Perezida Kagame yagiranye ibiganiro na Ramaphosa wa Afurika y’Epfo

Yanditswe na Ishimwe Israel
Kuya 23 Ukwakira 2019 saa 02:36
Yasuwe :
0 0

Perezida Paul Kagame kuri uyu wa Gatatu yahuye na mugenzi we wa Afurika y’Epfo Cyril Ramaphosa bagirana ibiganiro byihariye ku kunoza umubano hagati y’ibihugu byombi.

Umukuru w’Igihugu Paul Kagame na Perezida Ramaphosa we bahuriye mu Mujyi wa Sochi mu Burusiya aho bitabiriye inama y’Abakuru b’Ibihugu na za Guverinoma ba Afurika mu nama ya mbere ihuje u Burusiya na Afurika.

Iyi nama y’iminsi ibiri iteganyijwe ku wa 23-24 Ukwakira 2019, yitabiriwe n’abayobozi b’imiryango n’amashyirahamwe yo mu turere. Iri kwibanda ku mubano w’ibihugu bya Afurika n’u Burusiya no kwagura ubutwererane muri politiki, ubukungu, tekiniki n’umuco. Yayobowe na Perezida Vladimir Putin na Perezida Abdel Fattah el-Sisi wa Misiri akaba n’Umuyobozi w’Umuryango wa Afurika Yunze Ubumwe, AU.

Ibiro bya Perezidansi y’u Rwanda byatangaje bibinyujije kuri Twitter ko Perezida Kagame yahuye na Ramaphosa wa Afurika y’Epfo ariko mu butumwa bwabyo, ntibyatangaje ibikubiye mu biganiro aba bombi bagiranye.

Ni ku nshuro ya karindwi, Perezida Kagame na Ramaphosa bahuye kuva mu myaka ibiri ishize. Ni intambwe igaragaza ubushake bw’impande zombi mu gukemura ibibazo bishingiye kuri politiki bihari.

Uguhura kw’abakuru b’ibihugu byombi kwakurikiye uruzinduko Jeff Radebe, Intumwa yihariye ya Perezida Ramaphosa aheruka kugirira mu Rwanda mu ruzinduko rwari rugamije kumenyesha ibihugu bitandukanye bya Afurika ingamba igihugu cye cyafashe ku kibazo cy’ibikorwa, mu minsi ishize byibasiye abanyamahanga b’Abanyafurika.

Uretse iyi ngingo yo kwibasira abimukira, muri iki gihe hari ingingo nyinshi zireba umubano w’u Rwanda na Afurika y’Epfo zitabura kuganirwaho igihe ibihugu byombi byahuye.

Nubwo umubano w’u Rwanda na Afurika y’Epfo ugenda ugarura isura, hari ibitaranoga kuko nyuma yo kurangiza inshingano kwa Ambasaderi George Nkosinati Twala muri Gashyantare 2019, Afurika y’Epfo nta ambasaderi ifite i Kigali.

Ibyo bikiyongeraho ko Afurika y’Epfo ari nayo icumbikiye Kayumba Nyamwasa ukuriye ishyaka rya RNC n’Umutwe w’abarwanyi wa P5, uhuriweho n’amashyaka atanu arwanya Leta y’u Rwanda.

Uyu mutwe wakomeje gutegura ibikorwa bigamije guhungabanya umutekano w’u Rwanda no kugirira nabi ubutegetsi buriho ndetse bamwe mu bari bawugize barimo umuyobozi wabo Rtd Major Mudathiru Habib, barimo kuburanishwa n’inkiko za gisirikare mu Rwanda, nyuma yo gufatwa n’ingabo za RDC, abandi bakishyikiriza MONUSCO.

Kugeza ubu kandi Abanyarwanda bakomeje kugorwa no kubona viza zo kwerekeza muri Afurika y’Epfo, ikibazo Perezida w’icyo gihugu, Cyril Ramaphosa aheruka kuvuga ko kigiye gukemurwa, ariko imyaka igihe kuba ibiri bitarashoboka.

Perezida Paul Kagame yagiranye ibiganiro byihariye na mugenzi we wa Afurika y’Epfo Cyril Ramaphosa
Ni ku nshuro ya karindwi, Perezida Kagame yahuye na Ramaphosa baganira ku bijyanye no kunoza umutekano hagati y'impande zombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza