Perezida Kagame yakiriye intumwa yamushyikirije ubutumwa bwa Museveni ku mubano n’u Rwanda

Yanditswe na Philbert Girinema
Kuya 30 Ukuboza 2019 saa 12:00
Yasuwe :
0 0

Perezida Kagame yakiriye Intumwa ya Perezida Museveni yari itwaye ubutumwa bw’uyu mukuru w’igihugu buvuga ku mubano w’ibihugu byombi.

Intumwa ya Museveni yakiriwe na Perezida Kagame ku mugoroba wo kuri iki Cyumweru tariki ya 29 Ukuboza 2019 ni Ambasaderi Adonia Ayebare usanzwe ari Intumwa ihoraho ya Uganda mu Muryango w’Abibumbye i New York.

Ubutumwa bwanyujijwe ku rukuta rwa Twitter rw’Ibiro by’Umukuru w’Igihugu bugira buti “Kuri uyu mugoroba muri Village Urugwiro, Perezida Kagame yagiranye ibiganiro bitanga icyizere na Ambasaderi Adonia Ayebare, intumwa ya Perezida Museveni, wakoze urugendo rugana i Kigali afite ubutumwa bureba umubano w’ibihugu byombi.”

Iyi ntumwa igiriye uruzinduko mu Rwanda nyuma y’ibyumweru bibiri i Kampala habereye inama ya kabiri yiga ku ishyirwa mu bikorwa ry’amasezerano ya Luanda agamije guhosha umwuka mubi hagati y’ibihugu.

Iyi nama yabaye ikurikira iyari yabereye mu Rwanda muri Nzeri, ariko nyuma y’amasaha agera ku munani intumwa z’ibihugu byombi ziri mu biganiro i Kampala, habuze umwanzuro.

Umunyamabanga wa Leta muri Minisiteri y’Ububanyi n’Amahanga, Nduhungirehe Olivier, wari uyoboye intumwa z’u Rwanda yagaragaje ko hakiri ibikibangamiye Abanyarwanda muri Uganda ndetse umutekano wabo utizewe.

Yagize ati “Twaganiriye kandi twatanze amakuru, twatanze n’amazina, bagenzi bacu muri Uganda bijeje gusuzuma amakuru twabahaye kuko nk’u Rwanda twizera ko ibi ari byo zingiro ry’ikibazo gihari ariko twakiganiriyeho.’’

“Twaganiriye no ku kibazo cy’Abanyarwanda batabwa muri yombi, bagafungwa binyuranye n’amategeko ndetse bagakorerwa iyicarubozo. Nta kigaragara twemeranyije kuri iki kibazo ariko tuzakomeza kukivugaho.’’

Nyuma y’ibi biganiro, impande zombi zanzuye ko kuko gufata umwanzuro byananiranye, hazitabazwa abakuru b’ibihugu byombi akaba aribo batanga umurongo wo gukurikiza mu gushaka umuti w’ibibazo mu mubano w’ibihugu.

U Rwanda rushinja Uganda ko ifunga Abanyarwanda mu buryo bunyuranyije amategeko, bagakorerwa iyicarubozo, abandi bagahohoterwa nyuma bakajugunwa ku mipaka bagizwe intere.

Harimo kandi kuba Uganda ibangamira ibikorwa by’ubucuruzi by’u Rwanda ndetse igafasha n’imitwe y’iterabwoba igamije guhungabanya umutekano warwo irimo RNC, FDLR n’indi.

Ku rundi ruhande, rwagaragarije Uganda ko nta mutwe n’umwe rwigeze rushyigikira ugamije guhungabanya umutekano wa Uganda, kandi nta muturage wa Uganda ufungiwe mu Rwanda mu buryo bunyuranyije n’amategeko bityo ko ikwiye kugira ubushake nayo ikabigenza gutyo.

Kuva aho inama ya Kigali yiga ku masezerano ya Luanda ibereye, Abanyarwanda 99 nibo bari bamaze kujugunywa ku mipaka ihuza u Rwanda na Uganda kugeza mu ntangiriro za Ukuboza mu gihe kuva uyu mwaka watangira ari 588.

Kuva muri Mutarama 2018, abanyarwanda 1438 nibo bajugunywe ku mipaka nyuma y’igiye bafungiwe muri kasho z’Urwego Rushinzwe Iperereza rya Gisirikare (CMI) n’Urwego Rushinzwe Iperereza mu gihugu (ISO) bakorerwa iyicarubozo.

Perezida Kagame yakiriye Amb Adonia Ayebare usanzwe ari Intumwa ihoraho ya Uganda mu Muryango w’Abibumbye i New York wari ufite ubutumwa bwa Perezida Museveni ku mubano w'ibihugu byombi

Inkuru bifitanye isano: Inama y’u Rwanda na Uganda yasojwe nta mwanzuro nyuma y’ibiganiro by’amasaha umunani


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .