Perezida Kagame yakiriye impapuro za ba ambasaderi bashya 10 (Amafoto)

Yanditswe na Cyprien Niyomwungeri
Kuya 29 Mutarama 2020 saa 09:10
Yasuwe :
0 0

Perezida Paul Kagame kuri uyu wa Gatatu yakiriye impapuro zemerera abadipolomate b’ibihugu 10 bemerewe kubihagararira mu Rwanda nka ba ambasaderi, barimo uw’u Buyapani, u Butaliyani n’abandi.

Aba ba ambasaderi barimo umwe ufite icyicaro mu Mujyi wa Kigali, babiri bafite icyicaro Dar es Salaam, batatu i Nairobi, babiri i Addis Ababa na babiri i Kampala muri Uganda.

Mu bakiriwe harimo Ambasaderi mushya w’u Buyapani, Masahiro Imai wasimbuye Takayuki Miyashita, wasoje manda ye. Nyuma yo gushyikiriza impapuro ze Umukuru w’Igihugu, Masahiro yavuze ko yishimiye gutangira ikinyacumi gishya cy’umubano w’ibihugu byombi.

Yavuze ko hashize imyaka 10 u Buyapani bufunguye Ambasade mu Rwanda, akaba yishimiye ko agiye gukomerera aheza umubano w’ibihugu byombi uhagaze, agaharanira ko urushaho kwiyongera.

U Buyapani ni umuterankunga ukomeye w’u Rwanda, aho nibura guhera mu 2008 kugeza mu 2017, bwahaye u Rwanda inkunga igera hafi kuri miliyoni $350 binyuze muri JICA.

Masahiro yavuze ko uyu mubano agiye kuwagurira no mu ishoramari, akazana ibigo byinshi byo mu Buyapani bigashora imari mu Rwanda.

Ati “Nasezeranyije Perezida kuzana ishoramari ryinshi ry’Abayapani mu Rwanda mu ngeri zitandukanye, ntitube gusa mu gutera inkunga. Ubucuruzi ni ingenzi muri iki gihugu no ku bigo by’Abayapani, ni akazi kanjye nyamukuru kuzana ibi bigo n’amafaranga y’Abayapani mu Rwanda ku nyungu z’ibihugu byombi.”

Avuga ko bagitekereza aho iryo shoramari ryakwerekeza yaba mu bijyanye n’ingufu, ibikorwa remezo by’amazi n’amashanyarazi, ubuzima, kubyaza umusaruro imyanda n’ibindi.

Kugeza ubu mu Rwanda hari ibigo 27 by’Abayapani bikora mu nzego zitandukanye. Iki gihugu kandi nyuma yo gufasha u Rwanda gukora icyogajuru ndetse kikoherezwa mu isanzure, uyu mushinga urakomeje aho harimo gukorwa n’icya kabiri.

Mugenzi we uhagarariye Malawi mu Rwanda ariko afite icyicaro i Dar es Salaam, Glad Chembe Munthali, yavuze ko inshingano ye ya mbere ari ugushimangira umubano uri hagati y’ibihugu byombi ku nyungu z’abaturage babyo.

Yasabye abaturage b’ibihugu byombi gukorana ubucuruzi n’ishoramari dore ko bifite byinshi byahahirana.

Ati “Muri Malawi dufite soya, ubunyobwa, umuceri mwiza, ibisheke n’ibindi. Malawi ifite ubukungu buhagaze neza mu bijyanye n’ubuhinzi, tweza byinshi bishobora kuza mu Rwanda ariko twiteze na byinshi bituruka mu Rwanda, ni kimwe mu byo dushaka guteza imbere.”

Ambasaderi w’u Butaliyani mu Rwanda ufite icyicaro i Kampala muri Uganda, Massimiliano Mazzanti, yashimye umubano n’ubufatanye bisanzwe hagati y’ibihugu byombi cyane cyane mu bijyanye n’umutekano.

Mu 2017, Polisi y’u Rwanda n’iy’u Butaliyani (Carabinieri), basinyanye amasezerano y’ubufatanye mu myitozo no gusangira ubunararibonye.

Polisi y’u Butaliyani yafashije iy’u Rwanda mu myitozo ku kurwanya iterabwoba, guhugura abarinda Pariki y’Ibirunga, gutoza abakoresha imbwa zisaka ibisasu n’ibindi bitemewe, kubungabunga umudendezo w’abantu, gucunga umutekano wo mu muhanda n’ibindi.

Ambasaderi Massimiliano Mazzanti yavuze ko barimo no kureba uko ubu bufatanye bwakwinjira no mu bijyanye n’inganda, kongerera agaciro ibikomoka ku buhinzi, ibijyanye n’ubwubatsi nk’ibirahuri n’isakaro ndetse n’ubukerarugendo.

Abandi batanze impapuro zabo ni Riitta Swan uhagarariye Finland, Peter Joseph Francis wa Sierra Leone, Zakariaou Adam Maiga wa Niger, Zurab Dvalishvili wa Georgia, Ganou Diaby Kassamba Madina wa Burkina Faso, Nicolaj Abraham Hejberg Petersen wa Denmark na Martin Klepetko wa République Tchèque.

Ambasaderi Riitta Swan uhagarariye Finland mu Rwanda ubwo yari avuye gushyikiriza Perezida Kagame impapuro
Ambasaderi Riitta Swan azaba afite icyicaro i Dar es Salaam muri Tanzania
Ambasaderi mushya w’u Buyapani, Masahiro Imai yavuze ko yifuza kuzana abashoramari benshi mu Rwanda
Ambasaderi mushya w’u Buyapani, Masahiro Imai azaba afite icyicaro i Kigali
Ambasaderi wa Malawi mu Rwanda Glad Chembe Munthali afite icyicaro i Dar es Salaam
Ambasaderi Glad Chembe Munthali avuga ko yifuza ko Abanyarwanda n'Abanya-Malawi bahahirana kandi bagashora imari
Ambasaderi wa Sierra Leone mu Rwanda Peter Joseph Francis azaba afite icyicaro i Nairobi
Ambasaderi Peter Joseph Francis avuga ko yizeye ko umubano w'ibihugu byombi uzabyara umusaruro
Ambasaderi wa Niger mu Rwanda Zakariaou Adam Maiga avuga ko azubakira ku mubano uri hagati y'abakuru b'ibihugu byombi
Ambasaderi Zurab Dvalishvili wa Georgia mu Rwanda avuga ko hari amateka ibihugu byombi bisangiye azubakirwaho mu mubano wabyo
Amb. Zurab Dvalishvili afite icyicaro i Addis Ababa muri Ethiopie
Ambasaderi Ganou Diaby Kassamba Madina wa Burkina Faso mu Rwanda
Ambasaderi Ganou Diaby Kassamba Madina avuga ko u Rwanda ari icyitegererezo n'urugero ku banyafurika
Ambasaderi w’u Butaliyani mu Rwanda Massimiliano Mazzanti afite icyicaro i Kampala muri Uganda
Ambasaderi w'u Butaliyani mu Rwanda Massimiliano Mazzanti yashimye ubufatanye bwa Polisi y'u Rwanda n'iy'igihugu cye
Ambasaderi Nicolaj Abraham Hejberg Petersen uhagarariye Danmark mu Rwanda
Ambasaderi Nicolaj Abraham Hejberg Petersen yavuze ko umubano w'u Rwanda n'igihugu cye uzanibanda ku bucuruzi
Ambasaderi Martin Klepetko wa République Tchèque amaze gushyikiriza impapuro Umukuru w'Igihugu
Ambasaderi Martin Klepetko wa République Tchèque afite icyicaro i Nairobi

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza