kuko Kayumba afatwa nk’umunyabyaha wakatiwe n’inkiko z’u Rwanda, byongeye Afurika y’Epfo ikaba yarahuye na we itabanje kubiganirizaho u Rwanda. Muri Gicurasi uyu mwaka Sisulu yasimbujwe kuri uwo mwanya Naledi Pandor wari usanzwe ari Minisitiri w’Amashuri Makuru.

Muri Werurwe 2014 nibwo Afurika y’Epfo yahagaritse by’agateganyo Visa zahabwaga Abanyarwanda berekeza muri icyo gihugu bakoresheje pasiporo zisanzwe. Muri icyo gihe Afurika y’Epfo yanirukanye abadipolomate b’u Rwanda batatu i Pretoria, u Rwanda narwo rwirukana batandatu ba Afurika y’Epfo i Kigali.

Icyo gihe u Rwanda rwashinjaga Afurika y’Epfo gucumbikira abari inyuma y’ibikorwa byo gutera ibisasu mu Rwanda bigahitana inzirakarengane, Afurika y’Epfo yo ikavuga ko yirukanye abadipolomate b’u Rwanda ibashinja kuba inyuma y’igitero cy’abantu bitwaje intwaro bigeze gutera mu rugo rwa Kayumba Nyamwasa wahungiye muri icyo gihugu.

Uyu ahari nk’impunzi ariko akahakorera ibikorwa bya politiki nyamara ubusanzwe bitemewe mu mategeko y’icyo gihugu.

Nyuma y’icyo gihe hagiye hageragezwa ibiganiro hagategerezwa ko byazatanga umusaruro ariko ntibishoboke, ugasanga Abanyafurika y’Epfo boroherwa no kuza mu Rwanda ariko Abanyarwanda bashaka kujyayo bikagorana.

Ku buyobozi Jacob Zuma uheruka kwegura n’ubu agikurikiranyweho ibyaha bya ruswa, ibihugu byombi byagerageje kuganira ariko ntihagira umuti uboneka, icyizere kiza kuzamuka ku bwa Ramaphosa, nubwo ibiganiro butaratanga umusaruro.

Perezida Paul Kagame aramukanya na Jeff Radebe wagizwe Intumwa yihariye ya mugenzi we wa Afurika y’Epfo, Cyril Ramaphosa
Perezida Kagame asuhuza umwe mu baherekeje Intumwa yihariye ya Perezida Ramaphosa wa Afurika y’Epfo
Perezida Paul Kagame, kuri uyu wa Gatanu yakiriye Jeff Radebe, uheruka kugirwa intumwa yihariye ya Perezida wa Afurika y’Epfo, Cyril Ramaphosa
Uru rugendo rufite intego yo kumenyesha ibihugu bitandukanye bya Afurika ingamba igihugu cye cyafashe ku kibazo cy’ibikorwa, mu minsi ishize byibasiye abanyamahanga b’Abanyafurika bakoreraga muri Afurika y'Epfo
Perezida Kagame na Jeff Radebe bafashe ifoto y'urwibutso n'abari babagaragiye nyuma y'ibiganiro bagiranye

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza