Umukuru w’Igihugu yatangiye uruzinduko rwe muri Congo Brazaville ku wa Mbere w’iki Cyumweru. Rugamije gushimangira umubano mwiza uri hagati y’ibihugu byombi ndetse byitezwe ko hasinywa n’amasezerano ashimangira imikoranire.

Perezida Kagame yashimye mugenzi we wamutumiye, avuga ko mu myaka myinshi ishize, hubatswe umusingi ukomeye mu mubano w’ibihugu byombi ndetse n’amasezerano y’ubufatanye ateganyijwe gusinywa, ashimangira umubano mwiza uri hagati y’u Rwanda na Congo.

Umukuru w’Igihugu yavuze ko muri iki gihe cy’icyorezo cya Covid-19 n’ibindi bibazo, ibihugu bya Afurika bidakwiriye gukora byonyine.

Ati “Ni ku bw’iyo mpamvu, duha agaciro ubucuti buri hagati y’Abanyarwanda n’Abanye-Congo kandi Nyakubahwa Perezida, nishimira umubano dufitanye.”

Perezida Kagame yavuze ko ibihugu byombi bifite ubushobozi bwabibashisha guca ukubiri n’imbogamizi bishobora kuba byahura nazo kugira ngo byiyemeze iterambere ryihuse.

Yakomeje agira ati “Urugamba ruracyakomeje nk’uko bajya babivuga, hari imbogamizi nyinshi tugomba gukemura. Ndashaka kugushimira ku bw’umusanzu wawe kandi dushingiye kuri ibyo, twubatse ubushuti n’imikoranire ihamye.”

Ku munsi wa kabiri w’uruzinduko rwe, Perezida Kagame biteganyijwe ko agirana ibiganiro byihariye na mugenzi we wa Congo Brazzaville, nyuma yaho bakazagirana inama izitabirwa n’amatsinda y’abayobozi ku mpande zombi.

Ku ruhande rw’u Rwanda, itsinda ryaherekeje Perezida Kagame ririmo Minisitiri w’Ububanyi n’Amahanga, Dr Vincent Biruta; Minisitiri w’Imari n’Igenamigambi, Dr. Uzziel Ndagijimana; Umuyobozi w’Urwego rw’Iterambere, RDB, Clare Akamanzi n’abandi.

Perezida Kagame yashimye umubano mwiza umaze gushinga imizi hagati y'ibihugu byombi

Perezida Kagame ubwo yakirwaga mu musangiro na mugenzi we Denis Sassou Nguesso

Perezida Denis Sassou Nguesso ni we watumiye mugenzi we w'u Rwanda

Perezida Kagame yashimiye mugenzi we wa Congo Brazzaville ku mubano mwiza uri hagati y'ibihugu byombi

Abayobozi batandukanye ku mpande zombi bari bitabiriye uyu muhango