Perezida Kagame yakebuye abayobozi barebera ibintu bipfa, atanga ingero ku byo yabonye i Musanze n’i Kigali

Yanditswe na Philbert Girinema
Kuya 30 Ukwakira 2020 saa 04:14
Yasuwe :
0 0

Perezida Paul Kagame yakebuye abayobozi mu nzego zitandukanye, barebera ibintu bipfa ntihagire icyo bakora mu gihe biri mu nshingano zabo, atanga ingero ku byo yabonye i Musanze ubwo yabonaga abaturage bari gutwika ishyamba n’aho yageze muri Kigali agasanga abantu bubaka mu buryo bwangiza umuhanda n’ibindi bikorwa remezo.

Umukuru w’Igihugu yabigarutseho mu muhango wo kumurika uko imihigo y’umwaka wa 2019/20 yeshejwe no gusinya iya 2020/21. Mu mihigo y’umwaka ushize, Akarere kaje ku mwanya wa mbere ni Nyaruguru kakurikiwe n’aka Huye na Rwamagana, mu gihe Nyabihu, Karongi na Rusizi aritwo twa nyuma.

Umukuru w’Igihugu yavuze ko muri aya manota yamuritswe hari icyo yabonyemo, aho uturere twakoraga neza mu myaka ishize ubu turi kuza mu myanya ya nyuma, mu gihe utwakoraga nabi aritwo tuza imbere.

Yavuze ko izo mpinduka zidashobora kwitirirwa ko zatewe n’icyorezo cya Coronavirus, atanga urugero kuri Musanze, ati “Ubundi yajyaga ikora neza, habaye iki?”

Perezida Kagame yabajije aho Meya wa Musanze ari, arahaguruka. Yahise avuga ko bishoboka ko nko mu myaka ine ishize hamaze kujyaho abayobozi benshi b’aka karere, bigaragaza imikorere mibi ikaranga. Yabajije kandi niba Guverineri w’Intara y’Amajyaruguru, Gatabazi JMV ahari, arahaguruka na we.

Umukuru w’Igihugu yabajije aba bayobozi niba bibuka inshuro bahuye na we mu mezi nk’abiri ashize, ndetse niba bibuka icyo bahuriye icyo gihe, akababaza ibyo yari yabonye yagiye i Musanze bitari bikwiye, ariko ugasanga bo ntibabizi.

Ati “Urugero, Naraye i Musanze, mu gitondo bigera mu ma saa sita, mu ma saa munani ndeba ahantu hose, nza kubona inkongi y’umuriro n’umwotsi n’iki, ahantu hanini cyane.”

“Nshaka kumenya ikibaye icyo aricyo, naho baratwika ishyamba, baratwika amakara Ndabashaka ndababaza nti ariko ibi bintu biri hano, ibi murabizi? Ariko ubwo abo babikora basanzwe babihakorera buri munsi. Ndababaza [abayobozi nti] mwebwe ntimuba hano muri aka karere? [...] nsanga ntibabibona. Nubwo kubibona n’uko umwotsi nabatungiraga urutoki, nti umwotsi murawureba? Bawubona ari uko mbabwiye nti murawureba.”

Ngo yabasabye kujyayo bakabaza abaturage impamvu, basanga batwika amakara mu gihe abayobozi bazi neza ko ishyamba hari gahunda yo kuribungabunga.

Yavuze ko hashize iminsi, yasubiyeyo agasanga aho Hotel ya One & Only imariye kugerayo, hari abandi baje kubaka iruhande rwayo nabo bubaka hoteli ku buryo bageze no ku kurengera ngo bayisatire.

Ati “Barubaka bararangiza, inzu n’imirima. Inzu bayubatse nyuma ya hotel, ntabwo ari ukuvuga ngo ni ibyahagiye kera hotel yarahabasanze, ashwi.”

Ikindi ngo yahabonye umwanda n’akajagari, ahabona abana benshi basa nabi ku nzira, bambaye nabi, mu gihe bakwiriye kuba barangwa n’isuku.

Ati “Ariko ukuntu basa ku mubiri! Ndababaza nti mwebwe abayobozi, iyo twirirwa tuvuga isuku, abana bacu bakwiriye kugira, abanyarwanda bakwiriye kugira kandi isuku ibarinda n’uburwayi [...] aha nta mazi ahaba, ntabwo abantu bakaraba?”

Umukuru w’Igihugu yakomeje abaza aba bayobozi ati “Gatabazi, mukora iki umunsi ku munsi? Nubwo ari wowe mbwira ubwo ndabwira n’abandi ba guverineri nabo ni ko bameze, ntugire ngo hari icyo bakurusha, nabo ni uko.”

Yabajije Meya wa Musanze impamvu ibyo bibazo bihari, Nuwumuremyi Jeannine ati “Nyakubahwa Perezida wa Repubulika, mu by’ukuri nta kiba cyabuze, ariko turashyiramo ingufu cyane turabibemereye.”

Perezida Kagame yavuze ko kuvuga ko hagiye gushyirwamo imbaraga bidakwiriye, kuko byonyine igihe kiba cyatakaye. Yavuze ko atabyemera kuko bimaze igihe kirerekire kandi ku bantu benshi.

Ati “Iyo udashobora kubona ikintu, wansezeranya se ngo ikizaza kizatungana gute utabona? Cyangwa se ibyo mubona musa n’abatagira imbaraga zo kubwira umuntu ukora ikintu kidakoreka, kidakwiriye kuba gikorwa ngo mumubwire ngo ntabwo aribyo? Ubwabyo byarabananiye, ni ikibazo.”

Yasanze abantu bangiza umuhanda mu Mujyi wa Kigali

Umukuru w’Igihugu yavuze ko mu mpera z’icyumweru aherutse kugenda mu Mujyi wa Kigali. Icyo gihe ngo yahamagaye Meya w’Umujyi wa Kigali, Pudence Rubingisa na Minisitiri w’Ibikorwa Remezo, Amb Claver Gatete.

Ati “Ubwo ngenda mu Mujyi mbereka ibintu bitabaho bidakwiriye kuba bikorwa. Urugero rumwe [...] abubaka baragiye batwaye amakamyo y’umusenyi, baragiye bayarunze mu muhanda wa kaburimbo ukimara gukorwa, igice cy’umuhanda baragifunga. Ubwo hatuye abandi bantu ku ruhande, umuhanda wubatswe na leta, abantu baragenda bafunga umuhanda bamenamo umusenyi, bashyiramo umusozi ku buryo imodoka zitabona aho zinyura kubera ko barimo kubaka.”

Yavuze ko ahandi, abantu bubakaga, barangije bafata amabuye manini yasigaye bayasunikira mu miserege itwara amazi mu nkengero z’umuhanda, barawufunga nka metero 200.

Ati “Nagombye kubatwarayo njya kubereka kuko nari nahanyuze ndabibona. Ubwo ba Gatete bicaye mu biro bari ku matelefoni, ba meya sinzi. Iyo mikorere ni mikorere ki?”

Yavuze ko hari ahandi usanga abantu bangiza inzira z’abanyamaguru ziba zarubatswe, ku buryo abubaka bazivangiraho imicanga, bakajya gusoza zarangiritse.

Ngo icyo gihe abayobozi nyuma bajya mu Nama y’Abaminisitiri bakavuga ko nta ngengo y’imari bafite, mu gihe ibyo bashaka gukora ari ibyakozwe ahubwo bikangizwa n’abandi.

Perezida Kagame yavuze ko bidasaba ubuhanga bwinshi, kuko mu gihe yasanga umuntu yangije igikorwa remezo, aba agomba kubyishyura ndetse hagakurikiraho n’ibihano.

Ati “Ariko aba, urangiza bo bakajya mu leta, bakajya gusaba amafaranga yo kubyubaka.”

Umukuru w’Igihugu yavuze ko iyo agenda mu muhanda aba areba, ku buryo hari ubwo yumva yava mu modoka ngo abaze umuntu uyobora muri ako gace impamvu hari ibintu bidakorwa neza.

Yahise ahamagara Meya wa Kayonza, amubwira ko mu Mujyi wa Kayonza hari inzu zubatse zimeze neza ariko imbere yazo hameze nko mu murima, ku buryo bishobora kwica umuhanda.

Yavuze ko bitumvikana ukuntu umuntu yubaka inzu nziza ariko akananirwa kubaka umuharuro. Ati “Urashaka ko nzaza kubikwibutsa?”

Umukuru w’igihugu yahise atanga urundi rugero rw’aho ibi biganiro byabereye, yereka abayobozi uburyo intebe zose zihengamye ku buryo n’umuntu uwo ariwe wese yabibona n’amaso ye.

Ati “Njye nahoze nicaye aha, natembaga nkibaza impamvu, ngiye kureba nkabona aha ni hejuru, aha ni hasi [...] umuntu yagira ngo za mask dufite ziri ku maso, kandi ziri ku munwa.”

Perezida Kagame yavuze ko icyifuzo cye ari uko abantu bose bari bakwiye kugira umugambi umwe wo gukorera igihugu birinda ibintu bito “bigayitse”, ahubwo baharanira ibizima.

Perezida Kagame ubwo yageraga i Nyagatare. Aha yaganiraga na Perezida wa Sena, Dr. Iyamuremye Augustin; Perezida w’Inteko Ishinga Amategeko, Umutwe w’Abadepite, Donatille Mukabalisa; Perezida w'Urukiko rw'Ikirenga, Dr. Faustin Nteziryayo na Minisitiri w’Intebe, Dr Edouard Ngirente
Minisitiri w’Imari n’Igenamigambi, Dr. Ndagijimana Uzziel aganira na Minisitiri w’Ingabo, Gen. Maj. Murasira Albert
Minisitiri w’Ubucuruzi n’Inganda, Hakuziyaremye Soraya aganira na Guverineri w’Intara y’Amajyaruguru, Gatabazi JMV
Umugaba Mukuru w'Inkeragutabara, Gen Fred Ibingira, akurikiye impanuro z'Umukuru w'Igihugu
Umugaba Mukuru w’Ingabo z’u Rwanda, Gen Jean Bosco Kazura
Umuyobozi w'Akarere ka Nyaruguru, Habitegeko François, yashimiwe ko akarere ke kaje ku mwanya wa mbere mu kwesa imihigo
Umuyobozi w’Akarere ka Rwamagana, Mbonyumuvunyi Radjab, yashimiwe ko akarere ke kaje ku mwanya wa gatatu mu kwesa imihigo
Umuyobozi Mukuru wa Polisi y’u Rwanda wungirije ushinzwe ubuyobozi n’abakozi, DIGP Juvenal Marizamunda
Umuyobozi Nshingwabikorwa w'Akarere, Umwali Pauline. Akarere ayobora kaje ku mwanya wa cyenda mu kwesa imihigo y'umwaka wa 2019/20
Umunyamabanga wa Leta muri Minisiteri y’Urubyiruko n’Umuco, Bamporiki Edouard
Umunyamabanga wa Leta muri Minisiteri y’Imari n’Igenamigambi ushinzwe Igenamigambi, Dr. Uwera Claudine ari kumwe n’Umunyamabanga wa Leta muri Minisiteri y’Uburezi Ushinzwe Amashuri Abanza n’Ayisumbuye, Twagirayezu Gaspard
Minisitiri wa Siporo, Munyangaju Aurore Mimosa hamwe n'Umunyamabanga wa Leta muri Minisiteri y’Ubuhinzi n’Ubworozi, Ngabitsinze Jean Chrysostome
Imihigo y'umwaka wa 2020/21 yasinywe hifashishijwe ikoranabuhanga
Umuyobozi w'Akarere ka Bugesera, Richard Mutabazi. Akarere ayobora kaje ku mwanya wa 15 mu mihigo y'umwaka wa 2019/20
Perezida Kagame yagaragarije abayobozi uburyo hari abatita ku nshingano zabo ku buryo hari aho ajya anyura agasanga hari ibintu byinshi byapfuye

Izindi nkuru wasoma bifitanye isano:

- Abayobozi mu nzego Nkuru z’Igihugu berekeje i Nyagatare mu muhango w’isinywa ry’imihigo (Amafoto)

- Abanyarwanda barishyuye – Perezida Kagame abwira abatanga serivisi mbi kandi bahembwa mu misoro y’abaturage

- Akarere ka Nyaruguru kaje ku isonga mu mihigo ya 2019/20, Rusizi iba iya nyuma

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .